ໂຄງການອາຫານທ່ຽງ ນັກຮຽນ ຢູ່ 3 ແຂວງພາກເໜືອ ບໍ່ພຽງພໍ

ງົບປະມານ ຂອງໂຄງການອາຫານທ່ຽງ ທີ່ຣັຖບານຮັບຄືນມາຈາກ ອົງການອາຫານໂລກ ຢູ່ 3 ແຂວງພາກເໜືອ ເຊິ່ງມີງົບປະມານ ບໍ່ພຽງພໍ ເຮັດໃຫ້ ພໍ່ແມ່ຜູ້ປົກຄອງ ແລະ ຊຸມຊົນ ຕ້ອງໄດ້ຈ່າຍຄ່າອາຫານຊ່ວຍໂຮງຮຽນ ຫຼື ເອົາເຂົ້າໄປກິນເອງ.
ພອນ ພູມມີທອນ
2023.05.17
ໂຄງການອາຫານທ່ຽງ ນັກຮຽນ ຢູ່ 3 ແຂວງພາກເໜືອ ບໍ່ພຽງພໍ ເດັກນ້ອຍນັກຮຽນ ທີ່ໂຮງຮຽນແຫ່ງນຶ່ງ ໃນແຂວງສວັນນະເຂດ ພວມລໍຖ້າກິນ ແລະ ພວມກິນ ອາຫານທ່ຽງ ຕາມໂຄງການອາຫານທ່ຽງ ທີ່ໄດ້ຮັບການສນັບສນູນຈາກສາກົລ (TS) ເດືອນມີນາ ປີ 2023.
RFA

ຕັ້ງແຕ່ປີ 2019-2022 ອົງການອາຫານໂລກ ໄດ້ຍຸຕິການຊ່ວຍເຫລືອ ໂຄງການອາຫານທ່ຽງ ຢູ່ໂຮງຮຽນປະຖົມ ບ້ານຫາດສາ ເມືອງຜົ້ງສາລີ ແຂວງຜົ້ງສາລີ, ໂຮງຮຽນປະຖົມບ້ານບໍ່ ເມືອງໄຊ ແຂວງອຸດົມໄຊ ແລະ ໂຮງຮຽນປະຖົມ ບ້ານໂພນສະຫວ່າງ ເມືອງລອງ ແຂວງຫລວງນ້ໍາທາ ແລ້ວ ມອບໃຫ້ຣັຖບານ ເປັນຜູ້ຈັດຕັ້ງປະຕິບັດ ຈາກນັ້ນ ຣັຖບານ ມອບງົບປະມານ 800 ກີບ ຕໍ່ຄົນ ຕໍ່ຄາບເຂົ້າທ່ຽງ ຕໍ່ມື້ ເຊິ່ງງົບດັ່ງກ່າວ ບໍ່ພຽງພໍ.

ສະເພາະ ໂຮງຮຽນປະຖົມ ບ້ານຫາດສາ ຕ້ອງໄດ້ຈັດກອງປະຊຸມ ຂໍຄວາມຮ່ວມມື ຈາກພໍ່ແມ່ຜູ້ປົກຄອງ ໃຫ້ຫໍ່ເຂົ້າຈາກເຮືອນມາກິນ ຢູ່ໂຮງຮຽນ ສ່ວນອາຫານໃຫ້ປະກອບສ່ວນ 1,000 ກີບ ຕໍ່ນັກຮຽນ 1 ຄົນ ຕໍ່ຄາບເຂົ້າທ່ຽງ ຕໍ່ມື້ ເພື່ອປຸງແຕ່ງພາເຂົ້າທ່ຽງ ໃຫ້ນັກຮຽນກິນ ຍ້ອນງົບປະມານ 800 ກີບ ບໍ່ພຽງພໍ. ຕາມຄວາມເວົ້າ ຂອງເຈົ້າໜ້າທີ່ ທີ່ກ່ຽວຂ້ອງ ເມືອງຜົ້ງສາລີ ກ່າວຕໍ່ວິທຍຸ ເອເຊັຽ ເສຣີ ໃນວັນທີ15 ພຶສພາ ນີ້ວ່າ:

“ເອ ຫລາຍຊົນເຜົ່າ ມີລາວສູງ ມີພູນ້ອຍ ແລ້ວກໍມີ ລາວລຸ່ມ ກໍາລັງທຸກຍາກ ເດັກຢູ່ນີ້ຫັ້ນນ່າ ຖ້າວ່າ ອັນຊ່ວຍກໍ ຢາກໃຫ້ຊ່ວຍຫັ້ນແຫລະ ດຽວນີ້ນີ້ ທາງໂຄງການອາຫານທ່ຽງ 800 ກີບ ຕໍມື້ຕໍ່ຄາບຕໍ່ຄົນ ອັນນັ້ນ ກໍບໍ່ພໍກິນ ແລ້ວ ກໍຍັງລະດົມຈາກຊຸມຊົນ 50/50 (ຫ້າສິບ/ຫ້າສິບ) ແລ້ວກໍປຸງແຕ່ງໄປແນວນີ້ແຫລະ ບ້ານເຮົາ ຊີ້ນ ປາ ນີ້ກໍໄດ້ກິນ ເລັກໆ ນ້ອຍໆ ຫັ້ນແຫລະ ສ່ວນຫລາຍ ກໍຜັກ ມີຢູ່ຕາມທ່ອງຖິ່ນ ເທົ່າທີ່ພໍ່ແມ່ ເຮັດໃຫ້ ອັນນັ້ນ ພາກັນກິນໄປ ແນວນັ້ນແຫລະ ມີໄຂ່ບໍ່ ມີແຈ່ວບໍ່ ຕອນເຂົາບໍ່ມາຊ່ວຍເຂົ້າ ກໍແຈ້ງໃຫ້ເດັກຫັ້ນເປິດກອງປະຊຸມ ແລ້ວກໍແຈ້ງໃຫ້ພໍ່ແມ່ເຂົາຫໍ່ມາຢູ່ເຮືອນ ແລ້ວເອົາມາກິນລວມ ຢູ່ໂຮງຮຽນ.”

ອົງການອາຫານໂລກ ຍຸຕິການຊ່ວຍເຫລືອ ໂຄງການອາຫານທ່ຽງ ຢູ່ໂຮງຮຽນປະຖົມບ້ານບໍ່ ຕັ້ງແຕ່ປີ 2022 ເຮັດໃຫ້ ຫລັງຈາກນັ້ນເປັນຕົ້ນມາ ຈົນຮອດປັດຈຸບັນ ພໍ່ແມ່ຜູ້ປົກຄອງຂອງນັກຮຽນແຕ່ລະຄົນ ຕ້ອງໄດ້ແບ່ງກຸ່ມ ປະມານ 10 ກຸ່ມ ເພື່ອໝູນວຽນກັນ ເຮັດໜ້າທີ່ຕໍາແໜ່ງແມ່ຄົວ ຊື້ເຄື່ອງປຸງ ວັດຖຸດິບ ແລະ ອື່ນໆ ຫາກພໍ່ແມ່ຜູ້ປົກຄອງ ຜູ້ໃດ ບໍ່ມີເງິນຊື້ເຄື່ອງ ກໍຈະຕ້ອງໄດ້ອອກແຮງງານ ເອົາຟືນ ເອົາຜັກ ເອົາມັນຕົ້ນ ມາປະກອບສ່ວນປຸງແຕ່ງອາຫານທ່ຽງແທນ. ໂດຍທີ່ເງິນ 800 ກີບ ທີ່ຣັຖບານໃຫ້ ກໍຈະລວມຢູ່ ໃນການປະກອບສ່ວນ ແຕ່ງອາຫານທ່ຽງ ນໍາດ້ວຍງ.

ດັ່ງ ເຈົ້າໜ້າທີ່ ທີ່ກ່ຽວຂ້ອງ ເມືອງໄຊ ກ່າວ ໃນມື້ດຽວກັນນີ້ວ່າ:

ມອບຄືນໃຫ້  ປະຊາຊົນຂອງພວກເຮົາ ເປັນຜູ້ສືບທອດຕໍ່ໄປເລີຍຫັ້ນນ່າ ເຮົາມາແຕ່ງເປັນກຸ່ມ ແຕ່ງກັນໄປກິນຢູ່ໂຮງຮຽນຫັ້ນ ໂຕເງິນໂຄງການກໍຈຳນວນນຶ່ງ ແລ້ວກໍເຮົາ ກໍກິນແບບປຫຍັດໜ້ອຍນຶ່ງ ນອກຈາກນັ້ນ ອັນນຶ່ງ ບໍ່ພໍ ເຮົາກໍເກັບນຳພໍ່ແມ່ ປະຊາຊົນເພີ່ມຕື່ມ ຄັນຊິເກັບແທ້ ກໍບໍ່ໄດ້ເກັບ ແຕ່ວ່າ ເພິ່ນເຫັນນອກເຫັນໃຈວ່າ ຈະຊຶ້ ອັນນັ້ນບໍ່ ຊື້ເພີ່ມຕື່ມໄປ ຈະເກັບແບບທຽບເທົ່າກັນ ເພີ່ນກໍບໍ່ເກັບເນາະ ອອກຊື້ນໍ້າບໍ່ ຊື້ໄຂບໍ່ (ຜູ້ໃດ) ບໍ່ມີ ກໍໄດ້ອອກແຮງງານ ບໍ່ມີຟືນ ບໍ່ມີຫຍັງ ພວກເຂົາເຈົ້າ ກໍເອົາຟືນ ເອົາມັນໄປຫັ້ນນ່າ ບາງຄົນ ມີຜັກບໍ່ກໍໄປໃຫ້ ຈະນັ້ນເດ້.”

ເມື່ອທຽບກັບທີ່ຕອນມີອົງການ ອາຫານໂລກ ຊ່ວຍໂຄງການອາຫານທ່ຽງ ຈະເຫັນໄດ້ຊັດເຈນວ່າ ເຄື່ອງປຸງ ວັດຖຸດິບ ຈະບໍ່ຂາດ ມາສົກຮຽນນີ້ ຣັຖບານມອບ-ຮັບໂຄງການ ອາຫານທ່ຽງ ພັດນໍ້າມັນປຸງອາຫານ ກໍບໍ່ພໍແລ້ວ.

ດັ່ງ ເຈົ້າໜ້າທີ່ ທີ່ກ່ຽວຂ້ອງ ເມືອງລອງ ກ່າວໃນມື້ດຽວກັນນີ້ວ່າ:

“ປະກອບສ່ວນໃສ່ເງິນ 800 ຫັ້ນ ໃຫ້ມັນເປັນ 1,000ກີບ ເຮົາກໍຫານກັນແຕ່ລະມື້ ບາງມື້ກໍກິນ ປ໋ອງປາແດ່ ກິນປ໋ອງປາ ກໍຊື້ຜັກເນາະ ຊື້ຜັກມາຂົ້ວບໍ່ ມາແກງໃສ່, ຊີ້ນນີ້ ເງິນປະກອບສ່ວນ ພໍດີໄດ້ ກິໂລນຶ່ງ ກິໂລນຶ່ງ 85 ພັນ ໄດ້ກິໂລປາຍໜ້ອຍນຶ່ງ ຊີ້ນນ່າ ແຕ່ກີ້ນີ້ ມີຄວາມຊ່ວຍເຫລືອຫລາຍແລ້ວ ບາດດຽວນີ້ ເຂົ້າບໍ່ ບໍ່ພຽງພໍ ຍົກໂຕຢ່າງ ສົກຮຽນນີ້ ບໍ່ມີຮອດນ້ໍາມັນ ນີ້ນ່າ.”

ຍານາງກ່າວຕື່ມວ່າ ສັປດາທີ່ຜ່ານມາ ໄດ້ມີກອງປະຊຸມກ່າວເຖິງ ງົບປະມານ ອາຫານທ່ຽງ ຄວນຈະເພີ່ມຂຶ້ນເປັນ 1,000 ກີບ ຕໍ່ຄົນ ຕໍ່ຄາບ ເຂົ້າທ່ຽງຕໍ່ມື້ ເນື່ອງຈາກ 800 ກີບ ແຕ່ຍັງບໍ່ພຽງພໍອາຫານທ່ຽງຂອງນັກຮຽນ ທັງໂຮງຮຽນ 98 ຄົນ ແລະ ທາງພາກສ່ວນທີ່ກ່ຽວຂ້ອງ ຄາດວ່າ ຈະໄດ້ຮັບງົບດັ່ງກ່າວເພີ່ມ ປະມານເດືອນ ກັນຍາ - ຕຸລາ 2023 ນີ້.

IMG_2788.JPG
ນັກຮຽນ ໃນໂຮງຮຽນແຫ່ງນຶ່ງ ຂອງແຂວງຜົ້ງສາລີ ກຳລັງກິນອາຫານທ່ຽງ ທີ່ໄດ້ຮັບການສນັບສນູນຈາກ ຊຸມຊົນ, ເດືອນພຶສຈິກາ ປີ 2022.

ດ້ານ ຜູ້ປົກຄອງນັກຮຽນ ໂຮງຮຽນປະຖົມ ບ້ານບໍ່ ກ່າວວ່າ ພາຍຫລັງ ທີ່ໂຄງການອາຫານທ່ຽງ ຖືກໂອນໃຫ້ຣັຖບານ ຈັດຕັ້ງປະຕິບັດນັ້ນ ກໍເຮັດໃຫ້ ອາຫານການກິນບໍ່ໄດ້ຂາດ ຍ້ອນພໍ່ແມ່ຜູ້ປົກຄອງປະກອບສ່ວນເປັນແມ່ຄົວ ແລະ ຊື້ເຄື່ອງປຸງແຕ່ງອາຫານທ່ຽງໃຫ້ລູກ-ຫລານໂຕເອງ ແຕ່ວ່າການປຸງອາຫານ ໃຫ້ໄດ້ຄຸນນະພາບ ທີ່ໂຄງການວາງໄວ້ ກັບບໍ່ໄດ້ຕາມແຜນ ຍ້ອນ ບາງມື້ ບໍ່ມີໜາກໄມ້ ບາງມື້ບໍ່ມີຊີ້ນ ເປັນຕົ້ນ.

ດັ່ງ ທ່ານກ່າວໃນມື້ດຽວກັນນີ້ວ່າ: 

“ຈາໂຄງການບໍ່ຢູ່ ແລ້ວມອບໃຫ້ ພໍ່ແມ່ປະຊາຊົນເຮົາ ມີຫຍັງ ກໍເຮັດກັນໄປ ຈະບໍ່ຄືໂຄງການ ວ່າຊັ້ນສາ ການຮໍ່າ ການຮຽນ ກໍປົກກະຕິຢູ່ ແຕ່ວ່າ ອາຫານການກິນກໍບໍ່ຂາດ ຄືເກົ່າ ແຕ່ວ່າ ມັນບໍ່ໄດ້ເປັນໄປຕາມແຜນຂອງໂຄງການວ່າຊັ້ນສາ.”

ເຈົ້າໜ້າທີ່ ທັງ 3 ທ່ານ ກ່າວຕຣົງກັນວ່າ ຫລັງຈາກ ອົງການອາຫານໂລກ ເຂົ້າມາສນັບສນູນວຽກງານ ໂຄງການອາຫານທ່ຽງໃນລາວ ແຕ່ປີສົກຮຽນ 2015-2016 ກໍເຮັດໃຫ້ ນັກຮຽນພາຍໃນໂຮງຮຽນ ບໍ່ປະລະການຮຽນ, ຂາດການຮຽນ ນັກຮຽນຜູ້ທຸກຍາກ ໄດ້ກິນເຂົ້າທ່ຽງ, ນັກຮຽນກິນເຂົ້າເປັນເວລາ ແລະ ບໍ່ຂາດສານອາຫານ ຂະນະທີ່ແຕ່ກ່ອນ ຕອນທີ່ ບໍ່ມີໂຄງການອາຫານທ່ຽງ ນັກຮຽນ ມັກອອກໂຮງຮຽນ ຍ້ອນ ເຂົາເຈົ້າບໍ່ມີເຂົ້າຫໍ່ມາກິນ ຢູ່ໂຮງຮຽນ ມື້ໃດ ເຂົາເຈົ້າບໍ່ມີເຂົ້າກິນ ກໍຈະບໍ່ມາໂຮງຮຽນເລີຍ.

ເລື່ອງທີ່ອ່ານຫຼາຍ
ແມ່ຍິງ-ເດັກນ້ອຍ
ພົບແມ່ຍິງ ຖືກຄາດຕະກໍາ ຖິ້ມລົງແມ່ນໍ້າຂອງ
ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.