ຫຼາຍແຂວງຂາດງົບ ແກ້ໄຂ ເດັກນ້ອຍ ຂາດສານອາຫານ

ໄຊຍາ
2020-12-03
Share
ຫຼາຍແຂວງຂາດງົບ ແກ້ໄຂ ເດັກນ້ອຍ ຂາດສານອາຫານ ໂຕຢ່າງເດັກນ້ອຍລາວ ໃນເຂດຊົນນະບົດ ສ່ວນໃຫຍ່ ຂາດສານອາຫານ ແລະ ໂຕເຕັ້ຽ. ຮູບຖ່າຍເມື່ອ: ເດືອນພຶສຈິກາ 2020. ໂດຍ: TS
RFA

ປັດຈຸບັນ, ຍັງພົບວ່າ ໃນແຂວງສວັນນະເຂດ, ອຸດົມໄຊ, ຊຽງຂວາງ ແລະ  ຫົວພັນ ຍັງມີບັນຫາ ງົບປະມານ ເພື່ອຊ່ອຍໃຫ້ເດັກນ້ອຍ ມີອາຫານເສີມ ຖືກຫຼັກໂພສະນາການ. ດັ່ງແຂວງຫົວພັນ ປະເມີນວ່າ ຈະມີເດັກນ້ອຍ ຂາດສານອາຫານ ເພີ່ມຂຶ້ນ ຈາກປີກາຍ ຍ້ອນວ່າ ແຂວງຂາດທຶນພາຍໃນ ແລະ ທຶນຊ່ອຍເຫຼືອ ຈາກສາກົລ ເພື່ອຊື້ອາຫານເສີມ ໃຫ້ຖືກຫຼັກ ໂພສະນາການ. ດັ່ງເຈົ້າໜ້າທີ່ ຜແນກສາທາຣະນະສຸຂ ແຂວງຫົວພັນ ໄດ້ກ່າວຕໍ່ ເອເຊັຽເສຣີ ໃນວັນທີ 02 ທັນວາ 2020 ວ່າ:

“ອຸປະກອນນີ້ ມັນກໍຍັງ ບໍ່ທັນຄົບຫັ້ນແຫຼະ. ເປັນຕົ້ນຊິງຊັ່ງເດັກນ້ອຍບໍ່ ຫັ້ນແຫຼະເນາະ. ແບບໄດ້ມາຕຖານ, ຫັ້ນແຫຼະເນາະ. ການຈັດຊື້ ອາຫານເສີມ ໃຫ້ຖືກຫຼັກ ໂພສະນາການ ແທ້ໆ ມັນກໍບໍ່ພຽງພໍປານໃດເນາະ.”

ສ່ວນແຂວງອຸດົມໄຊ ຍັງບໍ່ສາມາດ ປະເມີນໄດ້, ສະເພາະປີ 2020 ນີ້ ວ່າມີຈຳນວນ ເດັກຂາດສານອາຫານ ເພີ່ມບໍ່. ຜ່ານມາ, ຕາມສະຖິຕິ ເດັກຂາດສານອາຫານ ແມ່ນແບ່ງເປັນ ເດັກຈ່ອຍ 18%, ເດັກເຕັ້ຽ 21%. ດັ່ງເຈົ້າໜ້າທີ່ ຜແນກສາທາຣະນະສຸຂ ແຂວງອຸດົມໄຊ ກ່າວວ່າ:

“ອີງໃສ່ແຜນການ ຂອງຣັຖບານເຮົາ ເວົ້າເຣື່ອງຫຼຸດຜ່ອນ ຄວາມທຸກຍາກນີ້ນ່າ ປະເທດລາວ ກໍຖືວ່າ ໄດ້ຮັບຄວາມຊ່ອຍເຫຼືອ ຈາກສາກົລ ໜ້ອຍລົງ ແຕ່ລະປີ. ສະນັ້ນ, ເວົ້າ ເຣື່ອງທຶນ ຈະຊື້ອາຫານເສີມ ຖືວ່າຂາດແລ້ວ, ວ່າຊັ້ນສາ ບໍ່ມີການຊ່ອຍເຫຼືອແລ້ວ. ສຳລັບຣັຖບານເຮົາ ກໍຂຶ້ນແຜນຄືເກົ່າ, ແຕ່ວ່າ ຂອງອົງການຈັດຕັ້ງສາກົລ ຊ່ອຍເຫຼືອ ຖືວ່າເພິ່ນຕັດ.”

ເຈົ້າໜ້າທີ່ສາທາ ແຂວງອຸດົມໄຊ ກ່າວຕື່ມວ່າ ສຳລັບງົບປະມານ ດ້ານໂພສະນາການ ພາຍໃນແຂວງ ຖືວ່າແຂວງ ບໍ່ໄດ້ຮັບທຶນ ຊ່ອຍເຫຼືອ ຈາກສາກົລ 5 ເມືອງ ຈາກທັງໝົດ 7 ເມືອງ. ມີແຕ່ທຶນ ຈາກທະນາຄານໂລກ ທີ່ຊ່ອຍເຫຼືອ ໂຄງການ ປຸງແຕ່ງອາຫານ ໃຫ້ນັກຮຽນກິນ ຢູ່ເມືອງຫຼາ ແລະ ເມືອງນາໝໍ້.

ແຂວງຊຽງຂວາງ ມີໂຄງການ ຈາກກອງທຶນສາກົລ ເຂົ້າມາຊ່ອຍ ວຽກໂພສະນາການເດັກຢູ່, ແຕ່ເມືອງໜອງແຮດ ແລະ ເມືອງຄຳ ຈາກທັງໝົດ 6 ເມືອງ, ແຕ່ທຶນຣັຖບານ ມາຊ່ອຍ ແມ່ນໜ້ອຍຫຼາຍ. ດັ່ງເຈົ້າໜ້າທີ່ ຜແນກສາທາຣະນະສຸຂ ແຂວງຊຽງຂວາງ ໄດ້ກ່າວວ່າ:

“ສຳລັບງົບປະມານ ຂອງໂພສະນາການນ່າ ຄັນຂອງຣັຖບານນີ້ ແມ່ນໜ້ອຍສຸດແລ້ວ, ແຕ່ສຳລັບ ຂອງໂອດີເອ ມັນກໍບໍ່ຜ່ານ ຂອງຜແນກອີກ ມັນມາຕ່າງຫາກອີກ, ເວົ້າແລ້ວ, ມັນບໍ່ມີຊໍ້າ. ເອົາແທ້ໆ ມັນມີແຕ່ 2 ເມືອງ ເຫຼືອນັ້ນພວກເຮົາ ບໍ່ໄດ້ຕິດຕາມ.”

ແຂວງສວັນນະເຂດ ປີນີ້ ທຶນຈາກຣັຖບານ ໃຫ້ວຽກງານ ໂພສະນາການ ຫຼຸດລົງ ຈາກປີກາຍ 10% ຈຶ່ງເຮັດໃຫ້ ການຕິດຕາມ ກວດສຸຂພາບ ເດັກຂາດສານອາຫານ ພາຍໃນເມືອງ ບໍ່ທົ່ວເຖິງ. ດັ່ງເຈົ້າໜ້າທີ່ ຜແນກສາທາຣະນະສຸຂ ເມືອງວິລະບູລີ ໄດ້ກ່າວວ່າ:

“ຊິເວົ້າ ລົງເຄື່ອນໄຫວ ກິຈກັມ ພວກແມ່ ແລະ ເດັກນີ້ແລ້ວ ມັນບໍ່ໄດ້ ບໍ່ເຕັມຄືເກົ່າ, ຫັ້ນນ່າ ເພາະວ່າ ຣັຖບານ ມັນກໍມີຄວາມຈຳເປັນ ຄືວ່າຫັ້ນແຫຼະ ພົບຫຼາຍຢ່າງ ປີນີ້ເນາະ. ບໍ່ຈັກພັຍພິບັດ ນໍ້າຖ້ວມ, ບໍ່ຈັກພຍາດໂຄວິດ-19 ບໍ່ຈັກກອງປະຊຸມໃຫຍ່. ວຽກໂພສະນາການ ພວກເຮົາເຮັດແບບ ເຊື່ອມສານນ່າ. ເວລາເຮົາລົງໄປສັກຢາ ພວກເຮົາເຮັດໂຄສະນາເລີຍ ເຮັດເຊື່ອມສານ ເຮັດແທກລວງສູງ, ແທກນໍ້າໜັກ, ກວດທ້ອງແມ່ມານ ເຮັດເຊື່ອມສານໄປເລີຍ.”

ຕໍ່ກໍຣະນີ ອາຫານ ເພື່ອໂພສະນາການ ຂອງເດັກ, ຮອງຣັຖມົນຕຣີ ກະຊວງສາທາຣະນະສຸຂ ທ່ານ ດຣ. ພູທອນ ເມືອງປາກ ໄດ້ຣາຍງານ ເມື່ອວັນທີ 17 ກໍຣະກະດາ 2020 ວ່າ ເດັກນ້ອຍລາວ 1 ໃນ 3 ແສນຄົນ ໃນຂອບເຂດ ທົ່ວປະເທດ ຍັງມີພັທນາການ ດ້ານຕ່າງ ໆ ຊັກຊ້າ ບໍ່ໄດ້ມາຕຖານ. ມີຄວາມສລາດຈຳກັດ ຍ້ອນຜົລສະທ້ອນ ຈາກການຂາດສານອາຫານ ຊຳເຮື້ອ ແລະ ການປ່ຽນແປງ ຂອງສະພາບດິນຟ້າອາກາດ. ຂະນະທີ່ອັດຕຣາ ການຂາດສານອາຫານ ຮ້າຍແຮງ ໃນກຸ່ມເດັກນ້ອຍ ຕ່ຳກວ່າ 5 ປີ ອາຈເພີ່ມຂຶ້ນ 15% ໃນໄລຍະ ການຣະບາດ ຂອງພຍາດໂຄວິດ-19.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ