ມະຫາວິທະຍາໄລສະຫວັນນະເຂດ ມີນັກຮຽນສອບເສັງ ພຽງແຕ່ 329 ຄົນ

ມະຫາວິທະຍາໄລສະຫວັນນະເຂດ ໄດ້ທໍາການສອບເສັງເອົານັກຮຽນ ເຂົ້າຮຽນມະຫາວິທະຍາໄລຂອງຕົນ ໃນມື້ວັນທີ 20 ສິງຫາ 2024 ທີ່ສົກການສຶກສາປີ 2024-2025 ນີ້ ມີຄວາມຕ້ອງ ການນັກຮຽນ ເຂົ້າສຶກສາຕໍ່ ຈໍານວນ 1,500 ຄົນ ແຕ່ມີນັກຮຽນສະໝັກເຂົ້າສອບເສັງພຽງ 329 ຄົນເທົ່ານັ້ນ, ອີງຕາມການລາຍງານຂອງ ຮອງສາດສະດາຈານ ດຣ. ຄູນ ສັກບົວວົງ ອະທິການບໍດີ ມະຫາວິທະຍາໄລສະຫວັນນະເຂດ.

ການທີ່ມີນັກຮຽນສະໝັກເຂົ້າສອບເສັງພຽງ 329 ຄົນ ຖືວ່າມີຈໍານວນໜ້ອຍທຽບໃສ່ຄວາມຕ້ອງການຫຼາຍເຖິງ 1,500 ຄົນນັ້ນ ນັກຮຽນຜູ້ນຶ່ງ ຢູ່ແຂວງສະ ຫວັນນະເຂດ ເວົ້າຕໍ່ວິທະຍຸເອເຊັຍເສຣີ ໃນມື້ວັນທີ 30 ສິງຫາ 2024 ນີ້ວ່າ ເປັນຍ້ອນພໍ່ແມ່ ຜູ້ປົກນັກຮຽນທຸກຍາກ ບໍ່ມີເງິນທີ່ຈະໃຫ້ລູກຮຽນຕໍ່ ເພາະການເຂົ້າມະຫາວິທະຍາ ໄລ ຕ້ອງໄດ້ໃຊ້ຈ່າຍເງິນຫຼາຍ ແລະທຶນການສຶກສາ ລະດັບມະຫາວິທະຍາໄລ ມີໜ້ອຍ, ບໍ່ໄດ້ທົ່ວເຖິງ ແລະເປັນທຶນສໍາລັບນັກຮຽນ ທີ່ໄດ້ຄະແນນດີເວລາສອບເສັງເທົ່ານັ້ນ, ບໍ່ມີທຶນສໍາລັບຄົນທຸກຍາກ ດັ່ງນັ້ນ ຜູ້ເປັນພໍ່ແມ່ ຜູ້ປົກຄອງນັກ ຮຽນ ຈຶ່ງໃຫ້ລູກຫຼານຂອງຕົນ ໄປຊອກຫາເຮັດວຽກເອົາເງິນດີກວ່າ ດັ່ງທີ່ລາວເວົ້າວ່າ:

“ພວກຂະເຈົ້າກໍວ່າ ດ້ວຍສະພາບເສດຖະກິດໃນປັດຈຸບັນນີ້ຫລັກໆ ຄັນຮຽນໄປສ່ວນໃຫຍ່ຄອບຄົວ ກໍບໍ່ໄດ້ຊັບພັອດ ເຂົາກໍເລີຍເລືອກຈະໄປເຮັດວຽກຫລາຍກວ່າ ເວົ້າຕົງໆ ຜູ້ຢູ່ຫ່າງໄກກະທຸກອະຫລີໃດ໋ ຄືເດັກທຶນໃນແຜນ ເພິ່ນຈະຄັດເລືອກເອົາຄົນທີ່ຄະແນນດີ ເວລາສອບເສັງກະຄືຈະຈ່າຍຄ່າເທີມປະມານ 20 ເປີເຊັນ ແນ່ນອນມັນກໍບໍ່ພໍ.”

ແລະນັກຮຽນນາງນຶ່ງຢູ່ແຂວງດຽວກັນນີ້ ກໍເວົ້າຕໍ່ວິທະຍຸເອເຊັຍເສຣີ ໃນມື້ດຽວກັນນີ້ວ່າ ນັກຮຽນສ່ວນໃຫຍ່ ບໍ່ມີເງິນທີ່ຈະຮຽນຕໍ່ຂັ້ນມະຫາວິທະຍາໄລ ຊຶ່ງທາງມະຫາວິທະຍາໄລ ກໍຄວນຈະສ້າງສິ່ງຈູງໃຈ ໃຫ້ນັກຮຽນຢາກຮຽນຕໍ່ ໂດຍສະເພາະເລື່ອງທຶນການສຶກສາ ທີ່ທາງການຄວນເອົາໃຈໃສ່ໃນເລື່ອງນີ້ໃຫ້ຫຼາຍຂື້ນ ເພາະມັນເປັນປັດໃຈສໍາຄັນ ທີ່ຈະດຶງດູດໃຫ້ນັກຮຽນຢາກຮຽນຕໍ່ ດັ່ງທີ່ນາງເວົ້າວ່າ:

“ໂຕນີ້ນ່າ ໜ້າຈະໃສ່ໃຈເລື້ອງທຶນການສຶກສາໃຫ້ມັນຫລາຍຂຶ້ນ ສ່ວນຫລາຍມັນກໍຍັງເຂົ້າບໍ່ເຖິງ ຄືແບບນັກຮຽນເຂົາຢາກຮຽນຕໍ່ ແຕ່ວ່າທຶນການສຶກສາມັນກໍບໍ່ໂອເຄທກະໜ້ອຍໄປ ຄອບຄົວບາງຄົນມັນກໍບໍ່ມີ ເຂົາກໍບໍ່ສາມາດຈະໄປຮຽນຕໍ່ໄດ້ ຢາກໄປຫາວຽກເຮັດງານທໍາຫລາຍກວ່າ.”

ນາງເວົ້າຕື່ມວ່າ ນອກຈາກສິ່ງທີ່ເວົ້າມານັ້ນແລ້ວ ລະບົບການຮຽນ-ການສອນ ໃນລະດັບມະຫາວິທະຍາໄລ ຢູ່ປະເທດລາວ ກໍຍັງແມ່ນລະບົບເກົ່າ ທີ່ທາງກະຊວງສຶກສາທິການ ແລະກິລາ ຄວນຈະປັບປຸງແກ້ໄຂນໍາດ້ວຍ.

ກ່ຽວກັບເລື່ອງທີ່ວ່ານີ້ ເຈົ້າໜ້າທີ່ດ້ານການສຶກສາ ຢູ່ແຂວງສະຫວັນນະເຂດທ່ານນຶ່ງ ເວົ້າວ່າ ທາງການກໍມີແຜນ ທີ່ຈະແກ້ໄຂຢູ່. ແຕ່ແຜນເບື້ອງຕົ້ນນີ້ ກໍມີພຽງແຕ່ການປຸກລະດົມ ຕາມກົດລະບຽບເທົ່ານັ້ນ ສ່ວນວ່າຈະໃຫ້ມີທຶນການສຶກສາ ແກ່ນັກຮຽນຫຼາຍນັ້ນ ກໍຍັງເປັນເລື່ອງຍາກ ເພາະຍັງບໍ່ມີງົບປະມານພຽງພໍ ດັ່ງທີ່ທ່ານກ່າວວ່າ:

“ເພິ່ນກໍມີແຜນຊ່ວຍຢູ່ ລະດົມຂົນຂວາຍ ຕິດພັນກັບການມີນິຕິກໍາທີ່ເຂົາສ້າງຂຶ້ນມາ ເພື່ອໃຫ້ມັນລັດກຸມ ອອກເປັນມາດຕະການນີ້ກໍມີ ຂອງລັດຖະບານກໍມີທຶນ ທຶນໃຫ້ຮຽນເນາະ ແຕ່ວ່າມັນໜ່ອຍ ຕ້ອງໃຊ້ເງິນຕົນເອງນໍາ ລັດກໍພະຍາຍາມຢູ່ ແຕ່ງົບປະມານບໍ່ມີ.”

ພ້ອມດຽວກັນນັ້ນ ອາຈານສອນທ່ານນຶ່ງ ຢູ່ແຂວງສະຫວັນນະເຂດ ກໍເວົ້າວ່າ ສໍາລັບບັນຫາທີ່ວ່ານັ້ນ ທີ່ຜ່ານມາ ທາງການກໍເຮັດໄດ້ພຽງແຕ່ລະດົມ ໃຫ້ນັກ ຮຽນຮຽນຕໍ່ເທົ່ານັ້ນ ແລະວ່າ ຖ້າຄອບຄົວຂອງນັກຮຽນທຸກຍາກ ບໍ່ມີເງິນທີ່ຈະສົ່ງລູກຮຽນຕໍ່ ກໍເປັນເລື່ອງຍາກ ທີ່ຈະສະໜັບສະໜູນໃຫ້ລູກຮຽນຕໍ່ ຂັ້ນມະຫາວິ ທະຍາໄລໄດ້ ແລະໃນປັດຈຸບັນນີ້ຍິ່ງເປັນການຍາກ ເພາະເສດຖະກິດລາວຫຍຸ້ງຍາກ ຝືດເຄືອງ, ມີບັນຫາເງິນເຟີ້ ແລະເງິນກີບອ່ອນຄ່າ ດັ່ງທີ່ທ່ານເວົ້າວ່າ:

“ສະໝັກເສັງເຂົ້າ ມ.ຊ. ນີ້ເບາະ ໂຕນັ້ນມັນກໍລວມທັງສະພາບເສດຖະກິດແດ່ ທາງຄອບຄົວແດ່ ຫຼາຍຢ່າງຫັ້ນແຫຼະ.”

ສິ່ງທັງໝົດດັ່ງກ່າວ ສະແດງອອກຢູ່ໃນລາຍງານຂອງຮອງສາດສະດາຈານ ດຣ. ຄູນ ສັກບົວວົງ ອະທິການບໍດີ ມະຫາວິທະຍາໄລສະຫວັນນະເຂດ ທີ່ວ່າ ສໍາລັບສົກການສຶກສາ ປີ 2024-2025 ນີ້ ມີນັກຮຽນມາສອບເສັງ ເຂົ້າມະຫາວິ ທະຍາໄລນີ້ 329 ຄົນ. ໃນຈໍານວນນີ້ ເປັນນັກຮຽນຍິງ 199 ຄົນ. ໂຕເລກດັ່ງກ່າວ ສະທ້ອນໃຫ້ເຫັນວ່າ ນັກສຶກສາປີນີ້ ແມ່ນມີໜ້ອຍຫຼາຍ ເມື່ອທຽບກັບຈໍານວນນັກຮຽນຊັ້ນ ມ.7 ທີ່ທາງມະຫາວິທະຍາໄລຮັບຜິດຊອບ 3 ແຂວງ ຄືແຂວງສະຫວັນນະເຂດ, ຄໍາມ່ວນ ແລະແຂວງບໍລິຄໍາໄຊ ທີ່ມີຈໍານວນນັກຮຽນທັງໝົດ 9,468 ຄົນ, ສະເລ່ຍແລ້ວ ມີພຽງແຕ່ 3.4% ເທົ່ານັ້ນ ທີ່ມາເຂົ້າສອບເສັງ.