ສາມະເນນລາວ ອາຍຸຕ່ຳກວ່າ 10 ປີ ຖືກລ່ວງລະເມີດທາງເພດ ຢູ່ປະເທດໄທຍ

ເກີດເຫດການສະເທືອນໃຈ ຕໍ່ສາມະເນນລາວ ອາຍຸບໍ່ເຖິງ 10 ປີ ທີ່ບວດຮຽນ ໃນວັດແຫ່ງນຶ່ງ ຢູ່ແຂວງຊຽງຮາຍ ປະເທດໄທຍ ຖືກເຈົ້າອາວາດວັດ ລ່ວງລະເມີດທາງເພດ ບໍ່ຕໍ່າກວ່າ 7-8 ຄັ້ງ ຕິດຕໍ່ກັນມາເຖິງ 2 ເດືອນ ລວມເຖິງ ຍັງຖືກກັກຂັງໜ່ວງໜ່ຽວໄວ້ ແລະທໍາຮ້າຍຮ່າງກາຍອີກ ໂດຍຖືກເຈົ້າອາວາດ ຕີ ຈົນມີບາດແຜ ແລະໃນວັດແຫ່ງດັ່ງກ່າວນີ້ ພົບວ່າ ມີສາມະເນນລາວ 7 ຕົນ, ທີ່ບວດຮຽນ ແລະມີ 2 ຕົນ ຖືກກະທໍາເຣື່ອງດັ່ງກ່າວ.

ຫຼ້າສຸດ ເຈົ້າໜ້າທີ່ຕໍາຣວດ ແຈ້ງຂໍ້ກ່າວຫາ ເຈົ້າອາວາດວັດແຫ່ງນີ້ ໃນຂໍ້ກ່າວຫາ ທໍາຮ້າຍຮ່າງກາຍ ແລະຂໍ້ກ່າວຫາ ກະທໍາມິດສະຈານ ຕໍ່ເດັກນ້ອຍອາຍຸຕໍ່າກວ່າ 10 ປີ ສ່ວນຂໍ້ກ່າວຫາ ລະເມີດທາງເພດ ຕ້ອງລໍຖ້າໃບຜົນກວດຮ່າງກາຍ ຖ້າພົບວ່າ ຖືກລ່ວງລະເມີດທາງເພດ ເຈົ້າອາວາດກໍຈະຖືກຂໍ້ກ່າວຫານີ້ດ້ວຍ ຫຼ້າສຸດ ເຈົ້າໜ້າທີ່ຕໍາຣວດ ໄດ້ນໍາເຈົ້າອາວາດວັດແຫ່ງນີ້ ໄປຝາກຂັງ ຢູ່ສານແຂວງຊຽງໃໝ່ແລ້ວ.

ດັ່ງເຈົ້າໜ້າທີ່ ພັນຕໍາຣວດເອກ ສິດທາ ຄໍາເລີດ ຜູ້ກໍາກັບການສະຖານີຕໍາຣວດແມ່ຣິມ ແຂວງຊຽງໃໝ່ ກ່າວຕໍ່ວິທຍຸ ເອເຊັຽເສຣີ ໃນວັນທີ 12 ຕຸລາ ນີ້ວ່າ:

“ຕອນນີ້ ໂຕຜູ້ຕ້ອງຫາ ໄດ້ຝາກຂັງ ທີ່ສານຮຽບຮ້ອຍແລ້ວ ແຈ້ງຂ້ໍກ່າວຫາ ທໍາຮ້າຍຮ່າງກາຍ ແລ້ວກໍເບື້ອງຕົ້ນ ແຈ້ງມິດສະຈານ ແລ້ວສ່ວນຂົ່ມຂືນນີ້ ລໍຖ້າໃບແພດ ຖ້າຜົນແພດອອກມາ ນີ້ວ່າ ມີການລ່ວງລະເມີດ ດຽວຈະແຈ້ງຂໍ້ກ່າວຫາເພີ່ມ.”

ພັນຕໍາຣວດເອກ ສິດທາ ກ່າວເພີ່ມຕື່ມວ່າ ສ່ວນສາມະເນນດັ່ງກ່າວ ກະຊວງພັທນາສັງຄົມ ແລະຄວາມໝັ້ນຄົງຂອງມະນຸສ ໃນໄທຍ ໄດ້ຄຸ້ມຄອງແລ້ວ ແລະຫາບ່ອນພັກໃຫ້ ໃນຖານະເປັນພະຍານ ເບື້ອງຕົ້ນ ສາມະເນນດັ່ງກ່າວ ກໍມີຄວາມສມັກໃຈ ສິກຈາກການເປັນສາມະເນນແລ້ວ ເພື່ອຄວາມສະດວກໃນການເບິ່ງແຍງ ເຣື່ອງອາຫານການກິນ ແລະໃນໄລຍະນີ້ ຢູ່ລະຫວ່າງສອບສວນເພີ່ມຕື່ມ ແລະຢູ່ລະຫວ່າງ ປະສານງານຫາພໍ່ແມ່ໃນປະເທດລາວ ເພື່ອໃຫ້ຮັບກັບໄປເບິ່ງແຍງ.

“ຕອນນີ້ ສາມະເນນນີ້ ພມ ເບິ່ງແຍງ ແລ້ວໃຫ້ຢູ່ໃນທີ່ພັກຮຽບຮ້ອຍແລ້ວ ມັນມີຫຼາຍສ່ວນ ສ່ວນນຶ່ງກໍຄືເຣື່ອງຂອງການຄຸ້ມຄອງພະຍານ ເນນສມັກໃຈທີ່ຈະສຶກ ເພາະວ່າ ມັນສະດວກກັບການເບິ່ງແຍງອາຫານການກິນ ທີ່ຢູ່ຫຼັບນອນ ເບື້ອງຕົ້ນ ກໍາລັງປະສານງານທີ່ຈະສົ່ງກັບ ໃຫ້ທາງພໍ່ແມ່ເຂົາເບິ່ງແຍງຕໍ່ ກໍຕ້ອງໃຊ້ເວລາແດ່.”

ຈາການສອບສວນເບື້ອງຕົ້ນ ພົບວ່າ ສາມະເນນ ເປັນຄົນແຂວງບໍ່ແກ້ວ ທີ່ຕິດຈອດກັບປະເທດໄທຍ ຖືກຊັກຊວນມາບວດຮຽນທີ່ໄທຍ ສ່ວນການເຂົ້າມາບວດຮຽນ ໃນປະເທດໄທຍໄດ້ແນວໃດນັ້ນ ຢູ່ລະຫວ່າງການສືບສວນ-ສອບສວນເພີ່ມຕື່ມ ເຈົ້າໜ້າທີ່ຍັງບໍ່ສາມາດ ເປີດເຜີຍຣາຍລະອຽດໄດ້ ແລະຢືນຢັນຈະດໍາເນີນຄະດີ ເຈົ້າອາວາດຕາມກົດໝາຍ.

ກ່ຽວກັບເຣື່ອນີ້ ວິທຍຸເອເຊັຽເສຣີ ໄດ້ຕິດຕໍ່ໄປຍັງ ອົງການພຸທສາສນາສັມພັນລາວ ເພື່ອຈະສອບຖາມຂໍ້ມູນ ເຖິງແນວທາງໃນການຊ່ອຍເຫຼືອ ສາມະເນນດັ່ງກ່າວ ແຕ່ຍັງບໍ່ສາມາດຕິດຕໍ່ໄດ້.

ຂະນະທີ່ ພຣະອາຈານໃນວັດແຫ່ງນຶ່ງ ໃນນະຄອນຫຼວງວຽງຈັນ ກ່າວເຖິງເຣື່ອງດັ່ງກ່າວນີ້ວ່າ ເປັນເຣື່ອງທີ່ສະເທືອນໃຈຫຼາຍ ເຊິ່ງເປັນເຣື່ອງທີ່ບໍ່ໜ້າຈະເກີດຂຶ້ນກັບສາມະເນນ ແລະບໍ່ໜ້າຈະເຮັດກັນໄດ້ແນ່ນອນວ່າ ຕາມວິໄນຂອງພຣະສົງແລ້ວ ເຈົ້າອາວາດຜູ້ກະທໍາຜິດດັ່ງກ່າວ ຖືວ່າ ຜິດວິໄນຂອງສົງຢ່າງຮ້າຍແຮງ ຕ້ອງໄດ້ອອກຈາກການເປັນພຣະສົງ ເຊິ່ງເຣື່ອງນີ້ ກໍເປັນເຣື່ອງທີ່ທາງພຣະສົງ ສາຍປົກຄອງ ຂອງເຂດທີ່ຮັບຜິດຊອບນັ້ນ ແລະເຈົ້າໜ້າທີ່ເຂດປົກຄອງເມືອງ ແຂວງດັ່ງກ່າວ ຈັດການດໍາເນີນການ ໃຫ້ເໝາະສົມຕາມກົດໝາຍ ສ່ວນເຣື່ອງການດໍາເນີນຄະດີ ກໍຂຶ້ນຢູ່ກັບຍາດພີ່ນ້ອງ ຂອງສາມະເນນ ດໍາເນີນຕໍ່ແນວໃດ.

“ໂອ້ ມັນກະເປັນ ປາຣາສຶກສາແລ້ວ ອາດຈາກຄວາມເປັນພຣະຫັ້ນແຫຼ້ວ ກະຮູ້ສຶກແບບສະເທືອນໃຈຫັ້ນແຫຼະ ກໍໜ້າຈະບໍ່ເຮັດກັນ ແບບນີ້ຫັ້ນແຫຼະ ຖ້າມັນເກີດຂຶ້ນແລ້ວ ກໍມີແຕ່ມອບໃຫ້ທາງເຈົ້າໜ້າທີ່ ຄຣູບາອາຈານ ທາງພຣະສາຍປົກຄອງ ທາງເຂດທີ່ເພິ່ນຮັບຜິດຊອບຫັ້ນ ເພິ່ນຈະເຮັດແນວໃດ ກໍສຸດແລ້ວແຕ່ເພິ່ນ ແລ້ວບາດນີ້ ເວົ້າເຣື່ອງຄະດີຄວາມ ເວົ້າເຣື່ອງສາມະເນນ ກໍສຸດແລ້ວແຕ່ຍາດຕິພີ່ນ້ອງ ເພິ່ນຈະວ່າແນວໃດຕໍ່.”

ຂະນະດຽວກັນ ຊາວລາວທ່ານນຶ່ງ ກໍກ່າວວ່າ ພາຍຫຼັງໄດ້ຍິນຂ່າວ ກ່ຽວກັບເຣື່ອງນີ້ ກໍຮູ້ສຶກສົງສານສາມະເນນດັ່ງກ່າວ ແລະເສັຍໃຈ ທີ່ເກີດເຫດການດັ່ງກ່າວ ທັ້ງໆທີ່ອົດສາໄປບວດຮຽນ ໃນປະເທດໄທຍ ຫາຄວາມຮູ້ ແຕ່ກັບຕ້ອງເຈິະເຫດການເຊັ່ນນີ້ ເຊິ່ງກໍຢາກໃຫ້ເຈົ້າໜ້າທີ່ຕໍາຣວດ ຊ່ອຍເຫຼືອສາມະເນນ ແລະດໍາເນີນຄະດີ ກັບເຈົ້າອາວາດຄົນດັ່ງກ່າວ ໃຫ້ເຖິງທີ່ສຸດ ເພາະເປັນເຖິງພຣະສົງ ແຕ່ກັບເຮັດຜິດວິໄນຮ້າຍແຮງ.

“ຄັນຖ້າວ່າ ມັນລ່ວງລະເມີດທາງເພດ ແລ້ວມັນກໍບໍ່ເປັນພຣະແລ້ວ ກະເສັຍໃຈນໍາ ສົງສານສາມະເນນ ເຂົາເຈົ້າກະທັງບວດ ທັງໄປຮຽນເອົາຄວາມຮູ້້ເນາະ ແລ້ວໄປເປັນແນວນັ້ນ ຊີ້ມັນກະບໍ່ຄັກແລ້ວ ຢາກໃຫ້ຊ່ວຍເຫຼືອກັນແຫຼ້ວເນາະ.”

ພ້ອມດຽວກັນນີ້ ຊາວລາວອີກທ່ານນຶ່ງ ກໍກ່າວວ່າ ຮູ້ສຶກເສັຍໃຈແທນສາມະເນນ ແລະຖືວ່າ ເປັນເຣື່ອງທີ່ຮ້າຍແຮງຫຼາຍ ສໍາລັບພຣະສົງ ທີ່ມີພຶດຕິກັມ ແລະການກະທໍາທີ່ບໍ່ເໝາະສົມ ຕໍ່ການເປັນພຣະສົງ ເຈົ້າໜ້າທີ່ ຄວນລົງໂທດໃຫ້ຢ່າງໜັກ ໃຫ້ເຖິງຂັ້ນຂັງຄຸກຕາມກົດໝາຍ.

“ໂອ້ກະເສັຍໃຈ ມາເຮັດແບບນີ້ນ່າ ຜິດຫັ້ນແຫຼ້ວ ຕໍ່ລະບຽບພຣະສົງນ່າ ກະທໍາຜິດແບບນີ້ ກໍເວົ້າເຣື່ອງບ້ວງກົດໝາຍ ກໍໄດ້ຈໍາຄຸກພຸ້ນແຫຼ້ວເນາະ. ເອົາເພິ່ນໄປດໍາເນີນຄະດີຫັ້ນແຫຼະ ຕາມລະບຽບກົດໝາຍ ຂອງບ້ານເມືອງຫັ້ນແຫຼະ.”

ສໍາລັບເຣື່ອງດັ່ງກ່າວນີ້ ສືບເນື່ອງ ໃນວັນທີ 10 ຕຸລາ 2023 ຜ່ານມາ ທ້າວ ຕາວັນສາຍ ອາຍຸ 20 ປີ ເຊິ່ງເປັນຄົນງານລາວ ເຂົ້າມາເຮັດວຽກໃນໄທຍ ແບບຖືກກົດໝາຍ ມີສະຖານະເປັນອ້າຍ ຂອງສາມະເນນລາວດັ່ງກ່າວ ໄດ້ໄປແຈ້ງຄວາມຕໍ່ຕໍາຣວດ ເມືອງແມ່ຣິມ ແຂວງຊຽງໃໝ່ ວ່າ ສາມະເນນຜູ້ເປັນນ້ອງຊາຍ ຖືກເຈົ້າອາວາດວັດແຫ່ງນຶ່ງ ໃນແຂວງຊຽງຮາຍ ທີ່ສາມະເນນຜູ້ນ້ອງໄປບວດຮຽນຢູ່ນັ້ນ ລ່ວງລະເມີດທາງເພດ ລວມເຖິງ ກັງຂັງໜ່ວງໜ່ຽວ ແລະທໍາຮ້າຍຮ່າງກາຍ.

ໂດຍສາມະເນນ ຜູ້ເປັນນ້ອງຊາຍ ເປັນຄົນເວົ້າເຣື່ອງຕ່າງໆ ໃຫ້ຜູ້ເປັນອ້າຍຟັງທຸກຢ່າງ ຜູ້ເປັນອ້າຍ ຈຶ່ງຢາກພານ້ອງຊາຍກັບບ້ານ ແລະຢາກດໍາເນີນຄະດີ ຕໍ່ເຈົ້າອາວາດດັ່ງກ່າວ ຈຶ່ງນໍາຫຼັກຖານເປັນຄລິບວິດິໂອ້ ຕອນທີ່ ເຈົ້າອາວາດດັ່ງກ່າວ ຖືກປ໋ອງເບັຍ ເຊິ່ງກໍຄາດວ່າ ດື່ມເບັຍນໍາດ້ວຍ ແລະມີພາບສາມະເນນ ຜູ້ເປັນນ້ອງຊາຍຖືກຕີ ມີບາດແຜທີ່ຫຼັງ ແລະນອກຈາກນີ້ ຍັງມີສາມະເນນຜູ້ເປັນຫຼານອີກ 1 ຄົນ ກໍຖືກລະເມີດທາງເພດ ແລະຖືກະທໍາເຊັ່ນກັນ.

ຕໍ່ມາ ຕໍາຣວດແມ່ຣິມ ພ້ອມກັບເຈົ້າໜ້າທີ່ທີ່ກ່ຽວຂ້ອງ ແລະຊາວບ້ານ ໄດ້ເດີນທາງມໄປວັດແຫ່ງນັ້ນ ໃນແຂວງຊຽງຮາຍ ເພື່ອຈະໄປໄລ່ເຈົ້າອາວາດອອກ ແຕ່ເຈົ້າອາວາດ ບໍ່ຍອມຮັບຜິດ ແລະບໍ່ໃຫ້ກວດສອບຫ້ອງພັກ ແຕ່ຊາວບ້ານ ບໍ່ຟັງສຽງເຈົ້າອາວາດ ພາກັນບຸກເຂົ້າໄປກວດຫ້ອງພັກຂອງເຈົ້າອາວາດ ປາກົດວ່າ ພົບຢາປຸກເຊັກ, ຖົງຢາງອານາມັຍ, ອະວັຍເພດຍິງປອມ ແລະເບັຍກະປ໋ອງ ຢູ່ໃນຕູ້ເຢັນ ເຈົ້າໜ້າທີ່ຕໍາຣວດ ຈຶ່ງດໍາເນີນການຈັບ ເຈົ້າອາວາດໄປສອບປາກຄໍາ ຢູ່ສະຖານີຕໍາຣວດແມ່ຣິມ ແຂວງຊຽງໃໝ່ ແລະໄດ້ສົ່ງສາມະເນນດັ່ງກ່າວ ໄປກວດຮ່າງກາຍທີ່ໂຮງໝໍ ເພື່ອເປັນຫຼັກຖານໃນການດໍາເນີນຄະດີຕາມກົດໝາຍ.

ຢ່າງໃດກໍຕາມ ເຈົ້າອາວາດວັດດັ່ງກ່າວ ໃນແຂວງຊຽງຮາຍນີ້ ກໍຈະຖືກດໍາເນີນຄະດີຕາມກົດໝາຍ ແລະຖືກປົດອອກຈາກ ການເປັນພຣະສົງ ແລະຖືກປົດອອກຈາກ ການເປັນເຈົ້າອາວາດ ເພາະເຮັດຜິດວິນັຍຮ້າຍແຮງ.