ສໍາຣວດ ຄວາມໝັ້ນຄົງ ແລະ ເສຖກິດ ສະຫະຣັຖ-ຈີນ

ວຽງໄຊ ຂໍສເນີການ ໃຫ້ການຂອງ ຜູ້ສ້ຽວຊານ ກ່ຽວກັບ ເອເຊັຍຕາເວັນອອກ ສ່ຽງໃຕ້ ຕໍ່ກັມມາທິການ ການສໍາຣວດ ຄວາມໝັ້ນຄົງ ແລະ ເສຖກິດ ສາຫະຣັຖ-ຈີນ ຊຶ່ງເປັນບັນຫາ ທີ່ກ່ຽວພັນເຖິງ ສປປລາວ ບໍ່ຫລາຍກໍໜ້ອຍ... ເຊີນທ່ານເປີດຟັງໄດ້ ໂດຍກົດ(Click) ຢູ່ບ່ອນທີ່ຂຽນວ່າ "ດາວໂລ້ດ"
ວຽງໄຊ
2010-02-23
ອີແມວລ໌
ຄໍາເຫັນ
Share
ພິມ

ເມື່ອສັປດາ ຜ່ານມາ ຂ້າພະເຈົ້າ ໄດ້ສເນີ ຄວາມເຫັນຂອງ ທາງການ ສະຫະຣັຖ ກ່ຽວກັບບົດບາດ ຂອງຈີນ ໃນເອເຊັຍ ຕາເວັນອອກສ່ຽງໃຕ້ ໃນໂອກາດ ການໃຫ້ການ ແກ່ກັມມາທິການ ຄວາມໝັ້ນຄົງ ແລະ ເສຖກິດ ສະຫະຣັຖ-ຈີນ ຊຶ່ງມີໜ້າທີ່ ໃຫ້ຄຳແນະນຳ ແກ່ຣັຖສະພາ ສະຫະຣັຖ ກ່ຽວກັບ ຜົນສະທ້ອນ ຂອງຄວາມສຳພັນ ສະຫະຣັຖ-ຈີນ ຕໍ່ຄວາມໝັ້ນຄົງ ຂອງສະຫະຣັຖ.

ມື້ນີ້ ຂ້າພະເຈົ້າ ຈະນຳເອົາ ຈຸດສຳຄັນ ຂອງການວິຈັຍ ຂອງ ສາສດາຈານ Catharin Dalpino ກ່ຽວກັບເຈຕນາ ຂອງຈີນມາສເນີ ຊຶ່ງສ່ວນຫລາຍ ກ່ຽວກັບ ປະເທດ ລາວ ແລະ ປະເທດ ກຳພູຊາ.

Madame Dalpino ເປັນຜູ້ສ້ຽວຊານ ກ່ຽວກັບ ເອເຊັຍຕາເວັນ ອອກສ່ຽງໃຕ້ ມີຫລາຍໜ້າທີ່ ເປັນຕົ້ນ ຜູ້ອຳນວຍການ ໄທ ສຶກສາຢູ່ທີ່ ມະຫາວິທຍາລັຍ Georgetown ເຄີຍດຳຣົງ ຕຳແໜ່ງ ຮອງຣັຖມົນຕຣີ ການຕ່າງປະເທດ ສະຫະຣັຖ ຝ່າຍສິດທິມະນຸດ.

Madame Dalpino ເວົ້າເຖິງ ເຫດຜົນສຳຄັນ 2 ປະການ ທີ່ເຣັດໃຫ້ຈີນ ເອົາໃຈໃສ່ນຳ ເອເຊັຍ ຕາເວັນອອກສ່ຽງໃຕ້ ເປັນພິເສດ.

ຄືນຶ່ງ: ການພັທນາ ເສຖກິດຂອງ ແຂວງຢູນານ ທີ່ຖືວ່າເປັນນຶ່ງ ໃນຈຳນວນແຂວງ ທີ່ລ້າຫລັງທີ່ສຸດ ແລະສອງ ກໍຄືຈີນ ຕ້ອງການຮັກສາ ຄວາມໝັ້ນຄົງ ຕາມເຂດ ຊາຍແດນ ທີ່ຕດກັບບາງ ປະເທດ ໃນເອເຊັຍ ຕາເວັນອອກສ່ຽງໃຕ້ ແລະ ທ່ານຍັງໃຫ້ ເຫດຜົນວ່າ ເປັນຫຍັງ ຈີນ ຈຶ່ງສາມາດ ມີບົດບາດ ສຳຄັນ ເກືອບວ່າໃນ ທຸກດ້ານ ໃນຂົງເຂດ ດັ່ງກ່າວ:

“ປັດໃຈສຳຄັນ ທີ່ເຮັດໃຫ້ ຈີນ ສາມາດເຣັດໄດ້ ກໍຄືການທີ່ ສະຫະຣັຖ ບໍ່ຄ່ອຍສົນໃຈ ນຳອານຸພາກນີ້ ຫລາຍປານໃດ ໃນຫລາຍປີ ຜ່ານມາ”.

ທ່ານຍັງເບິ່ງເຫດ ຈຸດປະສົງ ໃຫຍ່ 4 ຢ່າງຂອງຈີນ ໃນເອເຊັຍ ຕາເວັນອອກສ່ຽງໃຕ້ ອັນໄດ້ແກ່
1. ການພັທນາ ໂຄງສ້າງພື້ນຖານ ເພື່ອອຳນວຍ ຄວາມສດວກ ແລະ ຂຍາຍການຄ້າ ແລະ ໃນເວລາດຽວກັນ ກໍເສີມສ້າງ ຄວາມໝັ້ນຄົງ ຂອງຕົນ. ຈີນໄດ້ນຳ ການປ່ຽນແປງ ຢ່າງຫລວງຫລາຍ ມາສູ່ຂົງເຂດ ດ້ວຍໂຄງການ ພັທນາຕ່າງໆ ເຊັ່ນການພັທນາ ແມ່ນໍ້າຂອງ ການສ້າງ ຖນົນຫົນທາງ ແລະ ການຫາແຫລ່ງ ພລັງງານ ກັບພະມ້າ ເປັນຕົ້ນ.

2. ເພີ້ມບົດບາດ ຂອງຈີນ ຫລາຍຂຶ້ນ ຊຶ່ງກໍເທົ່າກັບ ຄວບຄຸມ ເຂດທະເລຈີນໃຕ້ ຊຶ່ງເຮັດໃຫ້ ວຽດນາມ ເປັນຜູ້ໄດ້ຮັບ ຄວາມເດືອດຮ້ອນ ຫລາຍກວ່າໝູ່ ໃນປັດຈຸບັນ.

3. ສວຍໂອກາດ ທີ່ຈີນກຳລັງ ໄດ້ປຽບ ໃນທາງການຄ້າ ຊຶ່ງຫລາຍປະເທດ ກໍປະຕິບັດກັນ:

“ເອເຊັຍ ຕາເວັນອອກສ່ຽງໃຕ້ ມີຊັພຍາກອນ ທັມມະຊາຕ ທີ່ສົ່ງອອກຂາຍ ໃຫ້ຈີນ...ຕັງແຕ່ ກ໊າສ ທັມມະຊາຕ ໄປເຖິງໄມ້ທ່ອນ... ແລະກໍເປັນ ຕລາດຮອງຮັບ ສິນຄ້າ ອຸດສາຫະກັມ ເບົາຂອງຈີນ” 

ສິນຄ້າ ຣາຄາຖືກ ທີ່ຫລັ່ງໃຫລ ເຂົ້າໃນຂົງເຂດ ໂດຍສະເພາະ ປະເທດ ທີ່ທຸກຍາກ ເຊັ່ນລາວ ກຳພູຊາ ແລະພະມ້າ ອັນເຮັດໃຫ້ຈີນ ມີອັນ ທີ່ເອີ້ນວ່າ ‘Soft Power’ ຫລື ອຳນາດນຸ້ມນວນ. ສິນຄ້າດັ່ງກ່າວ ໝາຍເຖິງ ໂທຣະສັບ ມືຖື ຣົຖຖີບ ຈານດາວທຽມ ເຮັດໃຫ້ ປະຊາຊົນ ຜູ້ທຸກຍາກ ມີໂອກາດ ໄດ້ໃຊ້ ຂອງຊຶ່ງຕາມ ປົກກະຕິແລ້ວ ມີແຕ່ຄົນ ຂັ້ນກາງ ໃນສັງຄົມ ເທົ່ານັ້ນ ຈະຊື້ໃຊ້ໄດ້.

4. ເປົ້າໝາຍສຳຄັນ ທີ່ສຸດ ອີກຢ່າງນຶ່ງ:

“ຈີນໃຊ້ ເອເຊັຍ ຕາເວັນອອກສ່ຽງໃຕ້ ເປັນບ່ອນ ຣະບາຍ ຄວາມກົດດັນ ຊຶ່ງມາຈາກ ຄວາມອັ່ງອໍ ຂອງປະຊາກອນ ໃນປະເທດຕົນ”

ຊຶ່ງມີທັງການ ໂຍກຍ້າຍ ເຂົ້າໄປຢ່າງ ຜິດກົດໝາຍ ແຕ່ຫລັງໆມານີ້ ຈີນ ໃຊ້ເງື່ອນໄຂ ການຮວມ ຄົນງານຈີນ ເຂົ້າໃນໂຄງການ ໂຄງສ້າງພື້ນຖານ ຫລື ໂຄງການ     ການຄ້າ. ດຽວນີ້ຢູ່ ສປປລາວ ແລະ ກຳພູຊາ ມີຄົນງານຈີນ ປະມານ 20-30 ພັນຄົນ ພ້ອມຄອບຄົວ ໄປກັບໂຄງການ ໂຄງສ້າງພື້ນຖານ ໂດຍທີ່ ບໍ່ຈຳເປັນ ຂໍວີຊາ ເປັນສ່ວນຫລາຍ ຊຶ່ງເປັນວິທີນຶ່ງ ຊຶ່ງຈີນໃຊ້ ເພື່ອສົ່ງຄົນ ອອກນອກປະເທດ. ເຫດການ ເປັນໄປໄດ້ ຍ້ອນຄວາມທຸກຍາກ ໃນລາວ ແລະ ກຳພູຊາ ຊຶ່ງຈີນກໍໄດ້ ໃຫ້ການ ຊ່ວຍເຫລືອແບບ 2 ຝ່າຍເຊັ່ນໃນ ສັນຍາຕົກລົງ ການຄ້າເສຣີ ຣະຫວ່າງ ອາຊຽນ-ຈີນ FTA ມີອັນທີ່ ເອີ້ນວ່າ “Early Harvest Fund” ເພື່ອຊ່ວຍ ປະເທດທີ່ຈະ ບໍ່ໄດ້ຮັບ ຜົນປະໂຫຍດຈາກ FTA ໃນທັນທີ ທັນໃດໂລດ. ນອກຈາກນັ້ນ ກໍມີຊາວຈີນ ທີ່ຢູ່ໃນ ປະເທດ ເອເຊັຍຕາເວັນອອກ ມາກ່ອນແລ້ວ ໂດຍສະເພາະ ໃນໄທ ພາໃຫ້ເກີດ ມີການປະທະ ຣະຫວ່າງຄົນ ເຊື້ອຊາຕຕ່າງກັນ ດັ່ງທີ່ເກີດຂຶ້ນ ໃນອິນໂດເນເຊັຍ ເມື່ອປີ 1998 ເປັນຕົວຢ່າງ.

ສະຫະຣັຖ ເມີນເສີຍຕໍ່ ແຜ່ນດິນໃຫຍ່ ຂອງເອເຊັຍ ຕາເວັນອອກສ່ຽງໃຕ້ ໃນທົສວັດ ຜ່ານມາ ແລະ ຫາກໍກັບມາ ສົນໃຈ ປະເທດໃກ້ ທະເລໃນຂົງເຂດ ເມື່ອມີການ ຕໍ່ຕ້ານ ການກໍ່ການຮ້າຍ ແລະ ເພື່ອຮັກສາໄວ້ ຊຶ່ງຄວາມໝັ້ນຄົງ ຢູ່ຊ່ອງແຄບ ມາລາກ້າ. ການທີ່ ສະຫະຣັຖ ໄຫ້ຄວາມສຳຄັນ ແກ່ບັນຫາ ສິດທິມະນຸດ ໃນນະໂຍບາຍ ຕ່າງປະເທດ ຂອງຕົນນັ້ນ ເປັນວິທີການ ທີ່ແຕກຕ່າງ ຈາກຈີນ ຊຶ່ງບໍ່ສົນໃຈ ວ່າປະເທດນັ້ນ ຈະປົກຄອງ ປະເທດແບບໃດ ປະຊາຊົນ ມີເສຣີພາບ ຫລືບໍ່. ແມ່ນໃນເວລາ ທີ່ສະຫະຣັຖ ແລະ ປະເທດ ຕາເວັນຕົກອື່ນໆ ກົດດັນປະເທດ ໃນຂົງເຂດ ກ່ຽວກັບເຣື້ອງ ເສຣີພາບ ແລະ ສິດທິມະນຸດ ນັ້ນເອງ ທີ່ຈີນໄດ້ສ້າງ ອິດທິພົນ ຂອງຕົນຂຶ້ນມາ. ເປັນແຕ່ບຸນ ທີ່ແນວໂນ້ມນີ້ ໄດ້ປ່ຽນແປງໄປ ພ້ອມກັບ ຣັຖບານໃໝ່ ຂອງສະຫະຣັຖ ຊຶ່ງໄດ້ຮື້ຟື້ນ ຄວາມສຳພັນ ຄືນໃໝ່ ໃນຫລາຍໆດ້ານ ເຊັ່ນການລົງນາມ ໃນສັນຍາ ມິຕພາບ ຊຶ່ງໃຊ້ເວລາ ລໍຖ້າມາ ດົນນານ ໂຄງການກ່ຽວກັບ ບັນດາປະເທດ ໃນເຂດລຸ່ມ ແມ່ນໍ້າຂອງ ແລະ ການຂຍາຍ ການຄ້າກັບລາວ ເປັນຕົ້ນ.


Madame Dalpino ມ້ວນທ້າຍ ການໃຫ້ການ ດ້ວຍຂໍ້ສເນີ 5 ຢ່່າງ.

- ໃຫ້ປະທານາທິບໍດີ ສະຫະຣັຖ ໄປເຂົ້າຮ່ວມ ກອງປະຊຸມ ສຸດຍອດ ປະຈຳປີ ຂອງອາຊຽນ ຊຶ່ງຈະເປັນ ໂອກາດ ໃຫ້ທ່ານໄດ້ ໄປຂົງເຂດ ປີລະເທື່ອ ເປັນຢ່າງໜ້ອຍ.
- ໃຫ້ຄວາມໝັ້ນໃຈ ວ່າ ສະຫະຣັຖ ຈະຢູ່ໃນເຂດ ທະເລຈີນໃຕ້ ຕໍ່ໄປ ແລະຄວນເຮັດເປັນ ລາຍລັກອັກສອນ ເປັນທາງການ.
- ກົດດັນໃຫ້ຈີນ ແລະ ພະມ້າ ເຂົ້າເປັນ ສະມາຊິກ ກັມມາທິການ ແມ່ນໍ້າຂອງ ເພາະຕາບໃດທີ່ 2 ປະເທດນີ້ ບໍ່ຍອມເຂົ້າ ກໍຈະເປັນ ແຫລ່ງບັນຫາ ແທນທີ່ຈະຊ່ວຍ         ແກ້ໄຂບັນຫາ.
-  ແກ້ໄຂຄວາມ ຫ່າງເຫີນ ໃນຄວາມສຳພັນ ຣະຫວ່າງ ສະຫະຣັຖ ແລະ ໄທ.
- ອານຸມັດ ສິດທິການຄ້າ ພິເສດ ແກ່ປະເທດທີ່ ພັທນາ ໜ້ອຍກວ່າໝູ່ ໃນຂົງເຂດ ໂດຍສະເພາະລາວ ແລະ ກຳພູຊາ ອັນເປັນເຣື້ອງ ທີ່ກຳລັງ ພິຈາຣະນາ ຢູ່ໃນປັດຈຸບັນ
   ຫລັງຈາກ ທີ່ການໃຫ້ການ ສິ້ນສຸດລົງແລ້ວ ຄນະກັມມະການ ກໍໍໄດ້ສອບຖາມ ເອົາຂໍ້ມູນ ເພີ້ມເຕີມ ຈາກຜູ້ທີ່ໄດ້ ເຊີນມາ ອາພິປຮາຍ ໃນຄັງນັ້ນ ຢ່າງລະອຽດ     ເພືອນຳ  ໄປປະກອບ ຣາຍງານ ປະຈຳປີ ຊຶ່ງຄນະ ກັມມະການ ຈະສເນີຕໍ່ ຣັຖສະພາ ສະຫະຣັຖ ຕໍ່ໄປ.

ເຕັມຫນ້າ