ນາຍົກຣັຖມົນຕຣີ ວຽດນາມ ຖືກຟ້ອງ

ທ່ານ ວູ່ ກ່າວກັບນັກຂ່າວ AFP ເມື່ອ ວັນເສົາ ທີ່ຜ່ານມາວ່າ ທ່ານໄດ້ຍື່ນຟ້ອງ ນາຍົກ ຣັຖມົນຕຣີ ຫງຽນຕັ່ນຈຸງ ຂື້ນສານສູງສຸດ ຂອງວຽດນາມ ໂດຍອີງຕາມ ຣັຖທັມມະນູນ ຂອງ ສາທາຣະນະຣັດ ສັງຄົມນິຍົມ ວຽດນາມ ມາດຕຣາ ທີ່ປົກປັກຮັກສາ ສະພາບແວດລ້ອມ.

ເມື່ອປະມານ ສອງປີກ່ອນ ຣັຖບານວຽດນາມ ໄດ້ຕົກລົງໃຫ້ ບໍຣິສັດ ຂອງຈີນຂຸດຄົ້ນ ບໍ່ບອກໄຊ ໃນພາກກາງຂອງ ວຽດນາມ ຊຶ່ງເປັນດິນແດນ ຕໍ່ຈາກພາກໃຕ້ ຂອງລາວ ແລະຢູ່ເຂດນີ້ຂອງ ລາວ ກໍມີບໍ່ ບອກໄຊ ໃຫຍ່ທີ່ສຸດແຫ່ງ ນຶ່ງຂອງໂລກ.

ຢູ່ວຽດນາມ ອົງການ ພິທັກຮັກສາ ສະພາບແວດລ້ອມ ແລະຊາວວຽດນາມ ຫລາຍຄົນບໍ່ເຫັນດີເຫັນພ້ອມ ກັບການຂຸດຄົ້ນ ບໍ່ບອກໄຊ ດັ່ງກ່າວ ຜູ້ຂັດຄ້ານທີ່ ສຳຄັນກໍແມ່ນ ນາຍພົນ Vo Ngeyen Giap ທີ່ໄດ້ຂຽນ ຈົດໝາຍເປີດຊອງ ຂື້ນໄປເຖິງ ນາຍົກຣັຖມົນຕຣີ ຫງຽນຕັ່ນຈຸ່ງ ວ່າການຂຸດຄົ້ນ ບໍ່ບອກໄຊ ທີ່ພາກກາງ ເປັນການລົງທຶນ ທີ່ບໍ່ຄຸ້ມຄ່າ ແລະຈະທຳຣາຍ ສະພາບແວດລ້ອມ ແລະສັງຄົມ ແຮງເກີນໄປ.

ເມື່ອວັນທີ່11 ເດືອນມິຖຸນາ ທີ່ຜ່ານມາ ທ່ານ ວູ ຜູ້ເປັນ ທະນາຍຄວາມ ໄດ້ຍື່ນຟ້ອງ ນາຍົກ ຣັຖມົນຕຣີ ຫງຽນຕັ່ນຈຸງ ຂື້ນສານຕ່ຳ ແຕ່ສານນັ້ນ ຕັດສິນວ່າ ທ່ານ ວູ ບໍ່ມີເຫດຜົນ ແລະ ພິຍານຫລັກຖານ ພຽງພໍ ທີ່ຈະຢືນຢັນວ່າ ການຂຸດຄົ້ນບໍ່ແຮ່ ດັ່ງກ່າວ ຈະທຳຣາຍ ສະພາບແວດລ້ອມ ຢ່າງແທ້ຈິງ.

ວຽດນາມ ເປັນປະເທດ ຄອມມຸຍນິສ ປົກຄອງໂດຍພັກດຽວ ພັກແລະຣັຖບານ ມີສິດມີອຳນາດເດັດຂາດ ຢາກເຮັດຫຍັງກໍໄດ້ ເຊັ່ນຢາກຂຸດຄົ້ນບໍ່ແຮ່ ເຖິງວ່າ ການຂຸດຄົ້ນ ນັ້ນຈະທຳຣາຍ ສະພາບແວດລ້ອມ ກໍຕາມ.