ການປະທະກັນໃນພະມ້າ ໃກ້ຊາຍແດນໄທ

ກອງກໍາລັງ ຝ່າຍຕໍ່ຕ້ານ ໄດ້ປະທະກັບ ທະຫານ ຝ່າຍຣັຖບານ ພະມ້າ ໃນເມືອງແຫ່ງນຶ່ງ ທາງພາກ ຕາເວັນອອກ ຂອງພະມ້າ ໃນມື້ວັນຈັນ ນີ້, ນຶ່ງວັນ ຫລັງຈາກ ການເລືອກຕັ້ງ ຄັ້ງທໍາອິດ ຂອງປະເທດ ໃນຮອບ 20 ປີ, ເປັນເຫດໃຫ້ 6 ຄົນເສັຍຊີວິດ, 3 ຄົນໄດ້ຮັບ ບາດເຈັບ ແລະ ປະຊາຊົນ ຫລາຍຮ້ອຍຄົນ ຕ້ອງໄດ້ຫລົບໜີ ເຂົ້າໄປ ເຂດຊາຍແດນ ຂອງໄທ, ອີງຕາມ ຄໍາເວົ້າ ຂອງເຈົ້າໜ້າທີ່ ໃນມື້ວັນຈັນນີ້.

ແຫລ່ງຂ່າວ ຂອງຣັຖບານ ພະມ້າ ຣາຍງານ ວ່າ ກໍາລັງ ຂອງພວກຕໍ່ຕ້ານ ໄດ້ຍິງປືນໃຫຍ່ ເຂົ້າໃສ່ ເຂດເມືອງ ມີຢາວະດີ ໃນຣັຖ ກະຣຽງ, ເຮັດໃຫ້ 2 ຄົນ ໄດ້ຮັບບາດເຈັບ, ແຕ່ວ່າ ກໍາລັງ ຂອງຝ່າຍ ຣັຖບານ ບໍ່ໄດ້ຕອບໂຕ້ ໃນທັນທີ. ເຈົ້າໜ້າທີ່ ທະຫານໄທ ໃນເຂດຊາຍແດນ ເວົ້າວ່າ ມີຈະຣວດ ລູກນຶ່ງ ຕົກໃສ່ ເຂດຊາຍແດນ ຂອງໄທ ໃນແຂວງແມ່ສອດ.

ການປະທະກັນ ໄດ້ມິດໄປ ແຕ່ວ່າການ ປະຕິບັດງານ ທາງການທະຫານ ໃນເຂດດັ່ງກ່າວ ຍັງສືບຕໍ່ ໃນເຂດ ອ້ອມຮອບ ຂອງເມືອງ ມີຢາວະດີ. ທ່ານ ກິດຕິສັກ ໂທມົນສັກ, ຫົວໜ້າ ຕໍາຣວດ ເມືອງ ແມ່ສອດ ເວົ້າວ່າ ມີປະຊາຊົນ ພະມ້າ ຈໍານວນ 1,000 ຄົນ ຫລົບໜີ ເຂົ້າໄປ ໃນປະເທດໄທ. 

ການຕໍ່ສູ້ກັນ ເກີດຂຶ້ນ ພາຍຫລັງ ການການເລືອກຕັ້ງ ນຶ່ງມື້, ຊຶ່ງພະມ້າ ໄດ້ເຣີ້ມນັບ ຄະແນນສຽງ ການເລືອກຕັ້ງ ໃນມື້ວັນຈັນ ນີ້, ໃນຂນະທີ່ ຣັຖບານ ປະເທດ ຕາເວັນຕົກ ຕໍານິ ຣັຖບານ ທະຫານ ໃນການຈັດຕັ້ງ ການເລືອກຕ້ອງ ທີ່ຣັຖບານ ສນັບສນູນ ພັກ ທີ່ຄິດວ່າ ຈະສາມາດ ໄດ້ຮັບໄຊຊະນະ ຢ່າງງ່າຍດາຍ.