ກັມມາທິການ ແມ່ນໍ້າຂອງ ຂໍຂໍ້ມູນເຂື່ອນຈາກ ສປຈີນ

ສປຈີນ ຍັງບໍ່ທັນ ໃຫ້ຂໍ້ມູນ ກ່ຽວກັບເຂື່ອນ ໄຟຟ້າ ກັ້ນແມ່ນໍ້າຂອງ ແກ່ຄະນະ ກັມມາທິການ ແມ່ນໍ້າຂອງເທື່ອ.
ໂພໄຊສວັດ
2010-02-24
ອີແມວລ໌
ຄໍາເຫັນ
Share
ພິມ

ເມື່ອວັນທີ 22 ກຸມພາ 2010 ຜ່ານມາທ່ານ ສັກສິດ ຕຣີເດດ ຫົວໜ້າຫ້ອງການ ກະຊວງ ຊັພຍາກອນ ທັມມະຊາດ ແລະ ສິ່ງແວດລ້ອມ ຂອງໄທ ໄດ້ໃຫ້ສຳພາດ ຕໍ່ສື່ມວນຊົນ ເຖິງ ສະຖານະການນ້ຳ ໃນແມ່ນ້ຳຂອງ ທີ່ບົກແຫ້ງ ໄວກວ່າປົກກະຕິ ຊຶ່ງຫລາຍຝ່າຍ ວິພາກວິຈານວ່າ ສາເຫດ ເກີດມາຈາກທີ່ ສປຈີນ ປິດເຂື່ອນທີ່ຢູ່ ໃນບໍລິເວນ ຕົ້ນນ້ຳ.

ບັນຫາດັ່ງກ່າວ ເປັນເຣື້ອງ ລະຫວ່າງຊາດ ສະນັ້ນທາງກະຊວງ ຈຶ່ງບໍ່ສາມາດ ເຂົ້າໄປແກ້ໄຂ ໃນເບື້ອງຕົ້ນໄດ້. ດັ່ງນັ້ນ ຈຳເປັນຕ້ອງ ນຳເອົາເຣື້ອງນີ້ ເຂົ້າໄປໃຫ້ ຄະນະກັມມາທິການ ແມ່ນໍ້າຂອງ ຫລື MRC ຮັບໄປ ດໍາເນີນການ.

ທ່ານ ສັກສິດ ເວົ້າຕໍ່ໄປວ່າ ໃນຂະນະນີ້ ສຳນັກ ເລຂາທິການ ຂອງຄະນະ ກັມມາທິການ ແມ່ນໍ້າຂອງ ໄດ້ຕິດຕໍ່ຂໍ ຄວາມຮ່ວມມື ຈາກສປຈີນ ເພື່ອຂໍຂໍ້ມູນ ກ່ຽວກັບເຂື່ອນ ໄຟຟ້າກັ້ນແມ່ນ້ຳຂອງ ຂອງຈີນ ເພື່ອຈະນຳໄປ ປຶກສາຫາລື ໃນກອງປະຊຸມ ທີ່ຈະມີຂື້ນ ໃນຕົ້ນເດືອນ ເມສາ ທີ່ຈະມາເຖິງນີ້. ທ່ານເວົ້າຕໍ່ວ່າ ສຳລັບຄວາມ ເດືອດຮ້ອນຂອງ ຊາວບ້ານ ປະຊາຊົນ ຢູ່ໃນຂະນະນີ້ ທາງກະຊວງຈະ ຫາທາງແກ້ໄຂ ສະເພາະໜ້າກ່ອນ.

ນອກຈາກນີ້ ທ່ານ ກະເສມສັນ ຈິນນະວາໂສ ອະທິບໍດີກົມ ຊັພຍາກອນນ້ຳ ຂອງໄທ ກໍໄດ້ເວົ້າວ່າ ທ່ານຍອມຮັບວ່າ ບັນຫາດັ່ງກ່າວ ເປັນການຍາກ ທີ່ຈະແກ້ໄຂ ເພາະສປຈີນ ທີ່ຢູ່ຕົ້ນ ແມ່ນ້ຳຂອງ ມີເຂື່ອນຢູ່ ຫລາຍໆແຫ່ງ ບໍ່ໄດ້ເປັນ ສະມາຊິກຂອງ MRC ແລະ ບໍ່ໄດ້ເປີດເຜີຍ ຂໍ້ມູນໃດໆ ຕາມທີ່ໄດ້ຂໍໄປ.

ສຳລັບ ກອງປະຊຸມ ສຸດຍອດ MRC ທີ່ໄທ ເປັນເຈົ້າພາບ ຊຶ່ງຈະຈັດຂື້ນ ລະຫວ່າງ ວັນທີ 3 ຫາ 5 ເມສາ 2010 ກໍໄດ້ເຊີນ ນາຍົກຣັຖມົນຕຣີ ຂອງສປຈີນ ເຂົ້າຮ່ວມເພື່ອ ປຶກສາຫາລື ແຕ່ເຖິງ ປັດຈຸບັນນີ້ ກໍຍັງບໍ່ທັນໄດ້ ຮັບຄຳຕອບເທື່ອ.

ເຕັມຫນ້າ