ເອກກະສານບໍ່ຖືກຕ້ອງ ຄ່າຊົດເຊີຍມີບັນຫາ

ການທົດແທນເງິນ ສໍາລັບ ພື້ນທີ່ດິນ ໃຫ້ແກ່ຜູ້ໄດ້ ຮັບຜົນກະທົບ ຈາກໂຄງການ ພັທນາຕ່າງໆ ກໍ່ໃຫ້ເກີດ ບັນຫາ ຍ້ອນບໍ່ມີແຜນການ ຈັດສັນລ່ວງໜ້າ ແລະເອກກະສານ ທີ່ບໍ່ຖືກຕ້ອງ.
ໂພໄຊສວັດ
2010-06-24
ອີແມວລ໌
ຄໍາເຫັນ
Share
ພິມ

ການທົດແທນເງິນ ສໍາລັບພື້ນທີ່ດິນ ໃຫ້ແກ່ຜູ້ໄດ້ຮັບ ຜົນກະທົບ ຈາກໂຄງການ ພັທນາຕ່າງໆ ຂອງອົງການຄຸ້ມຄອງ ທີ່ດິນແຫ່ງຊາດ ນັ້ນມີບັນຫາ ເພາະບໍ່ມີການ ຈັດສັນ ລ່ວງໜ້າ ແລະ ໃນບາງພື້ນທີ່ ທາງຣັຖບານ ກໍບໍ່ສາມາດ ຈ່າຍເງິນຄ່າ ທົດແທນໃຫ້ໄດ້ ເນື່ອງຈາກວ່າ ປະຊາຊົນເຫລົ່ານັ້ນ ບໍ່ມີໃບຕາດິນ ທີ່ຖືກຕ້ອງຕາມ ກົດໝາຍ.

ນອກຈາກນັ້ນ ບັນຫາກໍມີຢູ່ ໃນບາງກໍຣະນີ ຄືບາງໂຄງການ ໄດ້ໄປກວມເອົາ ພື້ນທີ່ດິນ ທີ່ເປັນບ່ອນຢູ່ ອາສັຍຫລືບ່ອນ ຫາຢູ່ຫາກິນ ຂອງປະຊາຊົນ ໂດຍສະເພາະ ບ່ອນທີ່ໄດ້ອອກ ໃບຕາດິນໃຫ້ແລ້ວ ຊຶ່ງປະຊາຊົນ ໄດ້ບຸກເບີກແລ້ວ ຈຶ່ງກໍ່ໃຫ້ເກີດ ມີບັນຫາຂັດແຍ່ງ ລະຫວ່າງ ປະຊາຊົນກັບ ພາກຮັຖ ປະຊາຊົນກັບ ປະຊາຊົນ ແລະ ລະຫວ່າງ ປະຊາຊົນກັບ ບໍຣິສັດ ທີ່ທຳການພັທນາ. ດັ່ງທ່ານ ຄຳອ້ວນບຸຜາ ຣັຖມົນຕຣີ ປະຈຳສຳນັກ ນາຍົກຣັຖມົນຕຣີ ຫົວໜ້າອົງການ ຄຸ້ມຄອງທີ່ດິນ ແຫ່ງຊາດ ໄດ້ເວົ້າກ່ຽວກັບ ບັນຫານີ້ວ່າ:

"ການຊົດເຊີຍ ໃນບາງບ່ອນ ກໍບໍ່ເອກກະພາບກັນ ປະຊາຊົນບາງຄົນ ຂະເຈົ້າຮູ້ຢູ່ວ່າດິນ ຂອງຂະເຈົ້າ ນັ້ນບໍ່ຖືກຕ້ອງຕາມ ກົດໝາຍ ແຕ່ຮຽກຮ້ອງຣາຄາ ສູງຂື້ນ ເມື່ອເປັນແນວນັ້ນ ຣັຖກໍບໍ່ໄດ້ ພິຈາຣະນາຈ່າຍໃຫ້ ສະນັ້ນ ຢູ່ບ່ອນນີ້ມັນ ກໍຄ່ອຍເກີດມີ ການຮ້ອງທຸກ ມີການຟ້ອງຮ້ອງ ໄປໃນຫລາຍພາກສ່ວນ ຈຶ່ງເຮັດໃຫ້ສັງຄົມ ເຮົານີ້ສັບສົນ".

ສຳລັບການຟ້ອງຮ້ອງ ຂອງປະຊາຊົນ ບາງກໍຣະນີ ກໍບໍ່ຖືກຕາມ ຫລັກການທາງ ກົດໝາຍ ເພາະດິນບາງຕອນ ເປັນພື້ນທີ່ ຈັບຈອງນຳໃຊ້ ບໍ່ມີໃບຕາດິນ ເອກກະສານ ຢັ້ງຢືນກັມມະສິດ ທາງຮັຖບານ ຈຶ່ງບໍ່ສາມາດ ທົດແທນ ຄ່າເສັຍຫາຍໃຫ້ໄດ້.

ທ່ານຄຳອ້ວນ ໄດ້ເວົ້າສະຫລຸບວ່າ ການທົດແທນ ຄ່າເສັຍຫາຍ ທີ່ເກີດຂື້ນ ກ່ຽວກັນການ ໂອນພື້ນທີ່ດິນ ຂອງປະຊາຊົນ ຫລືອົງການ ໃດອົງການນຶ່ງ ເພື່ອສາທາຣະນະ ປະໂຫຍດນັ້ນ ທາງຣັຖບານໄດ້ ກະທຳໄປຢ່າງ ສົມເຫດສົມຜົນ ທີ່ສຸດ.

ເຕັມຫນ້າ