ເຈົ້າໜ້າທີ່ ອົງການ ສະຫະ ປະຊາຊາດ ຕ້ານຢາເສບຕິດ ແລະ ອາຊຍາກັມ ກ່າວເຖີງ ອຸປສັກ ໃນການຈັກກຸມ ກຸ່ມພໍ່ຄ້າ ຫລື ຜູ້ລັກລອບ ຂົນສົ່ງ ຢາເສບຕິດ ທີ່ຍັງເປັນ ບັນຫາ ໃນທຸກມື້ນີ້ ວ່າ:
“ກຸ່ມເປົ້າ ເປັນບອລລູນ ທີ່ວ່າ ກຳຈັດ ເຂຕໃດແລ້ວ ຈະອອກໄປ ເຂຕອື່ນ ອັນນີ້ ມັນເປັນ ລັກສະນະ Network ຂອງອາຊຍາກັມ ຂ້າມຊາຕ ທີ່ພໍ່ຄ້າ ຕ່າງໆ ເຂົາໃຊ້ ຜົນປະໂຍດ ຈາກຕົວນີ້ ຖ້າວ່າ ຄວບຄຸມເຄັ່ງຄັດ ມັນກໍຈະ ໄປເສັ້ນທາງ ອື່ນ ເພື່ອລຳລຽງ ຫລືວ່າ ສົ່ງໄປຕາມ ທີ່ລູກຄ້າ ຕ້ອງການ”
ເຈົ້າໜ້າທີ່ ທ່ານນີ້ ເວົ້າອີກ ວ່າ ສຳລັບ ບັນຫາ ທີ່ວ່າ ຍັງມີຊາວບ້ານ ລັກປູກຝິ່ນ ເພື່ອສົ່ງຂາຍ ໃຫ້ກຸ່ມພໍ່ຄ້າ ແລະ ຜູ້ປູກເອງ ກໍຍັງ ບໍ່ສາມາດ ເຊົາສູບຝິ່ນ ໄດ້ນັ້ນ ປັຈຸບັນ ທາງອົງການ UNODC ແລະ ໜ່ວຍງານ ທີ່ກ່ຽວຂ້ອງ ກຳລັງ ດຳເນີນງານ ໃນການຈັດການ ແລະ ກວດລ້າງ ພວກພໍ່ຄ້າ ທີ່ເລາະຊື້ຝິ່ນຈາກຊາວບ້ານຢູ່ ແລະ ໃນກໍຣະນີ ທີ່ວ່າ ຈະໃຫ້ ຊາວບ້ານ ເລີກປູກຝີ່ນ ຢ່າງຊີ້ນເຊີງນັ້ນ ຄົງຈະເປັນໄປໄດ້ຍາກ ເນື່ອງຈາກວ່າ ພວກເຂົາເຈົ້າ ເຫລົ່ານີ້ ຢູ່ກັບຝີ່ນ ແລະ ເສບຝິ່ນ ມາຕລອດ ແຕ່ ທາງອົງການ ກໍບໍ່ໄດ້ລົດລະ ຄວາມພະຍາຍາມ ໃນເຣື່ອງນີ້ ດັ່ງເຈົ້າໜ້າທີ່ ກ່ຽວຂ້ອງ ຂອງລາວ ທ່ານນີ້ ກ່າວເພີ່ມວ່າ:
“ການປູກຝິ່ນ ເປັນປູກພືຊອຸຕສາຫະກັມ ພືຊທີ່ເປັນສິນຄ້າ ຊນິດອື່ນ ເປັນເຣື່ອງ ສາລີ ເຣື່ອງຜັກ ຈາກນັ້ນ ກໍມີ ເຣື່ອງຊ່ວຍເຫລືອ ທາງດ້ານສາທາຣະນະສຸຂ ເປັນເຣື່ອງ ການແພທ ເປັນເຣື່ອງ ການສຶກສາ ເຣື່ອງການຈັດໃຫ້ ເຂົາເຈົ້າ ເຂົ້າເຖີງ ໂຮງຮຽນ ມີໂຮງຮຽນ ໃຫ້ ແລະ ມີຖນົນ.”
ເຖີງແມ່ນວ່າ ປັຈຸບັນນີ້ ການແກ້ໄຂ ບັນຫາຝິ່ນ ໃນລາວ ຍັງບໍ່ໝົດໄປ ແຕ່ໜ່ວຍງານ ພາກຣັຖ ແລະ ເອກກະຊົນ ກໍໄດ້ພຍາຍາມ ສົ່ງຜູ້ປ່ວຍ ທີ່ຕິດຝິ່ນ ເຂົ້າໄປປິ່ນປົວ ຢູ່ສູນບຳບັດ ແລະ ຟື້ນຟູ ສະມັຕຕະພາບ ຂອງຜູ້ຕິດຝິ່ນ ຈົນກວ່າ ຈະສາມາດ ອອກຝິ່ນ ແລະ ກັບມາ ໃຊ້ຊີວີດ ຢູ່ໃນສັງຄົມ ຕາມ ປົກະຕິ ໂດຽທີ່ ບໍ່ກັບຄືນ ໄປເສບຝິ່ນ ອີກ.
ອີງຕາມ ຣາຍງານ ຂອງອົງການ UNODC ເວົ້າວ່າ ສປປລາວ ເປັນປະເທດ ທີ່ມີຊາຍແດນ ຕິດກັບໄທຍ ພະມ້າ ຈີນ ວຽດນາມ ແລະ ກັມພູຊາ ຊື່ງພວກກຸ່ມ ອາຊຍາກັມ ຂ້າມຊາຕ ຫລື ກຸ່ມພໍ່ຄ້າ ຫາຣາຍໄດ້ ສ່ວນຕົວ ມັກໃຊ້ ຊ່ອງທາງນີ້ ເປັນທາງຜ່ານ ຍ້ອນປະເທດ ເຫລົ່ານີ້ ຍັງບໍ່ມີ ກົດໝາຍ ທີ່ຮັດກຸມ ຢ່າງຈີງຈັງ ຫລື ຍັງຍາກ ຕໍ່ການຄວບຄຸມ ນັ້ນເອງ.