ນອກຈາກ ບັນຫາ ການລັກປູກຝິ່ນ ທີ່ເກີດມີ ຢູ່ເລື້ອຍໆ ກໍຍັງມີບັນຫາ ຊາວບ້ານ ທີ່ໄດ້ຮັບ ການບໍາບັດ ຈາກການຕິດຝິ່ນ ໄປແລ້ວ ແຕ່ກັບ ຕິດຝິ່ນຄືນອີກ ຊຶ່ງຖືເປັນ ບັນຫາສໍາຄັນ ອັນນຶ່ງ ທີ່ຈະຕ້ອງ ໄດ້ຮັບການແກ້ໄຂ ໂດຍດ່ວນ ຫາກຈະຕັດ ບັນຫາຝິ່ນ ໃຫ້ໝົດໄປ.
ທ່ານ ບຸນໂຮມ ເທດທານີ ຫົວໜ້າຫ້ອງການ ຕ້ານຢາເສບຕິດ ແຂວງຊຽງຂວາງກ່າວວ່າ:
" ໂຕ ນີ້ ກໍ ມີ 50 ສ່ວນ ຮ້ອຍ ຈໍານວນ ທີ່ ເຮົາ ໄດ້ ບໍາບັດ ໄປ ແລ້ວ ກັບ ຄືນ ມາ ກິນ ອີກ ຖື ວ່າ ການ ບໍາບັດ ມັນ ກໍ ຍຸ້ງ ຍາກ ເພາະ ເຮົາ ບໍ່ ມີ ສູນ ທຶນ ທີ່ ເຮົາ ໄດ້ ຮັບ ຂະ ເຈົ້າ ກໍ ບໍ່ ໃຫ້ ຈໍານວນ ທີ່ ກິນ ຄືນ ຈະ ບໍ່ ມີ ທຶນ ບໍາບັດ ໃຫ້ ສະ ເພາະ ຈະ ບໍາບັດ ແຕ່ ຈໍານວນ ທີ່ຍັງ ບໍ່ ທັນ ໄດ້ ບໍາບັດ ຈັກ ເທື່ອ."
ທ່ານ ບຸນໂຮມໄດ້ກ່າວຕື່ມ ອີກວ່າ ທີ່ຜ່ານມາ ທາງການ ກ່ຽວຂ້ອງ ສາມາດ ປິ່ນປົວ ຜູ້ຕິດຝິ່ນ ພາຍໃນແຂວງ ໄດ້ຫລາຍພໍສົມຄວນ ຊຶ່ງເວລານີ້ ມີຜູ້ລໍຖ້າ ການບໍາບັດ ຮັກສາ ປະມານ 1,000 ກວ່າຄົນ ທໍ່ນັ້ນ ແຕ່ກໍຍັງມີ ຊາວບ້ານ ຈໍານວນ ບໍ່ໜ້ອຍ ໂດຍສະເພາະ ຜູ້ມີອາຍຸ ຈະຫວນ ກັບມາ ຕິດຄືນ ໃໝ່ອີກ ຍ້ອນຄວາມເຄີຍຊິນ ແລະ ຂາດງົບປະມານ ທີ່ຈະໄປ ຕິດຕາມ ແລະ ກວດກາ ປິ່ນປົວ ສຸຂພາບ ພວກຂະເຈົ້າ ຢ່າງຕໍ່ເນື່ອງ.
ທ່ານເວົ້າ ອີກວ່າ ທຶນທີ່ ໄດ້ຮັບ ຈາກພາຍນອກ ແມ່ນໃຊ້ສໍາລັບ ປິ່ນປົວ ຜູ້ທີ່ ຕິດໃໝ່ ທໍ່ນັ້ນ ແລະ ການປິ່ນປົວ ກໍມັກໃຊ້ ສຸຂສາລາ ຫລື ນາຍໝໍ ເຄື່ອນທີ່ ຊຶ່ງຈະຊ່ອຍ ບໍ່ໄດ້ຢ່າງທົ່ວເຖິງ ດັ່ງນັ້ນ ທາງແຂວງ ກໍກໍາລັງ ຊອກຫາ ງົບປະມານ ເພື່ອມາສ້າງຕັ້ງ ສູນບໍາບັດ ແລະ ຟື້ນຟູ ຜູ້ທີ່ຕິດຝິ່ນຂື້ນ ເພື່ອໃຫ້ການຊ່ອຍເຫລືອ ໄດ້ປະສິດທິພາບ ກວ່າເກົ່າ.
ເຖິງຢ່າງໃດກໍດີ ນອກຈາກ ການແກ້ໄຂ ບັນຫາ ການກັບຫວນ ມາກິນຝິ່ນ ຄືນອີກ ແລະ ການກວດກາການລັກປູກຝິ່ນຄືນ ທາງການ ຍັງຕ້ອງໄດ້ ຊອກວິຊາຊີບອື່ນ ໃຫ້ແກ່ ພວກທີ່ເຄີຍປູກຝິ່ນນີ້ອີກ ເພາະເມື່ອ ເລີກປູກຝິ່ນແລ້ວ ພວກຂະເຈົ້າ ຕ້ອງໄດ້ ຫາການຜລິດ ຢ່າງອື່ນທົດແທນ.