ຄ່າໄຟຟ້າ ພາຍໃນລາວ ຄວນຖືກ ກ່ວາເດີມ

ປະຊາຊົນ ເຊື່ອວ່າ ໄຟຟ້າ ໃນລາວ ຄວນມີ ຣາຄາ ທີ່ຖືກລົງ ກ່ວາເກົ່າ ເພາະວ່າ ລາວ ມີເຂື່ອນ ຜລິດ ໄຟຟ້າໄດ້ເອງ.
ໂພໄຊສວັດ ຣາຍງານ
2008-07-19
ອີແມວລ໌
ຄໍາເຫັນ
Share
ພິມ

ປະຊາຊົນລາວ ສ່ວນຫຼາຍ ທີ່ໄດ້ຮັບ ຜົນກະທົບ ຈາກຄ່າໄຟຟ້າ ແລະ ຄ່ານ້ຳແພງ ຢາກໃຫ້ ຣັຖບານ ພິຈາຣະນາ ຫຼຸດຣາຄາ ເປັນການຊ່ອຍເຫຼືອ ດັ່ງທີ່ປະເທດໄທ ກຳລັງເຮັດຢູ່ ໃນຂະນະນີ້ ດັ່ງນາງ ອຳໄພ ພອນຄຳ ປະຊາຊົນລາວຜູ້ນຶ່ງໄດ້ ໃຫ້ຄວາມຄິດເຫັນວ່າ:

“​ແມ່ນວ່າ ຂນາດ ຂາຍໄຟໃຫ້ປະເທດອື່ນ ປະເທດ​​ເພື່ອນບ້ານ ຂາຍໃຫ້ໄທ ປະຊາຊົນລາວຍັງຈ່າຍ ຄ່າໄຟແບບ ແພງໆ ແທນທີ່ ມັນຄວນຈະຖືກລົງ ເພາະຄ່າໄຟ ໂຕເອງ ຜລິດເອງ ຢູ່ປະເທດນີ້ ຍັງເກັບຄ່າໄຟ ແບບແພງໆ.”

ນາງໄດ້ເວົ້າ ຕໍ່ໄປວ່າ ລາວສາມາດ ຜລິດໄຟຟ້າໄດ້ເອງ ແລະ ຍັງສົ່ງຂາຍໃຫ້ປະເທດເພື່ອນບ້ານ ໄດ້ອີກ ປະຊາຊົນ ຊ້ຳພັດໄດ້ຈ່າຍ ຄ່າໄຟຟ້າ ແບບແພງໆ ຊຶ່ງຄ່າໄຟຄວນຈະຫຼຸດລົງມາ ​​ເພື່ອເປັນການຊ່ອຍເຫຼືອປະຊາຊົນ ໃນຍາມ ເຂົ້າຍາກ ໝາກແພງ.

ນາງ ​​ໃຫ້ຄວາມເຫັນ ຕື່ມອີກວ່າ ໄຟຟ້າ ໃນລາວ ຈະມີໃຊ້ ສະເພາະໃນໂຕເມືອງໃຫຍ່ໆທໍ່ນັ້ນ ຕາມຊົນນະບົດ ຫ່າງໄກ ສອກຫຼີກ ຂາດການພັດທະນາ ຫຼາຍບ່ອນ ກໍບໍ່ມີ ໄຟຟ້າໃຊ້. ບາງຄັ້ງໄຟຟ້າຍັງ ຖືກຕັດຂາດມອດ ໄປອີກ. ປະຊາຊົນລາວ ມີແຕ່ 6 ລ້ານຄົນ ມີໄຟຟ້າໃຊ້ ແຕ່ຈຳນວນນຶ່ງທໍ່ນັ້ນ. ​ເຂື່ອນໄຟຟ້າ ໃນລາວ ມີທົ່ວປະເທດ ຄວນຈະພຽງພໍ ໃຫ້ປະຊາຊົນໃຊ້. ​ເຮົາສາມາດຜລິດ ໄດ້ເອງ ເປັນຫຍັງ ຄ່າໄຟ ຈຶ່ງຍັງແພງຢູ່ ນາງເວົ້າຕໍ່ວ່າ:

“​ຂື້ນຣາຄາ ຕລອດ ປີນຶ່ງ ຢ່າງນ້ອຍ ກໍຂື້ນ ເທື່ອນຶ່ງ ເຂົາ​​ເອົາ ປະລິມານ ທີ່ເຮົາໃຊ້ ມາຄູນກັບ 40 ກີບ ແລ້ວກໍມີຄ່າ ພາສີ 5 ສ່ວນຮ້ອຍ ທຸກຢ່າງ 5 ສ່ວນຮ້ອຍ ໝົດ ນ້ຳມັນ ອີຫຍັງ.”

ໃນປັດຈຸບັນນີ້ ປະຊາຊົນລາວ ມີບັນຫາ ໃນການຄອງຊີບ ແຕ່ລະມື້ ຍ້ອນວ່າ ລາຍໄດ້ ຕໍ່າບໍ່ພໍກັບລາຍຈ່າຍ. ທາງການລາວໄດ້ອອກແລງການ ໃນກອງປະຊຸມ ພາ ຄັ້ງທີ 5 ວ່າ ຣັຖບານເອົາໃຈໃສ່ ທີ່ສຸດໃນບັນຫານີ້. ​ຣາຄານ້ຳມັນແພງ ຣັຖບານ ບໍ່ສາມາດ ຄວບຄຸມໄດ້ ແຕ່ຈະແກ້ໄຂ ໂດຍການສະສົມ ອາຫານເພື່ອເປັນການ ສຳຮອງ ແລະ ຫລຸດ​ການນຳເຂົ້າ ສິນຄ້າ ອື່ນໆ ນອກຈາກນັ້ນ ຣັຖບານຍັງເຊື່ອວ່າ ການກໍ່ສ້າງເຂື່ອນ ຂາຍໄຟ ຈະເປັນລາຍໄດ້ຫຼັກ ເຮັດໃຫ້ລາວ ຫຼຸດພົ້ນ ຈາກ ຄວາມເປັນປະເທດດ້ອຍພັດທະນາ.


ເຕັມຫນ້າ