ສູນປິ່ນປົວ ໂຣກ ເອສ ແຫ່ງທີ 2

ນະຄອນ ຫລວງວຽງຈັນ ຈະມີ ສູນປິ່ນປົວ ຜູ້ຕິດເຊື້ອ HIV/AIDS ດ້ວຍຢາ ARV ເປັນແຫ່ງ ທີ 2 ໃນທ້າຍເດືອນ ກໍຣະກະດານີ້.
ຈະເຣີນສຸກ ຣາຍງາຍ
2008-07-09
ອີແມວລ໌
ຄໍາເຫັນ
Share
ພິມ

ສາທາຣະນະ​ສຸກ ລາວ ມີ​ແຜນການ ​ເປີດ​ສູນ​ປິ່ນປົວ ຜູ້​ຕິດ​ເຊື້ອ HIV/AIDS ດ້ວຍ​ຢາ ARV ຂຶ້ນ​ທີ່​ໂຮງໝໍ ມະ​ໂຫສົດ ​ໃນ​ໄວໆ​ນີ້, ຊຶ່ງ​ຖື​ເປັນ ​ແຫ່ງ​ທີ 2 ຂອງ​ນະຄອນຫລວງ ​ວຽງ​ຈັນ ພາຍຫລັງ ທີ່​ສູນ ​ແຫ່ງ​ທໍາ​ອິດ ທີ່​ໂຮງໝໍ ​ເສ​ຖາ​ທິຣາດ ​ໄດ້​ປະສົບ ຜົນ​ສໍາ​ເຣັດ ຢາງ​ດີ ພໍ​ສົມຄວນ ​ໃນ​ການ​ປິ່ນປົວ ​ແລະ ຜູ້​ຕິດ​ເຊື້ອ ​ໃນ​ລະຍະ​ຜ່ານ​ມາ, ອີງ​ຕາມ ​ການ​ເປີດ​ເຜີຍ ດຣ. ​ແພງ​ເພັດ ​ແກ້ວ​ວິ​ໄຊ, ຫົວໜ້າ ​ຜ​ແນ​ກ​ ຝຶກ​ອົບຮົມ ປະ​ຈໍ​າ ສູນ​ຕ້ານ​ເອສ ​ແຫ່ງ​ຊາດ​ລາວ.

“​ໂຮງໝໍ​ ມະ​ໂຫດ​ສົດ ຮຽບຮ້ອຍ​ແລ້ວ ​ໃກ້ໆ ​ແລ້ວ ມີ​ແຕ່​ວ່າ ລໍຖ້າ ​ເຂົ້າ​ຊື່​ໆ ໝົດ​ທ້າຍ​ເດືອນ​ນີ້ ຈະ​ເປີດ​ແລ້ວ ກຽມພ້ອມ ໝົດ​ແລ້ວ.”

ທ່ານ ກ່າວ​ຕື່ມ​ວ່າ ​ໃນ​ທ້າຍ​ເດືອນ ​ກໍຣະກະດາ​ນີ້ ສູນ​ປິ່ນປົວ ຜູ້ຕິດ​ເຊື້ອ HIV/AIDS ດ້ວຍ​ຢາ ARV ຈະ​ເຣີ້ມ​ເປີດ ບໍຣິການ​ຂຶ້ນ ທີ່​ໂຮງໝໍ ​ມະ​ໂຫສົດ, ຊຶ່ງ​ຖື​ວ່າ ​ໄດ້​ມີ ​ການ​ກະກຽມ ຄວາມ​ພ້ອມ ດ້ານ​ຕ່າງໆ, ທັງ​ວິຊາ​ການ, ພະນັກງານ, ການ​ບໍຣິຫານ ຄຸ້ມ​ຄອງ ວຽກ​ງານ ​ເປັນ​ທີ່ ​ຮຽບຮ້ອຍ​ແລ້ວ, ​ໂດຍ​ຄາດ​ວ່າ ຈະ​ສາມາດ​ ຮອງ​ຮັບ ຜູ້​ຕິດ​ເຊື້ອ ​ໃນ​ເຂດພາກ​ກາງ ​ແລະ ພາກ​​ເໜືອ ​ໄດ້​ຫລາຍ​ພໍ​ສົມຄວນ.

ປັດຈຸບັນ​ນີ້ ມີ​ຜູ້​ຕິດ​ເຊື້ອ ຫລາຍ​ກ່ວາ 250 ຄົນ, ມາ​ຂໍ​ໃຊ້ ບໍຣິການ ທີ່​ໂຮງໝໍ ​ເສ​ຖາທິຣາດ, ຊຶ່ງ​ເປັນ​ສູນ​ປິ່ນປົວ ຜູ້​ຕິດ​ເຊື້ອ HIV/AIDS ດ້ວຍ​ຢາ ARV ​ແຫ່ງ​ທໍາ​ອິດ ​ໃນ​ນະຄອນຫລວງ ​ວຽງ​ຈັນ. ນອກຈາກ​ນັ້ນ​ແລ້ວ, ສູນ ທີ່​ແຂວງ​ ຫລວງ​ພຣະບາງ ກໍ​ມີ​ແຜນ ທີ່​ຈະ​ເປີດ​ພາຍ​ໃນ ​ເດືອນ ພຶ​ສຈິ​ກາ ຂອງ​ປີ​ນີ້, ຊຶ່ງ​ທັງ​ໝົດ​ນີ້ ຖື​ວ່າ ​ໄດ້​ຮັບ ​ການ​ຊ່ອຍ​ເຫລືອ ຈາກ​ກອງ​ທຶນ​ໂລກ ທັງ​ຊິ້ນ. ດຣ. ​ແພງ​ເພັດ ກ່າວ​ຕໍ່​ໄປ ອີກ​ວ່າ:

“ຖ້າ​ຫາກ​ວ່າ ​ເປີດ​ຢູ່​ຫລວງ​ພຣະບາງ ກໍ​ຍິ່ງ​ສະບາຍ​ຂຶ້ນ ​ເພາະວ່າ ຄົນ​ໄຂ້ ພາກ​ເໜືອ ຈະ​ໄດ້​ລົງ​ມາ, ທີ່​ນີ້ ຈໍາປາ​ສັກ ນີ້ ອາດ​ຈະ​ເປັນ​ປີໜ້າ.”

ນັບ​ແຕ່​ ປີ 1996 ມາ​ຮອດ​ກາງ​ປີ 2008 ນີ້, ທາງ​ການ​ລາວ ສາມາດ ກວດ​ພົບ ຜູ້​ຕິດ​ເຊື້ອ HIV/AIDS ​ແລ້ວ ປະມານ 2,600 ກວ່າ​ຄົນ, ​ໃນ​ນັ້ນ ​ເສັຍຊີວິດ 700 ກ່ວາ​ຄົນ. ຢ່າງ​ໃດ ກໍ​ດີ, ການ​ເປີດ​ປະ​ເທດ ຂອງ​ທາ​ງການ​ລາວ ຢ່າ​ງກ້ວາງ​ຂວາງ​ນັ້ນ​ ກໍ​ເຮັດ​ໃຫ້ ທາງ​ການ​ລາວ ຕ້ອງ​ໄດ້​ເອົາ​ໃຈ​ໃສ່ ບັນຫາ ການຣະບາດ ຂອງ​ເອສ ຫລາຍ​ຂຶ້ນ.

ເຕັມຫນ້າ