ແມ່ຍິງແຂວງຊຽງຂວາງ ຍັງບໍ່ກ້າ ກວດເລືອດ ຫາໂຣກເອດສ໌

ເຈົ້າໜ້າທີ່ ສາທາຣະນະສຸກ ປະຈໍາ ແຂວງຊຽງຂວາງ ວ່າ ​ແມ່ຍິງ ທີ່ຕິດເຊື້ອໂຣກ HIV ໃນແຂວງ ຊຽງຂວາງ ບໍ່ເປັນທີ່ເປີດເຜີຽກັນ ມີຈໍານວນບໍ່ຫລາຍ, ແຕ່ວ່າ ມີທ່າທີ ເພີ້ມຂື້ນ ຍ້ອນວ່າ ມີຍິງສາວ ຂາຍບໍຣິການ ມາຈາກແຂວງອື່ນ ຍ້າຍເຂົ້າມາ ຢູ່ໃນແຂວງນີ້ ແລະ ມີຜູ້ຍິງ ຈໍານວນນື່ງ ຕິດເຊື້ອໂຣກນີ້ ຈາກຜູ້ເປັນຜົວ:

“ໂຣກເອສ ບໍ່ເຖິງຂັ້ນ ເປັນໂຣກ ມີແຕ່ ຕິດເຊື້ອ 7-8 ຄົນ ສາວ ບໍຣິການ ແດ່ ແລະ ຕິດເຊື້ອ ມາຈາກຜູ້ເປັນຜົວ ກໍແມ່ນໝົດ ແລະ ແຕ່ບໍ່ເປີດເຜີຽ. ສະເພາະ ມາກວດ ມີແຕ່ ເທົ່ານັ້ນ ມີແຕ່ໝໍຮູ້ຈັກ ຄົນອື່ນ ບໍ່ຮູ້ຈັກ ເພິ່ນບໍ່ເປີດເຜີຽ.”

ທ່ານວ່າ ປັດຈຸບັນ ກໍມີແຕ່ 7-8 ຄົນເທົ່ານິ້ລະ ທີ່ໄດ້ຮັບ ການປິ່ນປົວ. ທາງແຂວງ ເຊື່ອວ່າ ຍັງມີ ຄົນຫລາຍຄົນ ທີ່ຕິດເຊື້ອໂຣກ HIV ແຕ່ເຂົາເຈົ້າ ບໍ່ກ້າ ມາກວດນໍາ ທ່ານໝໍ ເພາະວ່າ ເຂົາເຈົ້າ ອາຍສັງຄົມ ແລະ ໝູ່ເພື່ອນ ທີ່ຢູ່ອອ້ມຂ້າງ.

ອີກປະການນື່ງ ຕົນເອງ ກໍບໍ່ຮູ້ວ່າໂຕເອງ ເປັນໂຣກຫຍັງ. ເຖິງແມ່ນວ່າ ແຂວງຊຽງຂວາງ ຈະບໍ່ເປັນ ແຂວງ ທີ່ມີອັຕຣາສ່ຽງ ຂອງຄົນ ຕິດເຊື້ອ ໂຣກເອສ ສູງກໍດີ ແຕ່ກໍຍອມຮັບວ່າ ຜູ້ຍິງ ຂາຍບໍຣິການ ທີ່ຍ້າຍ ມາຈາກແຂວງ ຕ່າງໆ ເພື່ອມາຫາກິນ ຢູ່ໃນແຂວງນີ້ ກໍສາມາດ ນໍາພາ ເຊື້ອໂຣກ ມາຕິດຕໍ່ ໃນແຂວງນີ້ ຫລາຍຂື້ນໄດ້:

“ແຂວງຊຽງຂວາງ ສ່ວນຫລາຍ ມີແຕ່ ສາວບໍຣິການ ທີ່ວ່າ ມາຈາກ ຕ່າງແຂວງພຸ້ນ ກໍມີ ມາຈາກ ຈໍາປາສັກ ເມືອງຫລວງ ຊໍາເໜືອ ອີສັງ. ໂຄງການບໍ ເພິ່ນກໍມີ ແຕ່ເງິນ ຊຸກຍູ້ໃຫ້ລົງຫາ ສາວເນີ້ ແຈກຢາຍຖົງຢາງ ປາຖະກະຖາ ອີ່ສັງຫັ້ນນະ.”

ເຣື້ອງນີ້ ເຈົ້າໜ້າທີ່ ສາທາຣະນະສຸກ ແຂວງຊຽງຂວາງ ກໍໄດ້ລົງຊອກຮູ້ຈັກ ກຸ່ມສ່ຽງ ຢູ່ຕາມໝູ່ບ້ານ ຕ່າງໆ ຢູ່ຕາມທີ່ພັກ ຂອງສາວ ຂາຍບໍຣິການ ຢູ່ຕາມຮ້ານອາຫານ. ເມື່ອພົບເຫັນແລ້ວ ກໍອົບລົມ ຄວາມຮູ້ ກ່ຽວກັບໂຣກເອສ ໃຫ້ເຂົາເຈົ້າ ພ້ອມທັງແຈກຢາຍ ຖົງອານາໄມ ອາໄວຍະວະເພດໃຫ້.