ພາຍຫລັງ ທີ່ຮູ້ຂ່າວ ຈາກທາງພາຍນອກ ວ່າ ທາງກາຣໄທຽ ມີແຜນກຳໜົດກາຣ ຢ່າງຄັກແນ່ ທີ່ຈະຈັດສົ່ງຊາວມົ້ງລາວ ທີ່ຍັງເຫລືອຄ້າງ ຢູ່ໃນເຂຕບ້ານຫ້ວຍນ້ຳຂາວ ແຂວງເພຊບູນ ໃນປັຈຈຸບັນ ປະມານ 5,000 ຄົນ ຄືນໃຫ້ແກ່ ທາງກາຣ ສປປລາວ ໃຫ້ໝົດ ພາຍໃນ ເດືອນມີຖຸນາ 2009 ນີ້ ໄດ້ເຮັດໃຫ້ເຂົາເຈົ້າ ມີຄວາມວິຕົກກັງວົນ ຢ່າງຫລວງຫລາຍ ດັ່ງຊາວມົ້ງ ປະຈຳພື້ນທີ່ ຜູ້ໜື່ງ ທີ່ບໍ່ປະສົງອອກຊື່ ໄດ້ກ່າວວ່າ:
"ທຸກມື້ທຸກວັນ ເຂົາ ກໍບອກວ່າ ຕ້ອງໄດ້ສົ່ງ ພວກເຮົາ ກັບຄືນລາວ ແນ່ນອນ ພວກເຮົາ ຄິດວ່າ ກັບປະເທສລາວ ກໍບໍ່ດີໃຈ ແຕ່ຖ້າ ກົວເວລາ ກັບຄືນ ທີ່ໄມ່(ບໍ່) ມີໃຜເຫັນ ເຂົາກໍ ຈີ້ບັງຄັບ ແລ້ວກໍປິດລ້ອມ ແລ້ວກໍສົ່ງ ເຮົາຂື້ນ ຣົຖສົ່ງໄປ ເຖີງລາວ ແລ້ວກໍອ້າງວ່າ ພວກເຮົາ ດີໃຈ ກັບຄືນລາວ ເຣື່ອງນີ້ ພວກເຮົາບໍ່ຍອມນ໋ະ"
ໃນຂະນະນີ້ ກໍພົບເຫັນວ່າ ມີທະຫາຣໄທຽ ບໍ່ຕໍ່ກວ່າ 250 ຄົນ ປະຈຳ ຢູ່ໃນ ພື້ນທີ່ ທົ່ວບໍຣິເວນ ບ່ອນພັກຂອງພວກຊາວມົ້ງ ເພື່ອກວດກາ ຢ່າງເຂັ້ມງວດ ເປັນກາຣປ້ອງກັນ ບໍ່ໃຫ້ມີ ກາຣລັກໜີ ອອກຈາກ ພື້ນທີ່ໄດ້ ຍີ່ງເປັນກາຣເຮັດໃຫ້ ເຂົາເຈົ້າ ມີຄວາມຢ້ານກົວຕື່ມອີກ ເພາະບໍ່ຢາກ ຖືກບັງຄັບ ໃຫ້ກັບຄືນ ເມືອງລາວ ແຕ່ຢ່າງໃດ ຈື່ງຢາກໃຫ້ ພາຄສ່ວນ ທີ່ສາມ ເຂົ້າມາສັງເກຕກາຣ ແລະ ໃຫ້ຄວາມຊ່ວຍເຫລືອ ດັ່ງທີ່ມົ້ງລາວ ໄດ້ກ່າວ ເພີ່ມວ່າ:
"ຂໍໃຫ້ມີ ອົງກາຣ ຂ້າຫລວງໃຫຍ່ ສະຫະປະຊາຊາຕ ແລະ ປະເທສ ມະຫາອຳນາຈ ເຂົ້າມາຊ່ວຍທຳກາຣສຳຣວຈ ສັມພາສ ກໍບອກໃຫ້ ຕ່າງປະເທສນີ້ ວ່າ ຖ້າເຂົາ ບໍ່ໃຫ້ຣັຖບາລໄທຽ ຮັບຮູ້ ຢູ່ປະເທສໄທຽ ກໍຢູ່ ໃຫ້ຢູ່ທີ່ໃດ ກໍຢູ່ ແຕ່ຂໍງົດເວັ້ນ ສົ່ງໄປລາວ ເທົ່ານັ້ນ"
ຢ່າງໃດກໍຕາມ ທາງສຳນັກຂ່າວ ຕ່າງປະເທສ ກໍແຈ້ງວ່າ: ທ່ານຢົ້ງ ຈັນທະລັງສີ ໂຄສົກກະຊວງກາຣຕ່າງປະເທສ ຂອງລາວ ກໍໄດ້ແຖລງ ໃຫ້ກາຣຢືນຢັນວ່າ ທີ່ຈະຮັບເອົາ ຊາວມົ້ງລາວ ຈາກໄທຍ ກັບຄືນເມືອງລາວ ໃຫ້ໝົດ ພາຍໃນ ເດືອນມີຖຸນາ ຂອງປີນີ້ແທ້.