ອົງການຂ່າວແຫ່ງຊາດຂອງໄທຣາຍງານວ່າ ໄທຈະສົ່ງຊາວລາວເຜົ່າມົ້ງກັບຄືນລາວອີກໃນສັບປະດາໜ້າ ເທື່ອນີ້ຈະສົ່ງ 215 ຄົນ ແລະ ຈະສົ່ງ ກັບຄືນ ຜ່ານຂົວມິດຕະພາບ ລາວ-ໄທແຫ່ງທີ່ນຶ່ງ ຊຶ່ງເປັນຂົວ ຂ້າມແມ່ນ້ຳຂອງຣະຫວ່າງ ນະຄອນຫລວງວຽງຈັນແລະເມືອງໜອງຄາຍຂອງໄທ.
ນາຍພົນ ນິພັດ ທອງເລັກ ຫົວໜ້າກົມຊາຍແດນ ກອງທັບໄທກ່າວວ່າ ທາງການໄທ ຈະຈັດສົ່ງຊາວລາວເຜົ່າມົ້ງຈາກສູນ ບ້ານຫ້ວຍນ້ຳຂາວ ເມືອງເຂົາຄໍ້ ແຂວງເພັດສະບູນ ຂອງໄທຈຳນວນ 215 ນັ້ນ ກັບຄືນສປປລາວ ໃນວັນພະຫັດ ສັບປະດາໜ້າ.
ນາຍພົນ ນິພັດ ກ່າວຢ້ຳວ່າ ຊາວລາວເຜົ່າມົ້ງເຫລົ່ານີ້ ຈະຖືກສົ່ງກັບຄືນລາວ ໂດຍຄວາມສມັກໃຈ ຂອງພວກ ເຂົາເຈົ້າ. ນັກການທູດຕ່າງປະເທດຈາກຫົກປະເທດ ຄື ຈາກສະຫະຣັຖອະເມຣິກາ ອອສເຕຣເລັຍ ອັງກິດ ການາດາ ຝຣັ່ງເສດ ແລະເນເທີແລ່ນ ໄດ້ໄປ ຢ້ຽມຢາມຊາວເຜົ່າມົ້ງເຫລົ່ານັ້ນເມື່ອວັນພຸດທີ່ຜ່ານມາ ແລະນັກການທູດ ຕ່າງປະເທດຕ່າງທັງໝົດ ກໍພໍໃຈ ທີ່ບໍ່ເຫັນມີການລ່ວງລະເມີດສິດທິມະນຸດຕໍ່ຊາວລາວ ເຫລົ່ານີ້ແຕ່ຢ່າງໃດ.
ນາຍພົນ ພິນັດ ອະທິບາຍ ວ່າ ທາງການໄທອະນຸຍາດໃຫ້ນັກການທູດຕ່າງປະເທດ ໄປຢ້ຽມຢາມຊາວລາວເຜົ່າມົ້ງທີ່ຈະຖືກສົ່ງກັບຄືນປະເທດລາວຄັ້ງນີ້ ກໍເພາະວ່າ ເມື່ອເວລາໄທຈັດສົ່ງ ຊາວເຜົ່າມົ້ງ 837 ຄົນ ກັບຄືນລາວເມື່ອວັນທີ່ 23 ເດືອນທີ່ແລ້ວ, ເຈົ້າໜ້າທີ່ອົງການແລະຣັຖບານ ຕ່າງປະເທດ ໄດ້ສະແດງຄວາມວິຕົກ ກັງວົນ ຢ້ານວ່າ ຊາວເຜົ່າມົ້ງ ຖືກບັງຄັບ ໃຫ້ກັບຄືນປະເທດລາວ. ແຕ່ເຖິງຢ່າງໃດກໍຕາມ ຊາວເຜົ່າມົ້ງຫລາຍໆຄົນທີ່ອາໃສຢູ່ໃນສູນບ້ານຫ້ວຍນ້ຳຂາວ ນັ້ນ ປະກາດ ຢູ່ເລື້ອຍໆວ່າ ພວກເຂົາເຈົ້າຈະບໍ່ຍອມກັບຄືນປະເທດລາວຢ່າງເດັດຂາດ.