ກຸ່ມຊາວເຜົ່າມົ້ງລາວ ປະມານ 5,000 ຄົນ ຍັງສືບຕໍ່ ກາຣປະທ້ວງ ດ້ວຍກາຣປິດ ຖນົນ ແລະ ຢືນຢັນຈະບໍ່ພາກັນ ກັບຄືນ ເຂົ້າໄປ ໃນສູນຮອງຮັບ ຊົ່ວຄາວ ຈົນກວ່າ ຈະໄດ້ຮັບ ຄຳຕອບ ຈາກທາງກາຣໄທຽແລະ ອົງກາຣ UNHCR ຈະເຂົ້າມາ ຊ່ວຍເຫລືອ ດັ່ງທີ່ ທ້າວ ວັງເມັ໋ງຢັ໋ງ ໄດ້ກ່າວວ່າ:
"ຕອນນີ້ ຍັງຢູ່ໃນ ກາງຖນົນ ປິດຫົນທາງ ເລີຽເນີ໋ ຖືວ່າ ມີ 5,000 ກວ່າຄົນ ຖືວ່າ ໄດ້ພາກັນນອນ ຕອນເຊົ້າຕອນຄໍ່າ ບໍ່ມີເຂົ້າກິນ ບໍ່ມີນ້ຳໃຊ້ ເດັກນ້ອຍ ຫລາຍຄົນ ຫີວນ້ຳ ຫີວເຂົ້າ ນຳ"
ກາຣປະທ້ວງ ດັ່ງກ່າວ ດຳເນີນ ມາແຕ່ ມື້ວັນທີ່ 16 ພຶສພາ ຜ່ານມາ ແລະ ຕໍ່ມາເຖີງ ວັນທີ່ 22 ພຶສພາເຊັ່ນກັນ ອາຄານ ຫລາຍຮ້ອຍຫລັງ ກໍຖືກໄຟໄໝ້ ເຮັດໃຫ້ເຂົາເຈົ້າ ຕ້ອງອາສັຍ ຢູ່ທາງຂ້າງນອກແລະ ຢືນຢັນ ຈະບໍ່ຍອມ ກັບຄືນ ເຂົ້າໄປຢູ່ ໃນສູນ ຕື່ມອີກ ເຖີງແມ່ນ ທາງກາຣ ທະຫານ ຊື່ງຮັບຜິດຊອບ ໃນພື້ນທີ່ ໄດ້ເຂົ້າໄປ ເຈຣະຈາ ຫລາຍເທື່ອ ມາແລ້ວ ກໍຕາມ.
ຄະນະ ປະທ້ວງ ດັ່ງກ່າວ ກໍເປັນ ພາຄສ່ວນ ຂອງຊົນເຜົ່າມົ້ງ ທັງໝົດ 7,000 ກວ່າຄົນ ແລະ ອີກ 2,000 ກວ່າຄົນ ທີ່ໄຟ ບໍ່ໄໝ້ ອາຄານນັ້ນ ແມ່ນພວກທີ່ ໄດ້ແຈ້ງສະມັກ ກັບຄືນ ປະເທດລາວ ກ່ຽວກັບເຣື່ອງນີ້ ທ້າວ ວັງ ເມັ໋ງຢັ໋ງ ໄດ້ແຈ້ງວ່າ:
"ກໍມີ ຈຳພວກໜື່ງ ກໍເຂົ້າໄປ ແຕ່ສ່ວນຫລາຍ ບໍ່ຍອມ ກັບໄປ ເພາະວ່າ ເຂົ້າໄປ ຈະຖືກ ບັງຄັບ ກັບໄປລາວ ຖືວ່າ ເຂົ້າໄປ ຈຳນວນນ້ອຍໆ, ສ່ວນຫລາຍ ບໍ່ເຂົ້າໄປ"
ກາຣປິດ ຫົນທາງ ແລະ ບໍ່ຍອມ ກັບຄືນ ເຂົ້າໄປ ໃນສູນ ເພື່ອເປັນກາຣ ປະທ້ວງ ຂອງຊາວມົ້ງ ດັ່ງກ່າວ ທາງກາຣ ກ່ຽວຂ້ອງໄທຽ ກໍພຍາຍາມ ແກ້ໄຂ ແລະ ວ່າ ຍັງຈະດຳເນີນ ຕາມນະໂຍບາຍ ຈັດສົ່ງ ຕາມທີ່ໄດ້ຕົກລົງ ກັບທາງກາຣລາວ ແລ້ວນັ້ນ ແຕ່ຊາວມົ້ງ ກໍຢືນຢັນ ທີ່ຈະບໍ່ກັບຄືນ ເພາະຢ້ານ ຈະບໍ່ມີຄວາມປອດພັຍ ໂດຽອ້າງວ່າ ເປັນຍາຕພີ່ນ້ອງ ຫລື ລູກໆຫລານໆ ຂອງອະດີດ ທະຫານ ຊີໄອເອ (CIA) ຂອງສະຫະຣັຖ ໃນສມັຍ ສົງຄາມ ວຽດນາມ ທີ່ສິ້ນສຸດລົງ ແຕ່ປີ 1975 ພຸ້ນມານັ້ນ.