ເຈົ້າໜ້າທີ່ ຈາກໜ່ວຍງານ ຕ້ານກາຣຄ້າ ມະນຸສ ປະຈຳ ນະຄອນຫລວງວຽງຈັນ ໄດ້ກ່າວເຖີງກາຣປະຕິບັຕ ວຽກງານ ດ້ານໃຫ້ຄວາມ ຊ່ວຍເຫລືອ ຜູ້ເຄາະຮ້າຍ ໃນປັຈຈຸບັນນີ້ ວ່າ: ເຖີງຈະມີ ອົງກອນ ທັ້ງຂອງພາຄ ຣັຖບາລ ແລະ ເອກຊົນ ກໍຕາມ ແຕ່ບັນຫາ ຂອງກາຣລັກລອບ ຄ້າມະນຸສຍັງມີຢູ່ ຄືເກົ່າດັ່ງທີ່ ເຈົ້າໜ້າທີ່ລາວ ໄດ້ເປີດເຜີຽ ວ່າ:
" ເວົ້າ ບ່ອນ ໝົດ ມັນ ກໍ ບໍ່ ທັນ ໄດ້ ທົ່ວ ເຖີງ ບໍ່ ທັນ ໄດ້ ເຂົ້າ ເຖີງ ບັນຫາ ໄດ້ ໝົດ ທຸກ ຄົນ ເພາະວ່າ ກໍ ມີ ຢູ່ ຫລາຍໆ ພາຄສ່ວນ ທີ່ ຂະ ເຈົ້າ ລົງ ໄປ ແຕ່ ວ່າ ຈະ ໃຫ້ ທົ່ວ ເຖີງ ມັນ ບໍ່ ທັນ ທົ່ວ ເຖີງ "
ເຈົ້າໜ້າທີ່ລາວ ດັ່ງກ່າວ ໄດ້ແຈ້ງ ເພີ່ມວ່າ: ສຳຫລັບ ກຸ່ມຜູ້ເປັນ ນາຍໜ້າ ຊື່ງເປັນຄົນລາວ ທີ່ເຂົ້າມາ ຕິດຕໍ່ ເອົາຍີງສາວລາວ ໄປຂາຍ ຕໍ່ໃຫ້ນາຍໜ້າ ຢູ່ປະເທດໄທຽ ນັ້ນສ່ວນຫລາຍ ຈະເປັນຄົນ ໃນເຂຕພື້ນທີ່ເອງ ແລະ ກໍບໍ່ເປັນ ທີ່ໜ້າສົງສັຍ ຂອງຝຸງຄົນ ໂດຽທົ່ວໄປພ້ອມຍັງ ເປັນຄົນທີ່ທາງພໍ່ແມ່ ຂອງເດັກສາວລາວ ມີຄວາມໄວ້ວາງໃຈ ອີກດ້ວຍດັ່ງທີ່ ທ່ານໄດ້ກ່າວ ອີກວ່າ:
" ເຂົາ ກໍ ເຣີ່ມ ຈາກ ພີ່ໆນ້ອງໆ ເຂົາ ຄົນ ໃກ້ ຄຽງ ຫລື ວ່າ ຄົນ ທີ່ ຮູ້ຈັກ ໝູ່ ບ້ານ ທີ່ ວ່າ ເກີດ ຄວາມ ຂັດ ສົນ ແທ້ ຄວາມ ເຂົ້າ ໃຈ ຂອງ ເຂົາ , ເຂົາ ເຂົ້າ ໃຈ ວ່າ ເພື່ອ ໄປ ເຮັດ ວຽກ ເຮັດ ງານ ບ່ອນ ດີ ແທ້ ພໍ ໄດ້ ເງີ ນ ມາ ແກ້ ໄຂ ຄອບຄົວ "
ຢ່າງໃດກໍຕາມທາງເຈົ້າໜ້າທີ່ ຈາກອົງກອນ ຄວາມຮ່ວມມືວ່າ ດ້ວຍກາຣຕໍ່ຕ້ານ ກາຣຄ້າມະນຸສ ຫລື UNIAP ກໍກ່າວວ່າ: ປັຈຈຸບັນນີ້ ຄວາມຕ້ອງກາຣ ແຮງງານ ຂັ້ນຕໍ່າ ສຳຫລັບ ພາຄສ່ວນ ອຸຕສາຫະກັມແລະ ພາຄບໍຣິກາຣ ບາງສ່ວນ ເຊັ່ນກາຣກໍ່ສ້າງກາຣປະມົງຫລື ຕາມຫ້າງຮ້ານອາຫາຣ ຕ່າງໆນັ້ນ ມີຢ່າງຫລວງຫລາຍອັນເປັນເຫຕ ໃຫ້ທາງຜູ້ເປັນນາຍຈ້າງ ຍີ່ງມີຄວາມຕ້ອງກາຣ ເພາະຈະໄດ້ຈ່າຍ ຄ່າແຮງງານຖືກອັນເປັນເຫຕໃຫ້ ເກີດມີບັນຫາ ດ້ານກາຣຄ້າ ມະນຸສ ຈົນເທົ້າ ປັຈຈຸບັນນີ້.