ໃນຕອນກາງຄືນ ຂອງມື້ວັນເສົາ ທີ່ 7 ມີຖຸນານີ້ ທາງເຈົ້າໜ້າທີ່ ຕຳຣວຈ ເມືອງອຸດອນທານີ ໄດ້ນຳ ກຳລັງ ອອກລາຕເວນ ເພື່ອຮັກສາ ຄວາມເປັນຣະບຽບ ຮຽບຮ້ອຍ ຕາມ ເສັ້ນທາງ ຕ່າງໆ ໃນຕົວເມືອງ ອຸດອນທານີ ແລະ ກໍພົບເຫັນ ມີກຸ່ມ ຍີງສາວ 4 ຄົນ ທີ່ຍ່າງ ໄປມາແບບ ບໍ່ຢ້ານກົວ ຕໍ່ທາງ ເຈົ້າໜ້າທີ່ ກົດໝາຍ ແຕ່ຢ່າງໃດ ເຮັດໃຫ້ທາງເຈົ້າໜ້າທີ່ ມີຄວາມສົງສັຍ ຈື່ງແຈ້ງຕົວວ່າ ເປັນຕຳຣວຈ ແລ້ວກໍເຂົ້າຈັບ ນຳຕົວ ໄປສືບສວນ
ຍິງສາວ ດັ່ງກ່າວ ໄດ້ແກ່: ນາງບັງອອນ ພົມມະຈີຕ, ນາງລານີ ຈັນວົງສາ, ນາງແອ໊ດ ທັມວົງສາ ແລະ ນາງແພນ ທີ່ມີ ອາຍຸ ແຕ່ 20–21 ປີ ແລະ ວ່າ ເປັນຣາສດອນ ເມືອງໄຊທານີ ນະຄອນ ຫລວງວຽງຈັນ.
ພາຍຫລັງ ດຳເນີນ ກາຣສືບສວນ-ສອບສວນ ແລ້ວ ຍີງສາວລາວ ທັງໝົດ ດັ່ງກ່າວ ກໍສາຣະພາບວ່າ ໄດ້ພາກັນ ຂ້າມດ່ານຊາຍແດນ ທີ່ຂົວມິຕພາບ ໜອງຄາຍ ຢ່າງຖືກຕ້ອງ ຕາມກົດໝາຍ ແລະ ພາກັນເຊົ່າຫ້ອງພັກ ຢູ່ໃນເຂຕຕົວເມືອງ ອຸດອນ ເພື່ອຂາຍບໍຣິກາຣ ທາງເພສ ແລະວ່າ ກ່ອນໃບອະນຸຍາດ ຜ່ານແດນ ຈະໝົດອາຍຸ ກໍພາກັນ ກັບຄືນ ສປປລາວ ແລ້ວກໍ ຂໍໃບອະນຸຍາດ ເດີນທາງ ໄປຍັງປະເທດໄທຽ ຕື່ມອີກ ແລະ ກໍເຄີຽພາກັນ ເຮັດແບບນີ້ ມາແລ້ວຫລາຍໆເທື່ອ ໃນຣະຍະຜ່ານມາ.
ເຈົ້າໜ້າທີ່ ຕຳຣວຈໄທຽ ໄດ້ແຈ້ງ ເພີ່ມວ່າ: ໃນຂະນະນີ້ ກຳລັງປະກອບ ສຳເນົາ ເພື່ອຍື່ນ ຕໍ່ທາງກາຣສາລ ໄທຽ ດຳເນີນ ຕາມກົດໝາຍ ເຊັ່ນດຽວກັບ ທີ່ເຄີຽ ໄດ້ປະຕິບັຕ ມາແລ້ວ ກັບຜູ້ຕ້ອງຫາ ທີ່ຈັບໄດ້ຕາມຫ້າງຮ້ານ ສະຖານທີ່ ບັນເທີງ ຄາຣາໂອເກະ ຕ່າງໆ ຕາມເຂຕຊາຍແດນ ແລະວ່າ ຫລັງຈາກ ຈັດສົ່ງ ກັບບ້ານເດີມ ແລ້ວ ສ່ວນຫລາຍ ກໍຈະຫາວິທີທາງ ເຂົ້າໄປຍັງ ປະເທດໄທຽ ຄືນໃໝ່ ດັ່ງກ່າວນີ້ຕລອດມາ.