ປັດຈຸບັນ ຮູບແບບ ການຄ້າມະນຸສ ໄດ້ປ່ຽນແປງ ໄປຈາກແຕ່ກ່ອນ ແລະວິທີນຶ່ງ ທີ່ອາດຈະບໍ່ແມ່ນ ວິທີໃໝ່ ພໍປານໃດ ກໍຄືການໃຊ້ ຜູ້ຊາຍ ຊາວຕ່າງຊາດ ເຂົ້າມາຕົວະຍົວະ ຫລອກຂໍແຕ່ງງານ ກັບ ແມ່ຍິງສາວລາວ ເມື່ອແຕ່ງງານ ແລະສາມາດ ພາອອກນອກ ປະເທດໄດ້ແລ້ວ ຜູ້ເປັນຜົວປອມ ກໍຈະບັງຄັບ ໃຫ້ຕົກເປັນເຫຍື່ອ ຂາຍບໍຣິການ ທາງເພດ. ນັກວິຊາການ ຕ້ານການ ຄ້າມະນຸສ ໃນລາວ ເປີດເຜີຍວ່າ:
"ຍັງມີຫລາຍ ຂະບວນການ ຕົວນີ້ ເພາະວ່າມັນ ບໍ່ເປັນພຽງ ແຕ່ເຣື່ອງ ທີ່ໂຍກຍ້າຍ ກັນໄປ ຫລືວ່າ ການຄ້າມະນຸສ ທັມມະດາ ຂະເຈົ້າເອົາເຣື່ອງ ຄວາມຮັກມາເປັນ ການຫຼອກລວງ ກໍຄື ການແຕ່ງງານເນ໋າະ ຄືການ ຄ້າມະນຸສ ຢູ່ລາວ ເລີ້ມມີບັນຫາ ເຣື່ອງຄົນຕ່າງຊາດ ມາແຕ່ງງານແລ້ວ ເອົາໄປຂາຍຕໍ່ ດຽວນີ້ ຣັຖບານລາວ ກໍມີບັນຫາວ່າ ຄົນລາວອອກໄປ ແລ້ວ ກໍສູນຫາຍໄປ ຫລາຍຄົນ".
ນາງເວົ້າຕໍ່ໄປວ່າ ແຕ່ກ່ອນ ຂະບວນການ ຄ້າມະນຸສ ໃຊ້ຊາວບ້ານ ທີ່ຄຸ້ນເຄີຍກັນ ໄປໂອ້ລົມ ຊັກຊວນ ໄປເຮັດການ ໃນຕ່າງປະເທດ ໂດຍສເນີໃຫ້ ຣາຍໄດ້ດີ ແລະ ຈ່າຍເງິນ ລ່ວງໜ້າ ໃຫ້ພໍ່ແມ່ ຜູ້ປົກຄອງ. ແຕ່ຫລັງຈາກ ທີ່ຣັຖບານໄດ້ມີ ມາຕການ ຄວບຄຸມດີຂຶ້ນ ຂະບວນການ ຄ້າມະນຸສ ກໍປ່ຽນແຜນ ແລະ ມາໃນຮູບແບບ ຂໍແຕ່ງດອງ ຢ່າງຖືກຕ້ອງ ຈົນພາອອກໄປ ຕ່າງປະເທດໄດ້.
ນາງເວົ້າເຕືອນວ່າ ຫາກແມ່ຍິງລາວ ຈະແຕ່ງງານ ກັບຊາຍຕ່າງຊາດ ຕ້ອງພິຈາຣະນາ ກວດສອບ ໃຫ້ຄັກແນ່ກ່ອນ ຢ່າຫລົງຄາຣົມ ຮີບຮ້ອນ ຟ້າວແຕ່ງງານ ໂດຍຫວັງແຕ່ ຢາກໄປຕ່າງປະເທດ ເພື່ອຫວັງ ຈະມີຊີວິດ ທີ່ດີຂຶ້ນ ເພາະອາດຈະຕົກ ເປັນເຫຍື່ອ ຂອງຂະບວນການ ຄ້າມະນຸສ ໄດ້ງ່າຍດາຍ.