ແມ່ຍິງລາວຖືກບັງຄັບ ໃຫ້ຄ້າປະເວນີ

ເຈົ້າໜ້າທີ່ ຕໍາຣວດ ແຂວງສົງຂາ ເປີດເຜີຍ ຕໍ່ຜູ້ສື່ຂ່າວ ເອເຊັຍເສຣີວ່າ ປັດຈຸບັນ ມີແມ່ຍິງລາວ ຈໍານວນຫລາຍ ຖືກນາຍໜ້າ ຄ້າມະນຸສ ຕົວະຍົວະ ມາເຮັດວຽກ ຢູ່ຕາມຮ້ານ ນວດແຜນໂບຮານ ແລະ ເປັນຄົນໃຊ້ ຕາມບ້ານເຮືອນ ໃນແຂວງສົງຂາ ປະເທດໄທ ກ່ອນທີ່ຈະຖືກ ບັງຄັບ ໃຫ້ຄ້າ ປະເວນີ ໃນທີ່ສຸດ. ພັນຕໍາຣວດເອກ ສຸຣະເຊດ ຫັກພານ ຜູ້ກໍາກັບການ ສະຖານີ ຕໍາຣວດ ເມືອງຫາດໃຫຍ່ ແຂວງສົງຂາ ເວົ້າກ່ຽວກັບ ເຣື່ອງນີ້ວ່າ:

"ແມ່ຍິງລາວ ດຽວນີ້ ເຂົາລືກັນວ່າ ມີມາເຮັດວຽກ 2 ປະເພດ ຫລັກໆຄື ນວດແຜນໂບຮານ ແລະ ເປັນແມ່ບ້ານ ຄົນໃຊ້ໃນເຮືອນ ໃນກໍຣະນີ ທີ່ຖືກ ຕົວະຍົວະ ມາ ຄືຈະໃຫ້ເປັນ ພະນັກງານ ນວດແຜນ ໂບຮານ ກ່ອນ ຕໍ່ມາກໍຖືກ ບັງຄັບໃຫ້ ຄ້າປະເວນີ".

ທ່ານເວົ້າ ຕໍ່ໄປວ່າ ແມ່ຍິງລາວ ທີ່ຖືກຕົວະຍົວະ ມາເຮັດວຽກຢູ່ ໃນແຂວງສົງຂາ ແລະຄ້າປະເວນີ ໄດ້ດົນ ພໍສົມຄວນ ພວກນາຍໜ້າ ກໍຈະມາຍົວະ ວ່າຈະພາໄປ ເຮັດວຽກຢູ່ ມາເລເຊັຍ ສິງກະໂປ ຫລື ສະຫະຣັດ ອາຣັບ ເອມີເຣສ ຊຶ່ງຈະໄດ້ ຄ່າຈ້າງສູງ ແຕ່ຕ້ອງໄດ້ເສັຍຄ່າ ວີຊາຜ່ານແດນ 5 ຫາ 8 ໝື່ນບາດ ຊຶ່ງພວກແມ່ຍິງ ເລົ່ານີ້ຕ້ອງໄດ້ ເຮັດວຽກເປັນ ໂສເພນີ ໄປຕລອດຊີວິດ ເພື່ອຫາເງິນມາ ໃຊ້ໜີ້ຄ່າ ນາຍໜ້າ ແລະວີຊາ. ທ່ານ ພັນຕໍາຣວດເອກ ສຸຣະເຊດ ຈຶ່ງສັ່ງເຕືອນ ມາຍັງ ແມ່ຍິງລາວ ທີ່ຢາກມາຫາ ເຮັດວຽກຢູ່ ແຂວງສົງຂາ ປະເທດໄທ ໃຫ້ລະມັດ ລະວັງ ຢ່າໄດ້ຫລົງເຊື່ອ ຫາກບໍ່ຢາກ ເປັນທາດຂອງ ພວກຄ້າມະນຸສ ໄປຕລອດ ຊີວິດ.

ແມ່ຍິງລາວ ມັກພາກັນມາ ເປັນໝູ່ ມາເຮັດວຽກ ເປັນໝໍນວດ ແລະ ຄ້າປະເວນີ ຢູ່ ແຂວງສົງຂາ ປະເທດໄທ ໂດຍສະເພາະ ເມືອງສະເດົາ ທີ່ຕິດກັບ ມາເລເຊັຍ ຍ້ອນວ່າໄດ້ ເງິນດີ ແຕ່ກໍມີຄວາມສ່ຽງ ຕໍ່ການຖືກບັງຄັບ ຂົ່ມເຫັງ ເອົາລັດເອົາປຽບ ຈາກນາຍໜ້າ ຄ້າມະນຸສ.