ຂ.ສາຣະວັນເພີ້ມປ້ອງກັນ ການຄ້າມະນຸດ

ປັດຈຸບັນ ການປ່າວເຕືອນ ໃຫ້ຄວາມຮູ້ ແກ່ບັນດາ ແມ່ຍິງ ຕາມເຂດ ຫ່າງໄກ ສອກຫຼີກ ຂອງ ທາງການ ເພື່ອປ້ອງກັນ ບໍ່ໃຫ້ຕົກ ເປັນເຫຍື່ອ ຂອງ ຂະບວນການ ຄ້າມະນຸດ ຍັງບໍ່ໄດ້ ຮັບຄວາມ ສໍາເຣັດ ເທົ່າທີ່ຄວນ.
ໂພໄຊສວັດ
2011-12-27
ອີແມວລ໌
ຄໍາເຫັນ
Share
ພິມ

ກົດຟັງສຽງ

ຍັງມີ ແມ່ຍິງລາວ ຈໍານວນ ບໍ່ໜ້ອຍ ທີ່ຕ້ອງການ ວຽກເຮັດ ງານທໍາ ຈື່ງຖືກກຸ່ມ ຄ້າມະນຸດ ຫຼອກລວງໄປ ໃນທາງບໍ່ດີ ເຈົ້າໜ້າທີ່ ຈາກອົງການ ປົກປ້ອງ ການ ຄ້າມະນຸດ ແຂວງ ສາລະວັນ ເວົ້າກ່ຽວກັບ ເຣື້ອງນີ້ວ່າ:

"ພວກເຮົາ ລົງໄປ ພວກເຮົາກໍເວົ້າ ແຕ່ການຕ້ານ ເຂົາວ່າໝູ່ເຮົາ ເຮັດແນວໃດ ເຂົາຈະບໍ່ຕົກ ເຂົ້າຢູ່ໃນ ເຫຍື່ອຂອງການ ຄ້າມະນຸດ ກໍຕ້ານ ບໍ່ທັນໄດ້ ແລະ ຄິດແຕ່ວ່າ ໝູ່ມາຊວນໄປ ໄປແລ້ວ ກໍໄປໂລດ ອັນນີ້ ເພາະວ່າເຂົາ ບໍ່ມີຄວາມຮູ້ ແລະ ບວກກັບ ທຶນຮອນ ບໍ່ມີແນ່ ພັດຢາກໄດ້ເງິນ ຂັ້ນວ່າຊັ້ນ ເຂົາມາຍົວະເອົາ ກໍເລີຍໄປ ຈໍານວນນຶ່ງ ຫັ້ນ".

ນາງເວົ້າ ຕໍ່ໄປອີກວ່າ ແມ່ຍິງ ທີ່ຖືກ ຕົວະຍົວະ ໄປໄດ້ງ່າຍ ຕາມເຂດ ຫ່າງໄກ ສອກຫລີກ ສ່ວນໃຫຍ່ ທຸກຍາກ ຂາດເຂີນ ຕ້ອງການລາຍໄດ້ ເພື່ອຊ່ວຍ ຄອບຄົວ ທີ່ຜ່ານມາ ແມ່ຍິງ ທີ່ຖືກ ຕົວະຍົວະໄປ ຈະຫາຍ ສາບສູນ ໄປເລີຍ ໂດຍບໍ່ມີໃຜ ຮູ້ວ່າເປັນ ຕາຍຮ້າຍດີ ຈັ່ງໃດ ແຕ່ມີບາງ ກໍຣະນີ ໂຊກດີ ກັບຄືນມາຫາ ຄອບຄົວໄດ້ ແຕ່ກໍຕ້ອງ ໃຊ້ເວລາດົນ ພໍສົມຄວນ ໃນການ ປິ່ນປົວ ທາງສະພາບ ຈິດໃຈ ກ່ອນຈະເປັນ ປົກກະຕິ ໄດ້.

ເຖິງຢ່າງໃດ ກໍຕາມ ເຈົ້າໜ້າທີ່ ຈາກອົງການ ປົກປ້ອງການ ຄ້າມະນຸດ ແຂວງ ສາລະວັນ ເວົ້າວ່າ ການໂຄສະນາ ປ່າວເຕືອນ ໃຫ້ຄວາມຮູ້ ແກ່ບັນດາ ແມ່ຍິງ ກ່ຽວກັບການ ຄ້າມະນຸດ ໂດຍສະເພາະ ຜົນຮ້າຍ ຂອງມັນ ໄດ້ດໍາເນີນ ມາດົນນານ ແຕ່ກໍບໍ່ໄດ້ຜົນ ເທົ່າທີ່ຄວນ ນາງເຫັນວ່າ ຄວນປ່ຽນ ວິທີໂດຍການ ຊອກວຽກເຮັດ ງານທໍາ ທີ່ຖາວອນ ໃຫ້ຂະເຈົ້າ ເພື່ອໃຫ້ພວກ ຂະເຈົ້າມີ ອາຊີພ ແລະ ລາຍໄດ້ ກຸ້ມຢູ່ກຸ້ມກິນ ຊຶ່ງ ອາດຈະຫຼຸດຜ່ອນ ຈາກການ ຕົກເປັນເຫຍື່ອ ຂອງ ຂະບວນການ ຄ້າມະນຸດ ໄດ້ດີກວ່າ.

ເຕັມຫນ້າ