ໂຮງງານຜລິຕໄຍເຈັ້ຽ ຂອງຈີນ ທີ່ສວັນນະເຂຕ

ບໍຣິສັທຈີນ ກໍາລັງຕຣຽມ ກາຣກໍ່ສ້າງ ໂຮງງານຜລິຕ ໄຍເຈັ້ຽ ຢູ່ແຂວງ ສວັນນະເຂຕ.
ຫວາດ ສີມູນ
2010-02-25
ອີແມວລ໌
ຄໍາເຫັນ
Share
ພິມ

ບໍຣິສັທ ດວງຕາເວັນ ຈາກ ສປຈີນ ກຳລັງຕຣຽມ ກາຣລົງທຶນ ສຳຫລັບໂຄງກາຣ ປູກພືຊ ອຸຕສາຫະກັມ ແລະ ກໍ່ສ້າງ ໂຮງງານຜລິຕ ໄຍເຈັ້ຽ ໃນພື້ນທີ່ກວ່າ 30,000 ເຮັກຕ໊າຣ໌ ຢູ່ແຂວງ ສວັນນະເຂຕ ໃນມູລຄ່າ ຂອງກາຣລົງທຶນ ທັງໝົດ ບໍ່ຕໍ່າກວ່າ 400 ລ້ານດອລລາຣ໌ ສະຫະຣັຖ ດັ່ງເຈົ້າໜ້າທີ່ ແຜນກກະສິກັມ ແລະປ່າໄມ້ ປະຈຳ ແຂວງສວັນນະເຂຕ ໄດ້ກ່າວວ່າ:

“ທາງຣັຖບາລ ເພິ່ນກໍເຫັນດີແລ້ວ ແຕ່ວ່າຍັງຖ້າ ເຣື່ອງສະພາບປ່າໄມ້ ເຂົາເຈົ້າ ກຳລັງຕຣຽມ ສຳຣວຈຢູ່ ສຳຣວຈເຂຕ ໂຮງງານ 300 ເຮັກຕ໊າຣ໌ ເຂົາເຈົ້າຊິເຮັດ ຢູ່ເຂຕ ເມືອງເຊໂປນ ເຂົາເຈົ້າກຳລັງ ດຳເນີນ ເອກສາຣ ສິລົງໄປ ສຳຣວຈຢູ່ເນາະ”.

ເຈົ້າໜ້າທີ່ລາວ ດັ່ງກ່າວ ໄດ້ແຈ້ງເພີ່ມວ່າ ທາງບໍຣິສັທ ດວງຕາເວັນ ໄດ້ສເນີ ຂໍສັມປະທານ ກັບທາງ ຣັຖບາລລາວ ໃນພື້ນທີ່ກວ່າ 30,000 ເຮັກຕ໊າຣ໌ ດັ່ງກ່າວ ກໍຮວມ ທັງ 300 ເຮັກຕ໊າຣ໌ ສຳຫລັບປຸກສ້າງ ໂຮງງານ ແລະ ໃນຂັ້ນຕົ້ນ ຈະໄດ້ມີກາຣ ປູກຕົ້ນໄມ້ ທີ່ເອີ້ນວ່າ “ກະຖິນນາລົງ” ໃນພື້ນທີ່ 9,000 ເຮັກຕ໊າຣ໌ ຢູ່ເຂຕເມືອງພິນ ແລະ ເມືອງເຊໂປນ ໂດຽມີກຳໜົດ ໃຫ້ປູກແລ້ວ ພາຍໃນປີ 2010 ນີ້.

ພ້ອມດຽວກັນນີ້ ທີ່ປຶກສາ ຂອງບໍຣິສັທ ກໍໃຫ້ກາຣ ອະທິບາຍ ເພີ່ມວ່າ ໂຮງງານ ທີ່ກຳລັງ ຕຣຽມກໍ່ສ້າງ ຊຶ່ງຈະເຣີ່ມ ແຕ່ປີ 2011 ໄປ ເພື່ອໃຫ້ສ້າງ ແລ້ວພາຍໃນປີ 2014 ຈະເປັນໂຮງງານ ຜລິຕໄຍເຈັ້ຽ ເພື່ອສົ່ງອອກ ທີ່ຄາດວ່າ ຈະສາມາດຜລິຕ ໄດ້ບໍ່ຕໍ່າກວ່າ 3 ລ້ານຕັນຕໍ່ປີ ແລະ ກໍເປັນໂຮງງານ ສຳຫລັບ ກາຣຜລິຕໄຍເຈັ້ຽ ແຫ່ງທຳອິດ ໃນເມືອງລາວ.

ເຈົ້າໜ້າທີ່ກະສິກັມ ແລະປ່າໄມ້ ແຂວງສວັນນເຂຕ ໄດ້ກ່າວເນັ້ນ ເພີ່ມວ່າ ທາງບໍຣິສັທ ກໍກຳລັງປະເມີນ ດ້ານຜົລກະທົບ ຕໍ່ສິ່ງແວດລ້ອມ ຢູ່ໃນ ປັຈຈຸບັນນີ້ ກ່ອນທີ່ຈະໄດ້ ເຣີ່ມລົງມີ ກາຣກໍ່ສ້າງໃດໆ ໃນຂັ້ນຕໍ່ໄປ.

ເຕັມຫນ້າ