Kuwait ຈະພັທນາຣະບົບ ຊົລປະທານ ທີ່ວຽງຈັນ

Kuwait ສຶກສາ ໂຄງການ ພັທນາ ຊົລປະທານ ຮອບດ້ານ ເພື່ອການປູກເຂົ້າ ໂດຍຫວັງຈະ ຮັບຊື້ເຂົ້າ ຈາກລາວ ໃນພາຍໜ້າ.
ມະນີຈັນ
2010-06-07
Share

ຣັຖບານປະເທດ Kuwait ສຶກສາ ຄວາມເປັນໄປໄດ້ ເລື່ອງໂຄງການພັທນາ ຊົລປະທານ ຮອບດ້ານ ທີ່ເມືອງໄຊທານີ ນະຄອນຫລວງວຽງຈັນ ໂດຍມີເປົ້າໝາຍ ທີ່ຈະພັທນາ ການປູກເຂົ້າ ໃນລາວ ແບບຄົບວົງຈອນ ເພື່ອສົ່ງອອກຂາຍ ໄປໃຫ້ປະເທດ Kuwait -ຕາມຄໍາເວົ້າ ຂອງເຈົ້າໜ້າທີ່ ທ່ານນຶ່ງ ຈາກກົມ ຊົລປະທານ ໃນນະຄອນ ຫລວງວຽງຈັນ:

"ໂຄງການພັທນາ ຊົລປະທານ ຮອບດ້ານແບບວ່າ ເລີ່ມແຕ່ກໍ່ສ້າງ ຈົນຮອດຂະບວນ ການຜລິດ ເປັນແບບຊົລ ກະເສຕກອນນະ ເຂົາເຈົ້າເລີ່ມ ສິສຶກສາຄວາມ ເປັນໄປໄດ້ນະ".

ໂຄງການນີ້ເປັນ ການສນັບສນູນ ດ້ານງົປມານ ຈາກຣັຖບານ Kuwait 350 ພັນໂດລາ ສະຫະຣັຖ ເພື່ອສຶກສາ ຄວາມເປັນໄປໄດ້ ຂອງໂຄງການ ໃນເນື້ອທີ່ປະມານ 4 ພັນເອັກຕາຣ ຊຶ່ງຂນະນີ້ ຢູ່ໃນຂັ້ນຕອນ ການຄັດເລືອກ ບໍຣິສັດທີ່ ປຶກສາ ຈາກຕ່າງປະເທດ ເພື່ອເຂົ້າຮ່ວມໂຄງການ. ຖ້າຜົລການສຶກສາ ນັ້ນ ພົບວ່າ ມີຄວາມ ເໝາະສົມ ກໍຈະດໍາເນີນ ໂຄງການ ໂດຍເລີ່ມຈາກການ ພັທນາຣະບົບ ຊົລປະທານ ເຂົ້າໃນພື້ນທີ່. ຫລັງຈາກນັ້ນ ກໍຈະເຮັດ ໂຄງການຮ່ວມ ກັບກະເສຕກອນ ໂດຍມີການ ສນັບສນູນ ເປັນແນວພັນເຂົ້າ ການໃຫ້ຄວາມຮູ້ ຊ່ວຍເຫລືອດ້ານ ວິຊາການ ຕລອດຮອດ ການສ້າງໂຮງສີ ແລະຕລາດ ເພື່ອຮັບຊື້ເຂົ້າ ທີ່ຜລິດໄດ້ຈາກ ໂຄງການ.

ທ່ານກ່າວຕື່ມວ່າ ຖ້າໂຄງການນີ້ ຫາກສໍາເຣັດ ກໍຈະເປັນປະໂຫຍດ ຫລາຍສໍາລັບ ກະເສຕກອນລາວ ຜູ້ເຂົ້າຮ່ວມໂຄງການ ແລະທັງຈະເປັນ ການພັທນາ ການປູກເຂົ້າ ໃນລາວ ເພື່ອເປັນສິນຄ້າ ສົ່ງອອກ ທີ່ມີຄຸນນະພາບ ອີກດ້ວຍ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ