ທຸຣະກິດ ຕັດຫຍິບລາວ ໃນປີ 2009 ເລີ່ມບໍ່ສົດໃສ ຫລັງເກີດ ວິກິດການ ທາງດ້ານການເງິນ ອັນໄດ້ສົ່ງຜົນກະທົບ ເຮັດໃຫ້ຕລາດ ສະຫະຣັດ ຫລຸດຈໍານວນ ການສັ່ງຊື້ ຜລິດຕະພັນ ຕັດຫຍິບ ຈາກລາວ ໃນປີ 2009 ເມື່ອປຽບທຽບໃສ່ ປີ 2008, ຕາມຣາຍງານ ກະແສຂ່າວທ້ອງຖີ່ນ ວັນທີ 5 ພຶສຈິການີ້.
ປະທານ ສະມາຄົມ ອຸດສາຫະກໍາ ຕັດຫຍິບລາວ ໄດ້ກ່າວ ຕໍ່ຊື່ມວນຊົນ ທ້ອງຖີ່ນວ່າ ເນື່ອງຈາກ ໂລກປັຈຸບັນ ມີການພົວພັນກັນ ຫລາຍຂຶ້ນ ເມື່ອປະເທດນຶ່ງ ເກີດມີບັນຫາ ກໍຈະສົ່ງ ຜົນກະທົບໂດຍລວມ ໄປຍັງປະເທດຕ່າງໆ. ຍີ່ງປະເທດ ມະຫາອໍານາດ ຫລື ປະເທດ ເສຖກິດ ຍັກໃຫຍ່ ກໍຍີ່ງຈະສົ່ງຜົນກະທົບຫລາຍ ແລະ ຂະຫຍາຍວົງກວ້າງ.
ສໍາລັບ ສປປລາວເອງ ກໍຫລີກລ່ຽງ ບໍ່ໄດ້ ຈາກຜົນກະທົບ ດັ່ງກ່າວ ເປັນຕົ້ນ ໃນຂົງເຂດການຄ້າ ແຕ່ຈະກະທົບຫລາຍ ຫລື ໜ້ອຍ ເທົ່ານັ້ນ. ເວົ້າສະເພາະ ຂະແໜງ ຕັດຫຍິບລາວ ຊຶ່ງເປັນ 1 ໃນ 3 ເສົາຄໍ້າເສຖກິດ ທີ່ສໍາຄັນ ຂອງລາວນັ້ນ ກໍສົ່ງ ສັນຍານວ່າ ທຸຣະກິດ ໃນປີ 2009 ຈະບໍ່ສົດໃສ ເທົ່າທີ່ຄວນ. ຢ່າງໃດກໍຕາມ ສປປລາວ ຍັງຖືວ່າ ໂຊກດີຢູ່ ເພາະມີການພົວພັນ ການຄ້າ ກັບສະຫະຣັດ ໃນປະລິມານ ໜ້ອຍ.
ຍອດຜລິດຕະພັນ ຕັດຫຍິບ ທີ່ລາວສົ່ງອອກ ທັງໝົດນັ້ນ ຕລາດສະຫະຣັດ ກວມເອົາພຽງ 15 ເປີເຊັນ ແຕ່ກໍເຮັດໃຫ້ ຕັດຫຍິບລາວ ຕ້ອງໄດ້ຊອກຫາ ຕລາດ ແຫ່ງໃໝ່ ຕື່ມອີກ ແລະ ຖ້າຫາກມີ ຕລາດໃໝ່ເກີດຂຶ້ນ ບັນຫາດັ່ງກ່າວ ກໍຈະບໍ່ເປັນ ຜົນກະທົບ ຫຍັງຫລາຍ.
ໃນປີ 2007 ຍອດມູນຄ່າ ການສົ່ງອອກ ສີນຄ້າ ຕັດຫຍິບ ສູງເຖິງ 157 ລ້ານໂດລາ ສະຫະຣັດ ໂດຍມີຕລາດຫລັກ ທີ່ຢູໂຣບ ກວມເອົາ 80 ສ່ວນຮ້ອຍ, ອະເມຣິກາ 15 ສ່ວນຮ້ອຍ ແລະ ຍີ່ປຸ່ນຈໍານວນນຶ່ງ.
ສະເພາະ ຕົວເລກ 6 ເດືອນຕົ້ນປີ 2008 ລາວ ສາມາດ ສົ່ງອອກຜລິດຕພັນຕັດຫຍິບ ໄດ້ຫລາຍກວ່າ 80 ລ້ານ ໂດລາ ສະຫະຣັດ ຂະນະທີ່ ຕົວເລກ ບໍ່ເປັນທາງການ ໃນ 9 ເດືອນ ປີ 2008 ມີຫລາຍກວ່າ 100 ລ້ານ ໂດລາສະຫະຣັດ.