ບ່ອນລ້ຽງສັຕໜ້ອຍລົງ ຍ້ອນປູກຕົ້ນຢາງພາຣາ
ໂຄງກາຣປູກ ຕົ້ນຢາງພາຣາ ຢູ່ແຂວງເຊກອງ ສົ່ງຜົລກະທົບ ຕໍ່ກາຣລ້ຽງສັຕ ຂອງປະຊາຊົນ ທ້ອງຖີ່ນ.
-
ຫວາດ ສີມູນ
2009-07-09 -
-
-
Your browser doesn’t support HTML5 audio
ກາຣທີ່ທາງກາຣ ສປປລາວ ໄດ້ໃຫ້ສັມປະທານ ແກ່ເອກຊົນຊາວ ຕ່າງປະເທສ ລົງທຶນໃນໂຄງກາຣປູກຕົ້ນ ຢາງພາຣາ ໃນບໍຣິເວນ ເມືອງທ່າແຕງ ແຂວງເຊກອງ ໄດ້ສົ່ງຜົລກະທົບຕໍ່ປະຊາຊົນ ທີ່ປະກອບອາຊີພ ລ້ຽງສັຕ ຕາມບໍຣິເວນ ໃກ້ຄຽງ ຍ້ອນເຂຕພື້ນທີ່ ສຳຫລັບລ້ຽງສັຕ ຕາມທັມຊາຕ ຫລຸດໜ້ອຍລົງ. ພ້ອມຍັງເຄີຽເກີດ ມີບັນຫາທີ່ມີ ກາຣລ່ວງລ້ຳເຂົ້າ ບຸກຣຸກເຂຕ ທີ່ດິນຂອງ ປະຊາຊົນນຳດ້ວຍ ດັ່ງເຈົ້າໜ້າທີ່ ກ່ຽວຂ້ອງປະຈຳ ແຂວງເຊກອງ ໄດ້ກ່າວວ່າ:
“ໂຄງກາຣປູກນີ້ ມັນມີບັນຫາ ແຕ່ກ່ອນບ່ອນ ລ້ຽງງົວ ລ້ຽງຄວາຍ ເຂົາປ່ອຍທັມຊາຕ ດຽວນີ້ພື້ນທີ່ ເຂົາລ້ຽງເມື່ອກ່ອນ ກໍຈັດເປັນບ່ອນປູກ ຢາງພາຣາ ໄປແລ້ວ ເຮັດໃຫ້ບ່ອນປູກ ນີ້ຈຳກັດເຂົ້າ ບ່ອນລ້ຽງງົວນີ້ ຈຳກັດເຂົ້າ.”
ເຈົ້າໜ້າທີ່ລາວ ດັ່ງກ່າວໄດ້ແຈ້ງ ເພີ່ມວ່າ ກາຣລ້ຽງສັຕ ເປັນອາຊີພສຳຄັນ ສຳຫລັບປະຊາຊົນ ສ່ວນໃຫຍ່ພາຍໃນແຂວງ. ແລະໃນເມື່ອມີກາຣ ປູກຢາງພາຣາແລ້ວ ຊາວບ້ານບາງສ່ວນ ກໍຕ້ອງໄດ້ຍ້າຍ ໄປລ້ຽງສັຕ ຢູ່ບ່ອນໃໝ່ ແລະ ທາງເຈົ້າໜ້າທີ່ ກໍວ່າຈະລິເລີ້ມ ໂຄງກາຣປູກຫຍ້າ ເພື່ອກາຣລ້ຽງສັຕ ຊື່ງກໍຕ້ອງໄດ້ມີກາຣປ່ຽນວີທີ ກາຣລ້ຽງສັຕ ຈາກແບບທັມຊາຕ ມາເປັນແບບລ້ຽງ ຢູ່ໃນຟາຣ໌ມ ແຕ່ກໍຕ້ອງໄດ້ ຖ້າງົບປະ ມານ ຈາກທາງຣັຖບາລ ເສັຽກ່ອນ. ແຕ່ສະເພາະບັນຫາ ທາງດ້ານກາຣເຂົ້າ ບຸກຣຸກເຂຕພື້ນທີ່ ນັ້ນທາງເຈົ້າໜ້າທີ່ ກໍກຳລັງລົງໄປ ສຳຣວຈ ເພື່ອຊ່ວຍແກ້ໄຂ ດັ່ງທີ່ທ່ານໄດ້ ໃຫ້ກາຣ ອະທິບາຍ ຕື່ມວ່າ:
“ດຽວນີ້ກະຊວງ ກະສິກັມ ແລະ ປ່າໄມ້ເພີ່ນໄດ້ ມາລົງສຳຣວຈ ທີ່ດີນໃໝ່ຄືນ ໝົດດ ຽວນີ້ 70-80% ໃກ້ຈະສຳເຣັຈແລ້ວ ສຳຫລັບແຂວງ ເຊກອງ ເພາະວ່າເພື່ອທີ່ ຈັດສັນທີ່ດີນ ດີນຕົວໃດທີ່ ສັມປະທານ ດີນຕົວໃດ ຂອງປະຊາຊົນ ດີນປະເພດ ທຸກປະເພດດີນ”
ຢ່າງໃດກໍຕາມ ໂຄງກາຣປູກ ຢາງພາຣາ ໃນແຂວງເຊກອງ ສ່ວນໃຫຍ່ເປັນກາຣ ລົງທຶນຈາກ ປະເທສວຽຕນາມ ຊື່ງປັຈຈຸບັນ ກໍມີ3ບໍຣິສັທ ດ້ວຍກັນທີ່ມີ ກາຣລົງທຶນ ຢູ່ເຂຕເມືອງທ່າແຕງ ແລະ ເມືອງລາມານ ແຕ່ປີ2006 ເປັນຕົ້ນມາຮວມ ເປັນພື້ນທີ່ ທັງໝົດປະມານ 5,000ເຮັກຕ໊າ.