ອົງການ ອາຫານ ແລະ ກະສິກໍາ ຂອງສະຫະ ປະຊາຊາດ, ຫ້ອງການ ປະສຸສັດ ຂອງໄທພ້ອມດ້ວຍ ຫ້ອງການ ກະສິກໍາ ຂອງລາວ ໄດ້ຈັດຕັ້ງ ໂຄງການລ້ຽງສັດຂື້ນ ໃນແຂວງຈໍາປາສັກ ເພື່ອຊ່ວຍເຫລືອ ຊາວບ້ານ ທີ່ທຸກຍາກ ເພື່ອໃຫ້ ເຂົາເຈົ້າ ປັບປຸງ ການລ້ຽງສັດ ໂດຍຊ່ວຍ ຝືກແອບ ວິທີລ້ຽງ ແລະ ປະກອບ ວິຊາການ ເທັກໂນໂລຈີ ການລ້ຽງໃຫ້.
ຈຸດປະສົງ ສ່ວນໃຫ່ຽ ແມ່ນເພື່ອໃຫ້ປະຊາຊົນ ສາມາດ ລ້ຽງງົວໄດ້ ຫລາຍຂື້ນ ແລະ ສາມາດ ສົ່ງອອກໄປຂາຍ ໃນຕລາດ ປະເທດ ເພື່ອນບ້ານ ເພື່ອເປັນລາຍໄດ້ ຂອງປະຊາຊົນເອງ. ໂຄງການ ດັ່ງກ່າວ ເປັນສ່ວນນຶ່ງ ຂອງແຜນການ ຂອງອານຸ ພູມີພາກ ແມ່ນໍ້າຂອງຫລື GMS, ຕາມ ການ ເປີດ ເຜີ ຽ ຂອງ ອົງການຂ່າວ IRIN.
ລາຍງານວ່າ ໂຄງການນັ້ນ ແມ່ນອີງເອົາ ຕາມຄວາມຄິດສ້າງທະນາຄານ ສັດລ້ຽງ, ໝາຍຄວາມວ່າ ຈະມອບງົວ ປະສົມພັນ ໃຫ້ແກ່ປະຊາຊົນ ໃນຊຸມຊົນ ໂດຍກໍານົດວ່າ ແມ່ນຜູ້ໃດ ຄວນອະນຸຍາດ ໃຫ້ຢືມງົວປະສົມພັນ ເພື່ອນໍາໄປລ້ຽງ ໃຫ້ມັນປະສົມພັນ ແລະ ອອກແມ່ແຜ່ລູກ. ຫລັງຈາກ ງົວອອກລູກແລ້ວຜູ້ລ້ຽງງົວ ຈະຮັກສາ ງົວນ້ອຍໄວ້ ແຕ່ຕ້ອງ ເອົາຝູງງົວ ປະສົມພັນ ສົ່ງຄືນ ທະນາຄານ ສັດລ້ຽງ ເພື່ອຈະໃຫ້ຊາວບ້ານ ຄົນອື່ນສາມາດ ຢືມໄປລ້ຽງຕໍ່, ຕາມ ການ ເປີດ ເຜີຽ ຂອງ ທ່ານ ອໍຣະວັນ ອະນັນວໍຣະນິດ, ເຈົ້າ ໜ້າ ທີ່ ຂອງ ອົງ ການ ອາຫານ ແລະ ກະສິກໍາ ປະ ຈໍາ ເອ ເຊັຽຕະ ເວັນ ອອກ ສ່ຽງ ໃຕ້ .
ເພື່ອໃຫ້ໂຄງນີ້ ເກີດຂື້ນຫ້ອງການ ປະສຸສັດ ແຂວງສະກົນນະຄອນ ຂອງໄທ ໄດ້ຊ່ວຍເຫລືອ ປະກອບ ຝູງງົວ ພັນປະສົມທີ່ເອີ້ນວ່າ Brahmin-Thai ໃຫ້ ແລະ ໃນເດືອນ ພືດສະຈີກາ ນີ້ ເຈົ້າໜ້າທີ່ ອົງການອາຫານ ແລະ ກະສິກໍາ ເຈົ້າໜ້າທີ່ ປະສຸສັດໄທ ຈາກແຂວງ ສະກົນນະຄອນ ພ້ອມດ້ວຍ ເຈົ້າໜ້າທີ່ກະສິກໍາ ຂອງລາວ ໄດ້ເດີນທາງ ໄປບ້ານນາລານ ແຂວງຈໍາປາສັກ ເພື່ອມອບຝູງງົວ ແລະ ງົວເຖິກ ນື່ງໂຕ ໃຫ້ຊາວບ້ານ ເພື່ອລ້ຽງດູ.
ເຈົ້າໜ້າທີ່ ຕ້ອງໄດ້ສິດສອນ ວິທີລ້ຽງດູສັດ ໃຫ້ຖືກຕ້ອງ ເພື່ອໃຫ້ສັດອອກແມ່ແຜ່ລູກ ແລະ ມີຂນາດມາຕະຖານ ເພື່ອຈະສາມາດ ສົ່ງອອກ ໄປຂາຍ ໃນຕະລາດ ປະເທດເພື່ອນບ້ານໄດ້. ເຈົ້າໜ້າທີ່ ອົງການ ອາຫານ ແລະ ກະສິກໍາ ສະຫະ ປະຊາຊາດ ວ່າ ເຖິງແມ່ນວ່າໂຄງການນີ້ ເປັນການເລີ້ມຕົ້ນ ແຕ່ນ້ອຍໆ ແຕ່ຖ້າຫາກວ່າ ປະຊາຊົນ ສາມາດລ້ຽງ ໃຫ້ຖືກຕ້ອງນັ້ນຝູງສັດ ຂອງປະຊາຊົນ ກໍຈະເຕີບໃຫ່ຽ ຂື້ນໄດ້.