ເນື່ອງຈາກວ່າ ໃນລະຍະຜ່ານມາ ມີກຸ່ມພໍ່ຄ້າ-ແມ່ຄ້າ ໃນລາວ ໄດ້ຂື້ນຣາຄາສິນຄ້າ ໃນໂອກາດ ເທດສະການປີໃໝ່ ເກີນປົກະຕິ ເພາະສວຍໂອກາດ ໃນຕອນທີ່ມີ ນັກທ່ອງທ່ຽວ ເຂົ້າມາທ່ຽວ ໃນລາວຫລາຍ ດັ່ງນັ້ນ ເຈົ້າໜ້າທີ່ລາວ ຈຶ່ງໄດ້ອອກປະຕິບັດງານ ຄວບຄຸມຣາຄາສິນຄ້າ.
ທ່ານພູວຽງ ສີປະເສີດ, ຫົວໜ້າຜແນກ ອຸດສະຫະກັມ ແລະ ການຄ້າ ແຂວງວຽງຈັນ, ກ່າວວ່າ ຣາຄາສິນຄ້າ ຕ່າງໆ ໃນລະຍະບຸນສົງການປີໃໝ່ ປີນີ້ ຄົງຈະບໍ່ມີການຂື້ນ ຣາຄາ.
“ຣະຍະປີໃໝ່ ພວກເຮົາຄຸ້ມຄອງ ອັນນີ້ ມັນຕ້ອງມີການເຊັນສັນຍາ ຊື້-ຂາຍ ແຕ່ລະຮ້ານ ຖ້າຫາກວ່າ ຜູ້ໃດ ບໍ່ປະຕິບັດນັ້ນ ພວກເຮົາມີ ເຈົ້າໜ້າທີ່ ໄປກວດຮ້ານຄ້າ ໄປຕິດຕາມ ຖ້າຂາຍເກີນຣາຄາ ທີ່ພວກເຮົາ ກຳນົດພວກເຮົາ ຈະປັບໃໝ”
ທ່ານວ່າ ຣາຄາສິນຄ້າ ຈຳພວກເຫລົ້າເບັຽ ຫລື ອາຫານຕ່າງໆ ຈະຍັງຢູ່ ໃນຣາຄາ ປົກະຕິ ທຸກຢ່າງ. ຖ້າບໍ່ມີ ຄຳແຈ້ງການ ຈາກກະຊວງການຄ້າແລ້ວ ກໍຈະບໍ່ສາມາດຂື້ນ ຣາຄາສິນຄ້າໄດ້. ແມ່ຄ້າ-ພໍ່ຄ້າ ທີ່ລະເມີດກົດໝາຍ ກໍຈະຖືກລົງໂທດ.
“ແບບລັກສະນະ ກົດໝາຍທຸຣະກິດ ຂອງພວກເຮົານໍ ຖ້າຫາກວ່າ ເຈົ້າສວຍໂອກາດ ຂື້ນຣາຄາ ສິນຄ້າ ຈະປັບໃໝ ຄັ້ງທີນຶ່ງ 2 ລ້ານກີບ ຄັ້ງທີສອງ ພວກເຮົາ ຈະອົບຣົມສຶກສາ ແລະ ປັບໃໝ 5 ລ້ານກີບ ຄັ້ງທີສາມຈະເປັນ 10 ລ້ານກີບ ແລ້ວພວກເຮົາ ຈະໃຫ້ເລີກ ກິດຈະການເລີຽ.”
ທ່ານໄດ້ ຮຽກຮ້ອງ ໃຫ້ຜູ້ບໍຣິໂພກສິນຄ້າ ທີ່ໄດ້ຮັບຄວາມບໍ່ເປັນທັມ ຈາກພໍ່ຄ້າ-ແມ່ຄ້າ ສວຍໂອກາດ ຈົ່ງຮ້ອງຮຽນ ໄປຍັງກະຊວງການຄ້າ ຫລື ຮ້ອງຮຽນ ຜ່ານພະນັກງານ ກວດສອບສິນຄ້າ ປະຈຳແຂວງ ເພື່ອໃຫ້ເຈົ້າໜ້າທີ່ ທຳການກວດກາ. ໃນທາງປະຕິບັດແລ້ວ ການຄວບຄຸມຣາຄາ ສິນຄ້ານີ້ ມັນກໍບໍ່ແມ່ນ ເຣື້ອງ່າຍດາຍ, ພໍ່ຄ້າ-ແມ່ຄ້າ ກໍມີວິທີຫລີກລຽງ ເຈົ້າໜ້າທີ່ ໃນຫລາຍຮູບຫລາຍແບບ ເຊັ່ນວ່າ ການຊຸກເຊື່ອງ ສິນຄ້າ ຫລື ຮ້າຍໄປກ່ວານັ້ນ ກໍໃຫ້ສິນບົນ ແກ່ເຈົ້າໜ້າທີ່ ກວດສອບສິນຄ້າ ເພື່ອບໍ່ໃຫ້ ມາກວດ ຫລື ກວດເຫັນແລ້ວ ກໍບໍ່ມີການເອົາມາຕະການ ປັບໃໝແຕ່ຢ່າງໃດ.