ວຽດນາມສ້າງໂຮງແຮມ ສາມດາວໃນລາວ

ກຸ່ມລົງທືນ ໄຊງ່ອນ ຜູ້ທີ່ມີ ຄວາມສົນໃຈ ໃນການລົງທືນ ຫລາຍຂແນງ ທຸຣະກິດ ໃນລາວ ຊື່ງໃນນັ້ນ ຮ່ວມດ້ວຍ ອະສິງຫາ ຣິມມະຊັບ ການພັທນາ ໂຄງຮ່າງພື້ນຖານ ການເງີນ ການທະນາຄານ ແລະ ພລັງງານ ໄດ້ເລີ້ມລົງມື ກໍ່ສ້າງໂຮງແຮມ ລາວຮົງ ທີ່ແຂວງຫົວພັນ. ນີ້ເປັນ ໂຄງການຂອງ ບໍຣິສັດ ອັນທີ 3 ທີ່ໄດ້ຮັບ ອະນຸຍາດ ໃນການກໍ່ສ້າງ ໃນລາວ.

ໂຮງແຮມ 3 ດາວ ທີ່ມີການ ລົງທືນ ປະມານ 3 ລ້ານໂດລາ ທີ່ແຂວງຫົວພັນ ຂອງກຸ່ມດ່ັງກ່າວ ຈະສ້າງໃຫ້ ໄດ້ມາຕຖານ ສາກົນ ຈະເປັນໂຮງແຮມ ຣະດັບໃຫຍ່ ໃນແຂວງ ເມື່ອສຳເຣັດ ໃນປີ 2013.  ໂຮງແຮມດັ່ງກ່າວ ຈະສ້າງເປັນ ສອງພາກສ່ວນ ທີ່ຈະ ປະກອບດ້ວຍ 3 ພື້ນທີ່ ເຊັ່ນ ຮ້ານອາຫານ ຫ້ອງນອນ ທັງສີ່ຊັ້ນ ແຕ່ລະຊັ້ນ ຈະມີ ຫ້ອງນອນ 28 ຫ້ອງ ຫ້ອງທຸຣະກິດ ການຄ້າ ຫ້ອງການໂຮງແຮມ ແລະ ຫ້ອງປະຊຸມ. ທາງບໍຣິສັດ ຍັງກະຕຽມ ການເລີ້ມລົງມື ກໍ່ສ້າງເຂື່ອນ ໄຟຟ້າ 2 ແຫ່ງ ໃນລາວ ທີ່ຈະສາມາດ ຜລີດກະແສ ໄຟຟ້າໄດ້ 1 ພັນ ເມກາວັດ ດ້ວຍການ ລົງທືນປະມານ 1 ພັນລ້ານໂດລາ ນຳອີກ.

ກຸ່ມບໍຣິສັດ ເຄືອຂ່າຍໂຮງແຮມ ບ້ານພັກ Alila ກໍ່ຈະສ້າງ ໂຮງແຮມບ້ານພັກ 2 ແຫ່ງໃນ ເດືອນຕຸລາ ໃນລາວ ແລະ ໃນອີນເດັຽ ໃນລາວ ຈະໃສ່ຊື່ວ່າ ໂຮງແຮມ ອາລີລາ ຫລວງພຣະບາງ ແລະ ທີ່ອີນເດັຽ ຊື່ວ່າ ອາລີລາ ບັງກາລໍ. ໂຮງແຮມ 2 ແຫ່ງດັ່ງກ່າວ ບັນຈຸເຂົ້າ ໃນເຄືອຂ່າຍ ໂຮງແຮມ 12 ແຫ່ງ ຂອງ ບໍຣິສັດ ແລະ ໂຮງແຮມ ອາລີລາ ຫລວງພຣະບາງ ຈະສ້າງແບບ ອານານິຄົມ ຝຣັ່ງເສດ ຈະປະກອບ ດ້ວຍ 23 suites ຫ້ອງ spa ແລະ ຫ້ອງຮຽນຄົວກີນ.