ນໍ້າຂອງບົກລົງ ຢ່າງວ່ອງໄວ

ເຮືອສິນຄ້າ ທີ່ແລ່ນຕາມ ແມ່ນໍ້າຂອງ ເລີ້ມຕິດ ຫາດຊາຍ ກາງນໍ້າ ແລ້ວ ຍ້ອນວ່າ ນໍ້າບົກລົງ ໄວກວ່າ ປົກກະຕິ ແຕ່ກໍຍັງ ບໍ່ທັນຮຸນແຮງ ເທົ່າກັນກັບ ເມື່ອຕົ້ນປີ 2010 ນີ້.

ເມື່ອເບິ່ງ ສະຖິຕິ ຣະດັບນໍ້າ ຍ້ອນຫລັງທີ່ວ່າ ເຂື່ອນຂອງຈີນ ມີຄວາມສໍາຄັນ ຕໍ່ຣະດັບ ນໍ້າຂອງນັ້ນ ແຈ່ມແຈ້ງຂຶ້ນ ແບບທີ່ ກົງກັນຂ້າມ ກັບຄໍາປະກັນ ຂອງທູດຈີນ. ຕາມລາຍງານ ຂອງຜູ້ຈັດການ ໃນວັນທີ 21 ພຶສຈິກາ.

ລາຍງານຈາກ ແຂວງຊຽງຮາຍ ຂອງໄທ ວ່າ ຖ້າມກາງການ ວິຕົກກັງວົນ ກ່ຽວກັບຣະດັບ ນໍ້າໃນ ແມ່ນໍ້າຂອງ ທີ່ເລີ້ມບົກລົງ ໄວກວ່າ ປົກກະຕິ ຊຶ່ງຕາມ ທັມມະດາ ນໍ້າຈະບົກລົງ ຫລາຍ ໃນຊ່ວງເດືອນ ມິນາ ເດືອນ ເມສາ ເປັນປະຈໍາ. ແຕ່ມາປີນີ້ ກັບເລີ້ມລົດລົງ ຫລາຍຕັ້ງແຕ່ ເລີ້ມໝົດ ຣະດູຝົນ ເຂົ້າສູ່ ຣະດູໜາວ ຈົນວ່າຫລາຍ ພາກສ່ວນ ວິຕົກກັນວ່າ ຣະດູແລ້ງ ປີນີ້ ຈະເກີດວິກິດການ ນໍ້າບົກ ໜັກໜ່ວງກວ່າ ຊ່ວງຕົ້ນປີ 2010.

ໃນວັນທີ 23 ພຶສຈິກາ ນີ້ ກົມຊັພຍາກອນນໍ້າ ຂອງໄທ ຕຽມພາທິມງານ ແລະສື່ມວນຊົນ ໄປເບິ່ງ ສະພາບນໍ້າ ໃນແມ່ນໍ້າຂອງ ທີ່ຊາຍແດນ ແຂວງຊຽງຮາຍ ທີ່ຕິດກັບ ປະເທດລາວ ຫລັງຈາກທີ່ ທ່ານ ກ່ວນ ມູ່ ທູດຈີນ ປະຈໍາ ປະເທດໄທ ໄດ້ຢືນຢັນວ່າ ບັນຫາ ນໍ້າຂອງແຫ້ງ ບໍ່ໜ້າ ຈະກ່ຽວກັບ ເຂື່ອນໃນຈີນ.

ແຕ່ເຖີງຢ່າງໃດ ກໍຕາມ ອົງການ ຂົນສົ່ງທາງນໍ້າ ທີ 1 ສາຂາຊຽງຮາຍ ທີ່ທ່າເຮືອ ເມືອງ ຊຽງແສນ ເວົ້າວ່າ ຣະດັບນໍ້າ ຕໍ່າສຸດໃນ ຮອບເດືອນຕ່າງໆ ຕັ້ງແຕ່ອະດີດ ຈົນມາເຖິງ ປັດຈຸບັນ ຄືຕັ້ງແຕ່ ເດືອນ ກຸມພາ ປີ 2005 ເຄີຍມີ ປາກົດການ ນໍ້າໃນ ແມ່ນໍ້າຂອງ ເລີ້ມລົດລົງ ຕໍ່າສຸດ ຍັງເຫລືອ 1 ແມັດ, ຕໍ່ມາເດືອນ ມິນາ ຕໍ່າສຸດ 1 ແມັດກັບ 40 ຊັງຕີແມັດ ແລະເດືອນ ເມສາ ຕໍ່າສຸດ 1 ແມັດກັບ 37 ຊັງຕີແມັດ ແລະໃນປີ 2006 ຣະດັບນໍ້າ ໃນເດືອນ ກຸມພາ ລົດລົງຍັງ 1 ແມັດກັບ 45 ຊັງຕີແມັດ ແລະເດືອນ ມິນາ ຕໍ່າກວ່າ 1 ແມັດ ຊຶ່ງເປັນຄັ້ງທຳອິດ ທີ່ມີຄວາມເລິກ 95 ຊັງຕີແມັດ ແລະເດືອນ ເມສາ 1 ແມັດກັບ 4 ຊັງຕີແມັດ. ສຳລັບປີ 2009 ຜ່ານມາຍັງບໍ່ມີບັນຫາໜັກ ຄືເດືອນ ກຸມພາ ແທກໄດ້ 1 ແມັດ ກັບ 98 ຊັງຕີແມັດ ແລະ ເດືອນ ມິນາ 1 ແມັດກັບ 67 ຊັງຕີແມັດ ແລະເດືອນ ເມສາ 1 ແມັດກັບ 80 ຊັງຕີແມັດ.

ໃນປີ 2010 ນີ້ ຈີນເປີດໃຊ້ ເຂື່ອນ ຈິ່ງຫົງ ທີ່ເມືອງ ຈິ່ງຫົງ ຫລືເມືອງ ຊຽງຮຸ່ງ, ເຂດປົກຄອງ ຕົນເອງ ສິບສອງປັນນາ ແຂວງຢຸນນ່ານ ຊຶ່ງເປັນເຂື່ອນ ທີ່ຢູ່ໃຕ້ສຸດ ໃນຫລາຍເຂື່ອນ ຂອງຈີນ ທີ່ມີຄວາມສູງ 118 ແມັດ, ຜລິດໄຟຟ້າໄດ້ 1,500 ເມກາວັດ ໄດ້ເຮັດໃຫ້ ຣະດັບນໍ້າ ກັບມາລົດ ຕໍ່າລົງອີກ.