ບ່ອນລ້ຽງປາກະຊັງ ເຮັດໃຫ້ນໍ້າເສັຍ

ຊາວບ້ານ ທີ່ອາໄສຢູ່ ຕາມແຄມຝັ່ງ ນໍ້າງື່ມ ໃນເຂດ ເມືອງ ໄຊທານີ ນະຄອນຫລວງ ວຽຈັນ ໄດ້ຮັບຜົນ ກະທົບ ຈາກຂີ້ເຫຍື້ອ ໂດຍສະເພາະ ຖົງຢາງ plastic ທີ່ຖືກຖິ້ມລົງໃສ່ ຈາກບ່ອນລ້ຽງ ປາກະຊັງ. ຊາວບ້ານ ໃນເຂດນັ້ນ ເວົ້າວ່າ:

"ເລີ່ມຈາກ ບ້ານຫາດກ້ຽງ ຈົນຮອດ ບ້ານທ່າສົບມໍ ຄົນທີ່ເຂົາລ້ຽງ ລົງທຶນ ລ້ຽງປາ ກະຊັງ ຢຸ່ແຄມນໍ້າງື່ມ ເວລາເຮົາ ຂຶ້ນໄປຫລາຍໆຄັ້ງ ຈຶ່ງຄ່ອຍ ເຂົ້າໃຈວ່າ ນີ້ແມ່ນມັນ ຖົງຢາງ ທີ່ມາຈາກ ຫົວອາຫານ ທີ່ເຂົາເຈົ້າ ຖິ້ມລົງ ແມ່ນໍ້າ ຄົນເຂົາເຈົ້າ ຢູ່ທາງລຸ່ມ ກໍໂອ້ຍ ສິຕາຍ ຍ້ອນຖົງຢາງ ນີ້ແຫລະ".

ທ່ານວ່າ ເຂດທີ່ໄດ້ ຮັບຜົນກະທົບ ນັ້ນ ກໍແມ່ນໝົດທັງ ບໍຣິເວນ ລຸ່ມ ເຂື່ອນ ນໍ້າງື່ມນຶ່ງ ອັນມີຮວມທັງ ບ້ານຫາດກ້ຽງ ບ້ານທ່າງ່ອນ ບ້ານໄຮ່ ບ້ານທ່າສົບມໍ ຊຶ່ງຊາວບ້ານ ອາໄສນໍ້າ ໃນແມ່ນໍ້າງື່ມ ນັ້ນ. ການຖິ້ມຖົງຢາງ ປລາສຕິກ ລົງນໍ້າງື່ມ ຫລາຍໆ ຈະເຮັດໃຫ້ນໍ້າ ທີ່ໄຫລລົງມາ ມີຄຸນນະພາບ ຕໍ່າລົງ ແລະ ສ້າງບັນຫາ ໃຫ້ຊາວບ້ານ ທີ່ຫາຢູ່ຫາກິນ ດ້ວຍການ ໃສ່ມອງ ຫວ່ານແຫ. ດັ່ງນັ້ນຈຶ່ງ ຢາກໃຫ້ເຈົ້າໜ້າທີ່ ກ່ຽວຂ້ອງ ເຂົ້າຊ່ວຍ ແກ້ໄຂໃຫ້. ກ່ຽວກັບ ຄວາມເດືອດຮ້ອນ ຂອງຊາວບ້ານ ເຣື່ອງເສດເຫລືອ ຫລືຖົງຢາງ ປລາສຕິກ ນີ້ ເຈົ້າໜ້າທີ່ ກະຊວງ ຊັພຍາກອນ ທັມມະຊາດ ແລະ ສິ່ງແວດລ້ອມ ຂອງລາວ ທ່ານນຶ່ງ ເວົ້າວ່າ: ທ່ານກໍພໍຮູ້ ແຕ່ການ ຖິ້ມ ນັ້ນ ສ່ວນຫລາຍ ເປັນການລັກເຮັດ ລັກຖິ້ມ:

"ເຈົ້າມີສ່ວນ ເພາະວ່າ ຂ້ອຍກໍເຫັນ ມັນກໍບໍ່ຄ່ອຍ ຈະເປັນສ່ວນຫລາຍ ດອກ ເປັນສ່ວນໜ້ອຍ ແຕ່ວ່າຂະເຈົ້າ ກໍລັກເຮັດ ບາງເທື່ອ ບາງບ່ອນ ຫັ້ນນະ".

ແລະວ່າ ປົກກະຕິ ແລ້ວ ກໍໄດ້ມີການ ຕັກເຕືອນ ເພື່ອໃຫ້ທຸກຄົນ ທີ່ມີ ກິຈກັມ ຢູ່ຕາມແຄມ ແມ່ນໍ້າ ຊ່ວຍກັນ ຮັກສາ ອະນາໄມ-ຄວາມສະອາດ ຖິ້ມຂີ້ເຫຍື້ອ ເສດເຫລືອຕ່າງໆ ໃຫ້ຖືກບ່ອນ. ບໍ່ດັ່ງນັ້ນ ເຈົ້າໜ້າທີ່ ກໍຈະເຂົ້າໄປ ຕັກເຕືອນ ຫາກຝ່າຝືນ ອີກ ກໍຕ້ອງມີການ ລົງໂທດ.