ນໍ້າຖ້ວມໄທ ການຄ້າຢູ່ລາວລໍາບາກ

ເຫດການ ພັຍນໍ້າຖ້ວມ ຄັ້ງໃຫຍ່ ໃນໄທ ນອກຈາກ ຈະສົ່ງ ຜົລກະທົບ ໃສ່ຣາຄາ ສິນຄ້າ ອາຫານ ການກິນ ຫຼາຍຢ່າງແລ້ວ ຍັງສົ່ງ ຜົລກະທົບ ຕໍ່ ການຄ້າຂາຍ ໃນ ສປປລາວ ອີກດ້ວຍ, ຍ້ອນວ່າ ຊິ້ນສ່ວນ ອະໄຫລ່ ແລະ ອຸປກອນ ໃນການຜລິດ ຫລາຍແນວ ໃນໂຮງງານ ອຸດສາຫະກັມ ຂອງ ປະເທດລາວ ນໍາເຂົ້າ ຈາກ ປະເທດໄທ. ແຕ່ຕອນນີ້ ຜົລກະທົບ ຍັງບໍ່ຮ້າຍແຮງ ພໍເທົ່າໃດ ແຕ່ໃນຂັ້ນ ຕໍ່ໄປ ອາຈຈະ ຫລາຍຂຶ້ນ. ຕາມຄໍາເວົ້າ ຂອງ ເຈົ້າຂອງ ໂຮງງານ ຜລິດ ອາຫານ ແຫ່ງນຶ່ງ ໃນ ນະຄອນຫລວງ ວຽງຈັນ. ທ່ານກ່າວວ່າ:

"ພວກເຄື່ອງຈັກ ເຄື່ອງ ອະໄຫລ່ຣົດບໍ່ ແມ່ນຫຍັງບໍ່ ຫົວອາຫານບໍ່ ແນວພັນສັດບໍ່ ຈະມີ ບັນຫາ ເພາະວ່າ ສ່ວນຫລາຍ ການນໍາເຂົ້າ ຈະມາໄທ ກະທົບ ກະເທືອນ ມັນອາຈໃຊ້ ເວລາຍາວໄປ ເດືອນໜ້າ".

ນອກຈາກ ຊິ້ນສ່ວນ ເຄື່ອງຈັກ ໃນໂຮງງານ ຂອງລາວ ທີ່ອາສັຍ ໂຮງງານ ໃນໄທ ຊຶ່ງໄດ້ ຮັບຜົລ ກະທົບ ຈາກນໍ້າຖ້ວມ ນັ້ນ ຍັງມີເຣື່ອງ ຫົວອາຫານ, ແນວພັນສັດ ໃນລາວ ກໍອາຈມີ ບັນຫາ ເຊັ່ນກັນ ເພາະ ສປປ ລາວ ຍັງບໍ່ ສາມາດ ຜລິດເອງໄດ້, ຕ້ອງອາສັຍ ໂຮງງານ ໃນ ປະເທດໄທ ເປັນສໍາຄັນ. ສ່ວນວັຖຸດິບ ເຣື່ອງ ອາຫານ ນັ້ນ ທ່ານວ່າ ປະເທດລາວ ສາມາດຜລິດ ເອງໄດ້, ແລະ ປັຈຈຸບັນ ກໍບໍ່ມີ ບັນຫາ ພໍເທົ່າໃດ. 

ສໍາລັບ ຊີ້ນສ່ວນ ອຸປກອນ ໂຮງງານ ຖ້າບໍ່ສາມາດ ນໍາເຂົ້າ ຈາກໄທ ໄດ້ນັ້ນ ກໍຈໍາຕ້ອງ ຫາຄູ່ຄ້າ ໃໝ່ ຊຶ່ງອາຈມີ ຄວາມຍາກ ລໍາບາກ, ແຕ່ ຖ້າໄດ້ຮັບ ການຊ່ວຍເຫລືອ ຈາກ ຣັຖບານນັ້ນ ກໍຄົງ ຈະມີ ຄວາມສະດວກ ຫລາຍຂຶ້ນ ແລະ ທຸຣະກິດ ກໍຄົງ ບໍ່ໄດ້ຮັບ ຜົລກະທົບ.

ນໍ້າຖ້ວມ ໃນໄທ ຍັງໜ້າ ເປັນຫ່ວງ ອຸດສາຫະກັມ ຫລາຍແຫ່ງ ໃນເຂດ ແຂວງ ອະຍຸທຍາ ປະທຸມທານີ ແລະ ທົນບູຣີ ໄດ້ຮັບຜົລ ກະທົບ ຢ່າງໜັກ-ຕ້ອງຢຸດ ການຜລິດ. ນິຄົມອຸດສາຫະກັມ ເຫລົ່ານີ້ ເປັນຖານ ການຜລິດ ທີ່ສໍາຄັນ ສໍາລັບ ທຸຣະກິດ ພາຍໃນ ປະເທດ ແລະ ທຸຣະກິດ ສົ່ງອອກ ຊຶ່ງຖ້າ ຕ້ອງປິດ ປັບປຸງ ເປັນ ເວລານານ ຈະສົ່ງຜົລ ກະທົບ ຕໍ່ ປະເທດຄູ່ຄ້າ ທີ່ເພິ່ງພາ ການສົ່ງອອກ ຂອງໄທ.