ສປປລາວຕ້ອງການງົປ ສ້ອມແປງຊົລປະທານ

ເຖິງແມ່ນວ່າ ສະພາບ ນໍ້າຖ້ວມ ຢູ່ ປະເທສລາວ ຈະລົດຄວາມ ຮຸນແຮງ ລົງແລ້ວ ກໍຕາມ ແຕ່ ທາງຣັຖບາລ ຍັງຕ້ອງ ພົບກັບ ບັນຫາ ຫລາຍຢ່າງ ໃນຫລາຍແຂວງ ຢູ່ຕໍ່ໄປ ໂດຽສະເພາະ ໃນກາຣ ສ້ອມແປງ ໂຄງຮ່າງ ພື້ນຖານເຊັ່ນ: ຖນົນຫົນທາງ ໂຮງຮຽນ ແລະ ຣະບົບ ຊົລປະທານ ຕ່າງໆ ທີ່ໄດ້ຮັບ ຄວາມເສັຽຫາຍ ຈາກ ລົມພາຍຸ ຫລາຍລູກ ເລີ້ມແຕ່ ທ້າຍເດືອນ ມີຖຸນາ ສິງຫາ ຜ່ານມາ. ດັ່ງເຈົ້າໜ້າທີ່ ໂຍທາທິກາຣ ແລະ ຂົນສົ່ງ ປະຈຳ ແຂວງຊຽງຂວາງ ໄດ້ກ່າວວ່າ:

"ຕ້ອງກາຣ ທາງທຶນຮອນ ເນາະ ທີ່ຈະມາ ຟື້ນຟູ ຜົລເສັຽຫາຍ ເປັນຕົ້ນແມ່ນ ເປັນຂົວມີ 8 ແຫ່ງ ທາງ (ນັ້ນ) ລະແມ່ນ ດິນຖົມ ແລະ ກໍມັນຊຳຣຸດ 41 ເສັ້ນ ຕາມກາຣ ເກັບກຳຂໍ້ມູລ ໃນເບື້ອງຕົ້ນ".

ພ້ອມດຽວກັນນີ້ ທ່ານກໍວ່າ ຈາກກາຣ ປະເມີນ ຄວາມເສັຽຫາຍ ໃນທົ່ວ ປະເທສ ທາງກະຊວງ ໂຍທາທິກາຣ ແລະ ຂົນສົ່ງ ຍັງຕ້ອງກາຣ ງົບປະມານ ສຳລັບ ກາຣສ້ອມແປງ ຂົວ ແລະ ຫົນທາງ ທັງໝົດ ປະມານ 743 ຕື້ກີບ, ແຕ່ແລ້ວ ທາງຫົວໜ້າ ກົມຂົວ ແລະ ທາງຫລວງ ໄດ້ແຈ້ງ ຜ່ານທາງ ໜັງສືພີມ ວຽງຈັນໄທມສ໌ ວ່າ ໃນຂັ້ນຕົ້ນນີ້ ທາງ ຣັຖບາລ ຈະອະນຸມັຕ ງົບປະມານ ໃຫ້ ສຳລັບ ແປງຂົວ ແລະ ຫົນທາງ ໃນ 12 ແຂວງ ໄດ້ແຕ່ 70 ຕື້ກີບ ເທົ່ານັ້ນ. ໃນຂນະດຽວກັນ ນັ້ນ ເຈົ້າໜ້າທີ່ ແຜນກ ໂຍທາທິກາຣ ແລະ ຂົນສົ່ງ ໃນແຂວງ ບໍຣິຄໍາໄຊ ກໍວ່າຕ້ອງກາຣ ງົບປະມານ ໄປ ບູຣະນະ ສ້ອມແປງ ພາຍໃນ ແຂວງ ເຊັ່ນກັນ:

"ເສັ້ນ ຫລັກໆນີ້ ບໍ່ໃຫ້ ຕັດຂາດແຫລະ ແຂນງໂຍທາ ຂອງພວກເຮົາ ຕ້ອງໄດ້ ແກ້ໄຂກ່ອນ ແລ້ວຈັ່ງ ສເນີແຂວງ ແລະ ຣັຖບາລ ເມື່ອໄດ້ ພວກເຮົາ ກໍຢາກໃຫ້ ມີກ້ອນທຶນ ມາສົມທົບ ມາຟື້ນຟູ ທາງໃຫ້ມັນ ຢູ່ໃນ ສະພາບ ປົກກະຕິ ດຽວນີ້ກໍໃຊ້ ຫາກ ວ່າມັນ ໃຊ້ ບໍ່ພຽງພໍ".

ເຈົ້າໜ້າທີ່ ໄດ້ກ່າວເນັ້ນວ່າ ກາຣທີ່ບໍ່ ສາມາຕ ສ້ອມແປງ ຂົວ ແລະ ຖນົນຫົນທາງ ໃຫ້ມີ ສະພາບດີ ເປັນ ປົກກະຕິໄດ້ ໃນປັຈຈຸບັນ ນີ້ນັ້ນ ກໍໄດ້ສົ່ງ ຜົລກະທົບ ຕໍ່ເສຖກິຈ ທ່ອງທ່ຽວ ແລະ ກາຣສັນຈອນ ໄປມາຂອງ ປະຊາຊົນ.