ອາຫານແພງຂື້ນ ຄົນຫຼາຍລ້ານຈະອຶດຢາກ

ວັນທີ່ 17 ຕຸລາ ຜ່ານມາ ອົງການ ສະຫະປຊາຊາດ ແລະ ອົງການ ສາກົນ ອື່ນໆ ໄດ້ສລອງ ວັນ ອາຫານໂລກ ແລະ ໄດ້ຮຽກຮ້ອງ ໃຫ້ມີການ ແກ້ໄຂ ບັນຫາ ລະຍະຍາວ ໂດຍເຕືອນວ່າ ຣາຄາ ອາຫານ ແພງຂື້ນ ຈະເຮັດໃຫ້ ຄົນຫລາຍລ້ານ ອຶດຢາກ ແລະ ຕ້ອງ ສົ່ງເສີມ ໃຫ້ມີຄວາມ ເທົ່າທຽມ ກັນ ລະຫ່ວາງ ເພດຍິງ ກັບ ເພດຊາຍ ຍ້ອນວ່າ ເພດຍິງ ເປັນພະລັງງານ ສໍາຄັນ ອັນນື່ງ ໃນການ ຮັບປະກັນ ໃຫ້ມີ ອາຫານ.

ທ່ານ ບານກີມູນ ເລຂາທິການ ສະຫະປະຊາຊາດ ກ່າວໃນ ພິທີ ສລອງ ວັນ ອາຫານໂລກ ຢູ່ທີ່ ສໍານັກງານ ອົງການ ອາຫານ ແລະ ກະສິກັມ ທີ່ກຸງໂຣມ ປະເທດ ອີຕາລີ ວ່າ ໃນໂລກ ຂອງເຮົາ ມີອາຫານ ພຽງພໍ ສໍາລັບ ລ້ຽງເກືອ ທຸກຄົນ, ແຕ່ວ່າ ມີຄົນເກືອບ 1,000 ລ້ານຄົນ ຈະອືດ ອາຫານ ຍ້ອນອາຫານ ບໍ່ມີໄວ້ ໃຫ້ທຸກຄົນ ຫລືບໍ່ສາມາດ ຊື້ອາຫານ ທີ່ມີ ຣາຄາແພງ ໄດ້. ທ່ານຍົກ ໂຕຢ່າງ ໃນທະວີບ ອາຟຣິກາ ພາກ ຕະເວັນອອກ ສ່ຽງເໜືອ ຊື່ງມັກເອີ້ນ ກັນວ່າ ເຂົາ ອາຟຣິກກາ ມີປະຊາຊົນ ຫລາຍກ່ວາ 13 ລ້ານຄົນ ໄດ້ຮັບເຄາະ ຈາກໄພ ແຫ້ງແລ້ງ ທີ່ຮ້າຍແຮງ ທີ່ສຸດ ໃນຮອບ 60 ປີ. ການສລອງ ວັນ ອາຫານໂລກ ປີນີ້ ແມ່ນ ພາຍໃຕ້ ຫົວເຣື້ອງ ວ່າ ຣາຄາ ອາຫານ, ຈາກ ວິກິດການ ໄປສູ່ ສະເຖັຽຣະພາບ ຊື່ງໝາຍເຖິງ ຣາຄາ ອາຫານ ແພງຂື້ນສູງ ເກືອບຈະວ່າ ເປັນ ປະຫວັດການ ອັນເຮັດໃຫ້ ຄົນຫລາຍ ລ້ານຄົນ ອຶດຢາກ.

ຜູ້ອໍານວຍການ ທົ່ວໄປ ອົງການ ອາຫານ ແລະ ກະສິກໍັມ ສະຫະປະຊາຊາດ ທ່ານ Jacque Dioux ກ່າວຢໍ້າວ່າ ຕ້ອງການ ເງິນ ລົງທືນ ເພີ້ມຕື່ມ ອີກຫລາຍ ກ່ວາ $80 ຕື້ ໂດລາ ສະຫະຣັດ ໃນແຕ່ ລະປີ ເພື່ອ ຮັບປະກັນ ໃຫ້ມີ ອາຫານ ລ້ຽງເກືອກັນ ໃນທົ່ວໂລກ ແຕ່ນີ້ ໄປຮອດ ປີ 2050. ມາດາມ Michelle Bachelet ຜູ້ອໍານວຍການ ອົງການ ບໍຣິຫານ ແມ່ຍິງ ຂອງ ສະຫະປະຊາຊາດ ເຕືອນວ່າ ສາເຫດ ຂອງການ ບໍ່ມີ ອາຫານ ພຽງພໍ ແມ່ນຄວາມ ທຸກຍາກ ແລະ ການຈໍາແນກ ດ້ານເພດ ທີ່ແມ່ຍິງ ກໍາລັງ ປະເຊີນຢູ່. ເພື່ອ ຮັບປະກັນ ໃຫ້ມີ ອາຫານ ໃຫ້ທຸກຄົນ ມັນມີ ຄວາມຈໍາເປັນ ຕ້ອງລົງທືນ ໃສ່ຊາວຫນຸ່ມ ຍິງ ແລະ ແມ່ຍິງ ໂດຍທົ່ວໄປ ຫລາຍຂື້ນ ເພາະ ວ່າແມ່ຍິງ ເປັນຂໍກະແຈ ຂອງການ ຮັບປະກັນ ໃຫ້ມີ ອາຫານ.