ກາຣທີ່ຣັຖບາລ ສປປລາວ ສົ່ງເສີມໃຫ້ ບໍຣິສັທ ຕ່າງຊາຕ ເຂົ້າມາລົງທຶນ ຢູ່ເມືອງລາວ ຢ່າງຫຼວງຫຼາຍ ໃນປັຈຈຸບັນ ຖືເປັນກາຣຊ່ວຍ ສ້າງວຽກງານ ໃຫ້ປະຊາຊົນ ທ້ອງຖີ່ນ ໃນຫລາຍໆແຫ່ງ ແຕ່ກໍຍັງມີບັນຫາ ທີ່ແຮງງານລາວ ຈຳນວນຫລາຍ ບໍ່ໄດ້ຮັບ ສວັສດີກາຣ ສັງຄົມ ດີເທົ່າທີ່ຄວນ ຈາກທາງ ໂຮງງານ ຕ່າງຊາຕ ຍ້ອນມີຂໍ້ບົກຜ່ອງ ໃນຂໍ້ສັນຍາ ສັມປະທານ. ເຈົ້າໜ້າທີ່ ກົມແຮງງານ ແຂວງຄຳມ່ວນຜູ້ໜຶ່ງໄດ້ ກ່າວວ່າ:
" ມັນ ຜິດ ແຕ່ວ່າຫົວຂໍ້ ເວົ້າກາຣເປີດ ສັມປະທານ ໃໝ່ໆ ຮັ້ນນ໋າ ກາຣສັມປະທານ ເຮົາບໍ່ໄດ້ຣະບຸ ໄວ້ນັ້ນ ແດ່. ມັນຜິດຢູ່ບ່ອນ ນັ້ນ ພວກເຮົາ ກໍເວົ້າກັນຫລາຍ ພວກເຮົາກໍ ກຳລັງສິ ປັບກັນໃໝ່ ເຮົາບໍ່ໄດ້ ຂຽນໃສ່ ໃນ MOU ມັນກໍເວົ້າກັນ ບໍ່ໄດ້ເຮັດ ວຽກນ໋າ ".
ພ້ອມດຽວກັນນີ້ ທ່ານກໍວ່າ ກາຣໃຫ້ ສັມປະທານ ແກ່ຊາວຕ່າງຊາຕ ເຂົ້າມາລົງທຶນ ຢູ່ລາວ ໃນເມື່ອກ່ອນ ນັ້ນ ມີກາຣຜິດພາດ ຈຶ່ງບໍ່ສາມາຕ ບັງຄັບໃຫ້ ທາງໂຮງງານລາວ ໄປເຂົ້າປະກັນ ສວັສດີກາຣສັງຄົມ ໄດ້ ແຕ່ຢ່າງໃດ. ສະນັ້ນ ທາງກາຣລາວ ຈຶ່ງໄດ້ປະຊຸມ ພິຈາຣະນາ ກາຣຮ່າງ ນິຕິກັມ ເພີ່ມເຕີມ ຮຽກຮ້ອງ ໃຫ້ໂຮງງານ ຕ່າງຊາຕ ໃຫ້ຄວາມຮ່ວມມື:
" ຣໍຖ້າທີ່ວ່າ ເຮົາໄປແປງ ຮ່າງສັນຍາ ຣັຖບາລ ເປັນຄົນອອກ ນິຕິກັມ ເປັນຄົນພື້ນຖານ ເປັນເຄື່ອງມື ໃຫ້ພວກເຮົາແດ່ ໃນກາຣມາປັບປຸງ ຄືນໃໝ່ຫັ້ນນ໋າ ເພື່ອໃຫ້ກາຣ ຮ່ວມມື ໃຫ້ເຂົາເຈົ້າ ຮ່ວມແດ່ ".
ຢ່າງໃດກໍຕາມ ກາຣຮ່າງກົດໝາຍ ແຮງງານນີ້ ທ່ານກໍວ່າ ຕ້ອງໄດ້ອາສັຍ ຄວາມຮ່ວມມື ຈາກ ທຸກພາຄສ່ວນ ເພື່ອເປັນກາຣ ສົ່ງເສີມ ໃຫ້ບັນດາ ແຮງງານລາວ ໄດ້ມີຄຸນພາບ ຊີວີຕທີ່ດີ ດ້ວຍກາຣ ມີຫລັກປະກັນ ສຸຂພາບ ຢ່າງສົມບຸນ.