ຊາວກະສິກອນຮ້ອງຂໍ ຣັດຊ່ອຍສົ່ງເສີມ

ຊາວກະສິກອຣ ແຂວງຊຽງຂວາງ ຢາກໃຫ້ ທາງຣັຖບາລ ເຂົ້າມາໃຫ້ ຄວາມຊ່ວຍເຫລືອ ສນັບສນູນ ໃນເຣື່ອງກາຣ ແປຮູບ ສິນຄ້າ ກາຣກະເສຕ ຂອງເຂົາເຈົ້າ ເພື່ອຍົກ ຣະດັບ ຄຸນນະພາບ ສິນຄ້າ ເພື່ອໃຫ້ໄດ້ຣາຄາດີ ເພີ້ມຂຶ້ນ. ປັຈຈຸບັນ ຊາວກະສິກອນ ມີແຕ່ສົ່ງຜົລຜລິຕ ອອກຂາຍ ແບບສົດໆເທົ່ານັ້ນ ແລະ ກໍສົ່ງອອກຂາຍ ບໍ່ທັນເວລາ ແລະ ບໍ່ສາມາຕເກັບໄວ້ ໄດ້ດົນນານ. ເຈົ້າໜ້າທີ່ ກາຣຄ້າທ້ອງຖີ່ນ ທ່ານໜຶ່ງກ່າວວ່າ:

“ຄວາມຮຽກຮ້ອງໂຕນີ້ ມີຫລາຍ ເພາະວ່າມັນ ຢາກຍົກຣະດັບ ຄຸນນະພາບ ຂອງສິນຄ້າ ແລະຍົກຣະດັບ ມູລຄ່າຂອງສິນຄ້າ ຂຶ້ນຫັ້ນໄດ້ເນາະ ກາຣອັນນີ້ ກາຣຜລີຕກະສິກັມ ນີ້ແຫລະ ກາຣເກັບຮັກສາບໍ? ກາຣແປຮູບໄປເປັນ ສິນຄ້າ ຜລິຕພັນ ສຳເຣັຈຮູບບໍ? ຖືວ່າມັນຍັງບໍ່ໄດ້ດີ ເທົ່າທີ່ຄວນ ບາງເທື່ອມັນກະ ບໍ່ສາມາຕ ເກັບຮັກສາ ໄວ້ດົນ ໄດ້”.

ພ້ອມດຽວກັນນີ້ ທ່ານກໍວ່າ ຊາວກະສິກອຣ ສ່ວນຫລາຍ ມັກປູກຜັກຊນິດຕ່າງໆ ພ້ອມກັບສາລີ ແລະ ປູກໝາກໄມ້ ຢ່າງຫລວງຫລາຍ ບາງເທື່ອ ກໍບໍ່ສາມາຕ ສົ່ງອອກຂາຍ ໄດ້ຕາມກຳໜົດ ຈົນເກີດມີບັນຫາ ເນົ່າເສັຍຫາຍ ຈົນຂາດທຶນ ຢ່າງຫລວງຫລາຍ ຊຶ່ງບັນຫາ ດັ່ງກ່າວນີ້ ກໍເຄີຍຍື່ນໜັງສື ຮ້ອງຮຽນໄປ ຍັງແຜນກ ອຸຕສາຫະກັມ ແລະກາຣຄ້າ ຫລາຍເທື່ອມາແລ້ວ:

“ເພີ່ນກໍເປີດທາງໃຫ້ ບັນດາ ພາຄທຸຣະກິຈ ພວກເຮົາ ພົວພັນກັບ ນັກທຸຣະກິຈ ຂອງຕ່າງປະເທສ ທີ່ມີຄວາມສົນໃຈ ແລ້ວກໍວ່າໃຫ້ ເຂົ້າມາມີສ່ວນຮ່ວມ ນຳກັນ ພັທນາໂຕນີ້ ໃຫ້ມັນດີຂຶ້ນ ນຳໃຊ້ແບບ ຍືນຍາວໄດ້”.

ຢ່າງໃດກໍຕາມ ເທົ່າປັຈຈຸບັນນີ້ ກໍຍັງບໍ່ທັນ ມີນັກລົງທຶນ ໃຫ້ຄວາມສົນໃຈ ແລະ ເຂົ້າມາລົງທຶນ ແຕ່ຢ່າງໃດ.