ການຮັກສາປິ່ນປົວ ທີ່ຂາດມາຕຖານ

ທີ່ເມືອງ ສາຣະວັນ ແຂວງ ສາຣະວັນ ໃນຣະຍະ 6 ເດືອນ ທີ່ຜ່ານມາ ມີຜູ້ຕິດ ພຍາດ ແລະ ເສັຽຊີວິດ ໄປແລ້ວ ຫລາຍຄົນ. ຕໍ່ບັນຫາ ນີ້ ທາງ ສາທາຣະນະສຸຂ ເມືອງ ກໍໄດ້ຫາທາງ ແກ້ໄຂ ເພື່ອຫລຸດຜ່ອນ ການເຈັບໄຂ້ ໄດ້ປ່ວຍ ຂອງ ປະຊາຊົນ, ທ່ານ ພິດສະໃໝ ເຂັມວິລັຍ ຫົວໜ້າ ຫ້ອງການ ສາທາຣະນະສຸຂ ເມືອງ ສາຣະວັນ ກ່າວວ່າ:

"ພວກເຮົາໄດ້ ຈັດຕັ້ງ ວິຊາການ ທີມງານ ເຄື່ອນທີ່ ແລະ ເພື່ອມີການ ຕອບໂຕ້ ໄວ້ ໃນກໍຣະນີ ມີການຣະບາດ ເກີດຂຶ້ນ ຢູ່ບ້ານ ໃດນຶ່ງ ແລະ ພວກເຮົາທີມງານ ດັ່ງກ່າວນີ້ ຈະໄດ້ ມີການ ສືບສວນ ໃຫ້ໄວ ເພື່ອໃຫ້ມີ ການຕອບໂຕ້ ໃຫ້ທັນການ ຫລືວ່າ ມີການ ສະກັດ ພຍາດ ດັ່ງກ່າວ ທີ່ມັນເກີດຂຶ້ນ ຫລືວ່າ ແພ່ລາມ ໄປບ້ານອື່ນ ຫລືວ່າ ຄອບຄົວ ອື່ນ".

ຣາຍງານ ໃນຣະຍະ 6 ເດືອນ ຕົ້ນປີນີ້ ມີຄົນເຈັບ 772 ຄົນ. ໃນນັ້ນເປັນ ໄຂ້ຍຸງລາຍ 94 ຄົນ, ເປັນໄຂ້ ເລືອດອອກ 10 ຄົນ, ຣະບົບຫາຍໃຈ ອັກເສບ ຮ້າຍແຮງ 102 ຄົນ, ເຫຍື່ອຫຸ້ມສມອງ 4 ຄົນ, ຖອກທ້ອງ 562 ຄົນ ເສັຽຊີວິດ 4 ຄົນ. ເພື່ອຮັປກັນ ການຕ້ານ ແລະ ສະກັດກັ້ນ ພຍາດ ທີ່ຈະເກີດຂຶ້ນ ໃນຣະດູຝົນ ນີ້ ດຣ. ພິດສະໃໝ ວ່າ ທາງຫ້ອງການ ສາທາຣະນະສຸຂ ເມືອງ ສາຣະວັນ ກໍໄດ້ຈັດ ກອງປະຊຸມ ເພື່ອປັບປຸງ ວຽກງານ ດັ່ງກ່າວ ໃຫ້ດີຂຶ້ນ:

"ພວກເຮົາ ກໍຍັງໄດ້ ມີການ ໂຄສນາ ສຸຂສຶກສາ ໂດຍມອບ ໃຫ້ທີມງານ ຂອງເມືອງ ພວກເຮົາ ລົງເຮັດ ໂຄສນາ ສຸຂສຶກສາ ຕາມບ້ານ ໃນນີ້ ພວກເຮົາກໍໄດ້ ເລັ່ງໃສ່ 5 ບ້ານ ເທສບານ ທີ່ວ່າ ເປັນຈຸດ ລໍ່ແຫລມ ທີ່ ເຄີຍເກີດ ຜ່ານມາ ຊຸມຊົນ ໜາແໜ້ນ ກໍມີຄວາມສ່ຽງ ຕໍ່ການ ເກີດຣະບາດ ຂອງພຍາດ ໄຂ້ຍຸງລາຍ ໃນຊ່ວງ ຣະດູຝົນ ນີ້".

ນອກຈາກ ການໂຄສນາ ເຜີຍແພ່ ການປ້ອງກັນ ພຍາດຕ່າງໆ ແລ້ວ ໃນປັຈຈຸບັນ ເປັນຊ່ວງ ຣະດູຝົນ ກໍມີການເນັ້ນ ເປັນພິເສດ ເລື່ອງການ ອະນາມັຍ ແລະ ໃຫ້ ປະຊາຊົນ ກໍາຈັດແຫລ່ງ ເພາະພັນ ຂອງ ຍຸງລາຍ ທັງໃນ ແລະ ນອກເຂດ ເທສບານ.