ສາທາຣະນະສຸຂເຕືອນ ເຣື່ອງຊີ້ນສັດປ່າ

ກະຊວງ ສາທາຣະນະສຸຂ ລາວ ເຕືອນ ບໍ່ໃຫ້ກິນ ຊີ້ນສັດປ່າ ທີ່ຊື້ມາ ຍ້ອນຜູ້ຂາຍ ສ່ວນຫລາຍ ຈະໃສ່ ສານເຄມີ formalin ໃນຊີ້ນສັດ ເພື່ອກັນບໍ່ໃຫ້ ເປື່ອຍເນົ່າໄວ. ຫລັງຈາກ ທີ່ລ່າສັດໄດ້ ກໍໃຊ້ເວລາ ພໍສົມຄວນ ກ່ອນທີ່ ຈະນໍາເອົາ ສັດທີ່ຕາຍ ມາຂາຍ ໃນຕລາດໄດ້ ຜູ້ຂາຍ ຈຶງຫາທາງ ກັນບໍ່ໃຫ້ ຊີ້ນສັດ ເປື່ອຍເຫນົ່າໄວ ໂດຍການໃຊ້ ສານເຄມີ ຂ້າເຊື້ອ formalin ໃນຊີ້ນສັດ. ເຈົ້າໜ້າທີ່ ກົມກວດກາ ອາຫານ ແລະ ຢາ ໄດ້ເວົ້າວ່າ:

"ຂະເຈົ້າ ໝັກຫັ້ນໜ໋າ ເພື່ອວ່າກັນ ບໍ່ໃຫ້ມັນ ບູດເນ໋າະ ຫລືວ່າກັນ ບໍ່ໃຫ້ມັນ ມີການເນົ່າເສັຍ".

ນາງເວົ້າ ຕໍ່ໄປວ່າ ກົດໝາຍລາວ ບໍ່ອະນຸຍາດ ໃຫ້ລ່າສັດປ່າ ຫາຍາກຫວງຫ້າມ ເພື່ອເອົາ ມາຂາຍຫລືກິນ ແຕ່ຊາວບ້ານ ບາງບ່ອນ ຍັງພາກັນ ລັກລ່າສັດປ່າ ເລື້ອຍມາຢູ່ ເພາະເປັນ ຄວາມລຶ້ງເຄີຍ ແລະ ເປັນວິຖີ ຊີວິດ ຂອງພວກ ຂະເຈົ້າ ຈຶ່ງໄດ້ລະເມີດ ກົດໝາຍ ທີ່ໄດ້ ລະບຸໄວ້.

ການກິນຊີ້ນສັດ ທີ່ເອົາ ສານເຄມີ formalin ເອືອບໃສ່ ເລື້ອຍໆ ຈະມີຄວາມສ່ຽງ ເຮັດໃຫ້ເກີດ ພຍາດແລະ ເຈັບປ່ວຍໄດ້ ແລະ ສານເຄມີ formalin ກໍເປັນເຄມີ ທີ່ເປັນພິດເບື່ອ ຈະນໍາເອົາມາ ປະປົນໃສ່ ອາຫານການກິນ ບໍ່ໄດ້. ເຈົ້າໜ້າທີ່ ເວົ້າກ່ຽວກັບ ເຣື່ອງນີ້ວ່າ:

"ເຂົາບໍ່ຮູ້ເນາະ ກໍຣະນີ ເກີດເຈັບທ້ອງ ຫລືວ່າຖອກທ້ອງ ຮຸນແຮງ ເຂົາຈຶ່ງຮູ້ເນາະ ມັນກໍພາໃຫ້ ເປັນບາດແຜ ໃນກະເພາະເນາະ ແລະ ກໍກໍ່ໃຫ້ເກີດ ມະເຮັງໄດ້".

ເຖິງຢ່າງໃດ ກໍຕາມ ການຈັບກຸມ ຜູ້ກະທໍາຜິດ ນໍາເອົາສັດປ່າ ປົນສານເຄມີ formalin ມາຂາຍນັ້ນ ຫາກພົບພໍ້ ເທື່ອທໍາອິດ ກໍຈະມີແຕ່ ການຕັກເຕືອນ ສັ່ງສອນ ແລະ ຜູ້ກະທໍາ ຄວາມຜິດ ກໍມີທາງປ່ຽນ ວິທີເຮັດ ຈຶ່ງກາຍເປັນ ເທື່ອທໍາອິດ ຕໍ່ໄປເລື້ອຍໆ. ດັ່ງນັ້ນທາງການ ກໍໄດ້ ພຽງແຕ່ ຕັກເຕືອນ ໃຫ້ ປະຊາຊົນ ລະມັດລະວັງ ປ້ອງກັນໂຕເອງ.