ພຍາດໃບໄມ້ໃນຕັບ

ການຄົ້ນຄວ້າ ຂອງຜແນກ ສາທາຣະນະສຸຂ ແຂວງ ອັດຕະປື ພົບວ່າ ປະຊາຊົນ ປະມານ 30% ໃນ 10 ບ້ານ ເຂດເມືອງພູວົງ ເປັນພຍາດໃບໄມ້ ໃນຕັບ ຍ້ອນກິນ ອາຫານດິບ ຫລື ບໍ່ສຸກຄັກ ແລະ ການປະຕິບັດ ສຸຂາພິບານ ບໍ່ເຂັ້ມງວດ ດັ່ງເຈົ້າໜ້າທີ່ ຜແນກ ສາທາຣະນະສຸຂ ໄດ້ກ່າວ:

"ພວກສານໃບໄມ້ ໃນຕັບ ຈາກປາດິບ ຈະພາໃຫ້ ເປັນພວກ ມະເຣັງຕັບ ພວກກະດັນຕັບ ເພາະວ່າ ປະຊາຊົນ ສ່ວນຫລາຍ ຈະມັກກິນ ປາດິບ ພວກເຮົາກໍາລັງ ເຮັດການ ຄົ້ນຄວ້າ ທົດລອງເບິ່ງຢູ່. ເບື້ອງຕົ້ນ ຄົ້ນຄວ້າ ປະມານ 10 ກ່ວາບ້ານ ມັນຈະພົບຢູ່ ປະມານເກືອບ 30% ໃນ 10 ບ້ານ ທີ່ເຮັດການ ຄົ້ນຄວ້າ".

ເຈົ້າໜ້າທີ່ ຜແນກ ສາທາຣະນະສຸຂ ອະທິບາຍ ວ່າ ປະຊາຊົນ ຊາວບ້ານ ເຄີຽປຸງແຕ່ງ ອາຫານ ປະເພດ ກິນປາດິບ ໂດຍໃຊ້ ໝາກນາວ ຫລືເຄື່ອງປຸງ ທີ່ມີຣົສສົ້ມ ຕ່າງໆ ທີ່ເຂົາຄິດວ່າ ເຮັດໃຫ້ ປາສຸກໄດ້, ແຕ່ຄວາມຈິງນັ້ນ ມັນບໍ່ສຸກ ແລະ ບໍ່ຂ້າພຍາດໄດ້ ເນື່ອງຈາກວ່າ ຊີ້ນປາທຸກ ໂຕບໍ່ໄດ້ ປອດຈາກເຊື້ອ ພຍາດໝົດ.

ວິທີ ທີ່ຈະໃຫ້ ອາຫານສຸກ ກໍມີແຕ່ຕົ້ມ ຫລືປີ້ງ ໃສ່ໄຟເທົ່ານັ້ນ. ທ່ານວ່າ ທາງຜແນກ ສາທາຣະນະສຸຂ ກໍສືກສາ ໂຄສະນາ ໃຫ້ຊາວບ້ານ ຮູ້ຢູ່ ແຕ່ເຂົາບໍ່ຄ່ອຍ ປະຕິບັດ ຕາມ ຍ້ອນວ່າເຄີຽຢູ່ ເຄີຽກິນ ແນວນັ້ນ:

"ກໍມີ ໂຄສະນາ ອາຫານ ການກິນ ໂຄສະນາ ສຸກສືກສາ ການກວດອາຈົມ ຊອກຫາເຊື້ອ ຕ່າງໆ ເພື່ອແຈກຈ່າຍຢາ. ອັນທີສອງ ມາກໍແມ່ນ ໃຫ້ຂໍ້ມູນ ຂ່າວສານ ຂະເຈົ້າ ກ່ຽວກັບ ອັນຕຣາຍຂອງ ພຍາດນີ້ ຂະເຈົາກໍຈະໄດ້ ຮັບການປ້ອງກັນ ແຕ່ວ່າການ ປ່ຽນແປງ ພຶດຕິກັມ ຂະເຈົ້າ ມັນກໍຄິດ ວ່າຂ້ອນຂ້າງຍາກ ມັນກ່ຽວກັບ ຄວາມເຊື່ອຖື ຕ້ອງໃຊ້ເວລາ".

ຕໍ່ບັນຫານີ້ ຜແນກ ສາທາຣະສຸຂ ແຂວງ ກໍມີຄວາມ ເປັນຫ່ວງ ແລະ ຢາກຂໍຮ້ອງ ໃຫ້ ປະຊາຊົນ ພຍາຍາມ ກິນອາຫານສຸກ. ຖ້າມີອາການ ເຈັບໂຊ ກໍຄວນ ໄປພົບ ທ່ານໝໍ.