ພຍາຕມືຕີນປາກເປື່ອຍ ອາຈກ່ຽວພັນເດັກນ້ອຍຕາຍ

ເດັກນ້ອຍ ກັມພູຊາ ທີ່ອາຈຕາຍ ຍ້ອນໂຣຄ ມືຕີນ ແລະປາກເປື່ອຍ ທີ່ ແຂວງຣະຍອງ ຂອງໄທ ໃນອາທີດນີ້ ສ້າງຄວາມ ກັງວົນ ຢ້ານກົວ ໃຫ້ຊາວໄທ ຢ່າງຫຼວງຫຼາຍ ເພາະ ທາງການໄທ ບໍ່ເຄີຍປະກາດ ວ່າມີຄົນ ເສັຽຊີວີດ ຍ້ອນໂຣຄດັ່ງກ່າວ ນັ້ນເທື່ອ ທັ້ງໆທີ່ມີຜູ້ຕິດ ເຊື້ອໂຣຄ ນັ້ນແລ້ວ ກວ່າ 1 ພັນ ກໍຣະນີ ໃນທົ່ວປະເທດ.

ນາຍ ກຣິດ ປາລາສັກ ຫົວຫນ້າ ຫ້ອງການ ສາທາຣະນະສຸຂ ແຂວງຣະຍອງ ກ່າວວ່າ ເດັກນ້ອຍ ກັມພູຊາ ທີ່ມີອາຍຸ ສອງປີກວ່າ ເສັຽຊີວີດ ໃນຫ້ອງສຸກເສີນ ຫລັງຈາກ 2 ຊົ່ວໂມງ ທີ່ຖືກນຳເຂົ້າ ປີ່ນປົວ ທີ່ໂຮງພຍາບານ ເມືອງ ແກຣງ ໃນມື້ວັນພຸດ.

ທ່ານວ່າ ເດັກນ້ອຍຜູ້ນັ້ນ ຖືກພາໄປ ໂຮງພຍາບານ ດ້ວຍອາການ ຫາຍໃຈຝືດ ອ່ອນເພັຽ ແລະ ມີຕຸ່ມ ເກີດຂື້ນຕາມ ມືແລະຕີນ. ຜູ້ເປັນພໍ່ ບອກວ່າ ເດັກນ້ອຍ ເປັນໄຂ້ມາໄດ້ ຫລາຍມື້ແລ້ວ ແລະ ມີອາການ ເຈັບຄໍ ເຈັບຕາມມື ແລະຕີນ.

ພໍ່ຂອງເດັກນ້ອຍ ໄດ້ເອົາລູກ ໄປກວດຢູ່ ໂຮງພຍາບານ ເອກກະຊົນ 2 ເທື່ອ ໃນມື້ວັນຈັນ ແລະ ວັນອັງຄານ ແຕ່ອາການ ຂອງເດັກນ້ອຍ ບໍ່ດີຂື້ນເລີຍ ເຈົ້າຫນ້າທີ່ ສາທາຣະນະສຸຂ ປະຈຳແຂວງ ກຳລັງກວດສອບ ເພື່ອໃຫ້ແນ່ໃຈວ່າ ການຕາຍຂອງ ເດັກນ້ອຍຜູ້ນີ້ ແມ່ນເກີດຈາກ ເຊື້ອໄວຣັສ ຊນີດ EV 71 ຫລືບໍ ຊື່ງເປັນເຊື້ອ ໄວຣັສ ມາຈາກໂຣຄ ມືຕີນ ແລະ ປາກເປື່ອຍ ກ່ອນຈະອອກ ປະກາດ ເປັນທາງການ.