ພົບແມງມຸມບໍ່ມີຕາ ໃນລາວ

ນັກຄົ້ນຄວ້າ ຊາວ ເຢັຽຣະມັນ ພົບແມງມຸມ ບໍ່ມີຕາ ຊນິດດຽວ ໃນໂລກ ຢູ່ ສປປລາວ.
ໂພໄຊສວັດ
2012.09.11

ກຸ່ມ ນັກວິທຍາສາດ ຈາກ ສະຖາບັນ ຄົ້ນຄວ້າ Senckenberg ຈາກປະເທດ ເຢຣະມັນ ໄດ້ຄົ້ນພົບ ແມງມູມ ຊນິດນຶ່ງ ທີ່ບໍ່ມີຕາ ໃນ ສປປລາວ ຈາກນັ້ນກໍໄດ້ ຕັ້ງຊື່ພວກມັນ ຕາມພາສາ ວິທຍາສາດວ່າ “Sinopoda Scurion” ຕາມຊື່ຂອງ ບໍລິສັດ ນຶ່ງທີ່ຜລິດ ໂຄມໄຟ ທີ່ໃຊ້ໄຕ້ ຢູ່ເທິງຫົວ ຂອງພວກ ກັມມະກອນ ຂຸດຄົ້ນບໍ່ແຮ່ ໃນປະເທດ ວິສເຊີແລນ ທີ່ສນັບສນູນ ການຄົ້ນຄວ້າ. ອີງຕາມລາຍງານ ຂອງໜັງສືພິມ ເດລີແມວ ຂອງ ປະເທດ ອັງກິດ.

ແມງມູມ ຊນິດນີ້ມີຂາ 8 ຂາ ຍາວ 15 ຊັງຕີແມັດ ສ່ວນລໍາໂຕ ມີຄວາມຍາວ ພຽງ 12 ມິລລີແມັດ ແມງມູມ ບໍ່ມີຕາ Sinopoda Scurion ເປັນສາຍພັນ ທີ່ມີຫນ້ອຍ ທີ່ສຸດ. ແມງມູມ ຊນິດນີ້ ເປັນແມງມູມ ທີ່ລ້າເຫຍື່ອ ຊຶ່ງ ພາສາທ້ອງຖິ່ນ ຈະຮ້ອງວ່າ ແມງມູມ ກະປູ.

ສ່ວນແມງມູມ ກະປູ ຈະເຫັນທົ່ວໄປ ໃນໂລກ ໂດຍສະເພາະ ໃນເຂດ ອາກາດຮ້ອນ ແຕ່ສະເພາະ ຢູ່ລາວ ແມງມູມ ພວກນີ້ ບໍ່ມີຕາ ຈຶ່ງສ້າງ ຄວາມສົນໃຈ ແລະ ແປກໃຈໃຫ້ ນັກຄົ້ນຄວ້າ.
ແມງມູມ ບໍ່ມີຕາ Sinopoda Scurion ຈະຫລ່າເຫຍື່ອ ໂດຍບໍ່ໃຊ້ ສາຍໄຍ ຈະຕິດຕາມເຫຍື່ອ ໂດຍການຄານໄປຫາ ບໍ່ໃຊ້ໄຍຈັບ. ຜູ້ນໍາໃນການ ຄົ້ນຄວ້າ ສາສດາຈານ Peter Jager ກ່າວວ່າໄດ້ພົບ ແມງມູມ ບໍ່ມີຕາ ໃນຖໍ້າຫ່າງ ຈາກ ເຊບັ້ງໄຟ ປະມານ 100 ກິໂລແມັດ.

ນັກຄົ້ນຄວ້າ ເຊື່ອວ່າ ຕາຂອງແມງມູມ Sinopoda Scurion ຫາຍໄປ ໃນລະຫວ່າງ ການປັບໂຕ ຂອງມັນ ໃຫ້ເຂົ້າກັບ ສະພາບແວດລ້ອມ ທີ່ມືດສະນິດ ຢູ່ໃນຖໍ້າ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.