ສາຣພິດຂ້າແມງໄມ້ ໄຫຼສູ່ນໍ້າຂອງ

ຢາຂ້າ ແມງໄມ້ ທີ່ໃຊ້ ໂດຍ ໂຮງງານ ຜລິດນໍ້າຕານ ໄຫລລົງ ສູ່ ແມ່ນໍ້າຂອງ ແລະ ລໍານໍ້າ ສາຂາ.
ໂພໄຊສວັດ
2011.10.19

ກົດຟັງສຽງ

ປັດຈຸບັນ ສວນປູກອ້ອຍ ຂອງ ບໍຣິສັດ ມິຕຜົນ ເມືອງ ໄຊບຸລີ ແລະ ສວນປູກອ້ອຍ ຂອງ ບໍຣິສັດ ມິຕຜົນ ຂອງລາວ ເມືອງ ອາສພັງທອງ ແຂວງ ສວັນນະເຂດ ຍັງໃຊ້ຢາ ຂ້າແມງໄມ້ ກໍາຈັດ ສັດຕຣູພືຕ ທີ່ມາກິນ ຕົ້ນອ້ອຍ ຈຶ່ງເຮັດໃຫ້ ສາຣພິດ ໄຫລລົງ ໃສ່ ແມ່ນໍ້າຂອງ ແລະ ລໍານໍ້າ ສາຂາ ເຮັດໃຫ້ນໍ້າ ບາງບ່ອນ ເປິເປື້ອນ ຈົນສັດນໍ້າ ຕາຍ. ຮອງຫົວໜ້າ ຜແນກ ຊັພຍາກອນນໍ້າ ແລະ ສິ່ງແວດລ້ອມ ແຂວງ ສວັນນະເຂດ ເວົ້າກ່ຽວກັບ ເຣື້ອງນີ້ວ່າ:

"ຢາທີ່ເຂົາສີດ ມັນຊິຄ້າງ ຢູ່ນໍາຫັ້ນ ແລ້ວເວລາ ຝົນຕົກ ຕ້ອງໄດ້ໄຫລ ຕາມຕະຄອງ ຮ່ອງນໍ້າ ຕ່າງໆ ແມ່ນໍ້າຂອງ ແລ້ວກະ ຫ້ວຍເຊ ຕ່າງໆ ເປັນສາຂາ ຂອງ ແມ່ນໍ້າຂອງຫັ້ນ ເຊນ້ອຍ ແລ້ວ ກໍຫ້ວຍໜອງ ຄອງບຶງ ຕ່າງໆ".

ທ່ານເວົ້າ ຕໍ່ໄປວ່າ ຍ້ອນນໍ້າ ໃນບາງບ່ອນ ເປິເປື້ອນ ມີສານເຄມີ ເຈືອປົນ ເຮັດໃຫ້ ປາຕາຍ. ທີ່ຜ່ານມາ ມີຄົນໄປ ເອົາປາ ມາກິນ ກໍພາກັນ ເຈັບປ່ວຍ ຈົນເຖິງ ເຂົ້າໂຮງໝໍ. ນອກຈາກນັ້ນ ກໍຍັງມີ ງົວຄວາຍ ສັດລ້ຽງ ຂອງ ຊາວບ້ານ ໄປກິນຫຍ້າ ໃກ້ກັບບ່ອນ ທີ່ໄດ້ຖືກ ສີດຢາ ຂ້າແມງໄມ້ ດັ່ງກ່າວ ພາໃຫ້ເກີດ ອາການ ປາກເປື່ອຍ ຕາຍໄປ ຫລາຍໂຕ. ເຖິງວ່າ ທາງການ ເຄີຍໄດ້ ກ່າວເຕືອນ ໃຫ້ຜູ້ ບໍຣິຫານ ບໍຣິສັດ ຜລິດນໍ້າຕານ ໃຫ້ຄວບຄຸມ ບໍ່ໃຫ້ ສານເຄມີ ທີ່ໃຊ້ ຂ້າແມງໄມ້ ໄຫລລົງສູ່ ແມ່ນໍ້າ ລໍາທານ ແຕ່ກໍຍັງ ບໍ່ໄດ້ຮັບ ການຮ່ວມມື ເທົ່າທີ່ຄວນ. ເຈົ້າໜ້າທີ່ ເວົ້າວ່າ:

"ບາງເທື່ອ ເມື່ອເຮົາ ເວົ້າໄປ ຂະເຈົ້າ ກໍຕອບເຈົ້າໆ ຄັນໄປເຫັນ ໂຕຈິງແລ້ວ ບາງເທື່ອ ບໍ່ຢາກ ປະຕິບັດຕາມ ສຸດທ້າຍມາ ເຂົາກໍເຮັດ ໄປຕາມ ລໍາພັງໃຈ".

ເຖິງຢ່າງໃດ ກໍຕາມ ຫາກສວນອ້ອຍ ດັ່ງກ່າວ ຍັງໃຊ້ ຢາຂ້າແມງໄມ້ ໂດຍທີ່ ບໍ່ຄວບຄຸມ ຄັກແນ່ ບັນຫາ ທີ່ ສານເຄມີ ຈະໄຫລລົງ ສູ່ແມ່ນນໍ້າ ລໍາທານ ກໍຍັງຈະມີຢູ່ ແລະ ຍັງຈະສົ່ງ ຜົນກະທົບ ຕໍ່ ຊີວິດ ການເປັນຢູ່ ຂອງ ຊາວບ້ານ ຕໍ່ໄປ ແລະ ອາດຈະຫລາຍ ເພີ້ມຂຶ້ນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.