ຊາວລາວດີໃຈປະຊຸມ ອາເຊັມຜ່ານໄປ

ວັນທີ 6 ພຶສຈິກາ 2012 ເປັນມື້ສຸດທ້າຍ ຂອງກອງປະຊຸມ ສຸດຍອດ ອາເຊັມ ຄັ້ງທີ 9 ທີ່ ສປປລາວ ເປັນເຈົ້າພາບນັ້ນ ປະຊາຊົນລາວ ກໍໄດ້ສະແດງ ຄວາມຊົມເຊີຍ ທີ່ຣັຖບານ ສາມາດ ຈັດກອງປະຊຸມ ຣະດັບໂລກ ໄດ້ສຳເຣັດ ເປັນຢ່າງດີ. ການຈັດ ກອງປະຊຸມ ເທື່ອນີ້ ຈະເຮັດໃຫ້ຫລາຍ ປະເທດ ໃນໂລກຮູ້ຈັກ ແລະ ເຫັນບົດບາດ ຂອງ ສປປລາວ ຫລາຍຂື້ນ. ດັ່ງຊາວລາວ ຄົນນື່ງເວົ້າວ່າ:

"ກໍດີໃຈ ທີ່ເພີ່ນສາມາດ ຈັດລຸລ່ວງໄປໄດ້ ໂດຍດີ ປະເທດທີ່ ຢູ່ໄກໆແຖວ ຢູໂຣບ ຂະເຈົ້າກໍຊີ່ ໄດ້ຮູ້ຈັກ ປະເທດລາວ ຫລາຍຂື້ນຫັ້ນນະ ກໍຖືວ່າດີ ຄວາມຮູ້ສຶກຂ້ອຍ ຂ້ອຍຄິດວ່າ ບາງປະເທດ ຂະເຈົ້າ ກໍອາດຈະຄິດວ່າ ລາວເປັນ ສ່ວນນື່ງຂອງ ວຽດນາມບໍ ຂອງຈີນບໍ ພໍມາເຫັນໂຕຈີງ ແລ້ວ ເຖິງຈະຮູ້ວ່າເພີ່ນ ກໍເປັນປະເທດ ຂອງ ຂະເຈົ້າ ໂດຍສເພາະ".

ເລົາເວົ້າຕໍ່ໄປວ່າ ການຈັດກອງປະຊຸມ ຣະດັບໂລກ ນັ້ນຖືວ່າເປັນສີ່ງ ທ້າທາຍ ສຳລັບປະເທດນ້ອຍໆ ຄືດັ່ງ ປະເທດລາວ ເນື່ອງຈາກຕ້ອງໄດ້ ກະຕຽມ ຫຼາຍຢ່າງເພື່ອຊື່ສຽງ ຂອງປະເທດ ແລະໃນທີ່ສຸດ ຣັຖບານກໍສາມາດ ເຮັດອອກມາໄດ້ດີ ຊື່ງເລົາເອງ ໃນຖານະ ປະຊາຊົນລາວ ຄົນນື່ງ ກໍມີຄວາມພູມໃຈ ທີ່ເຫັນປະເທດ ມີຄວາມເປັນສາກົນ ຫລາຍຂື້ນ.

ປະຊາຊົນ ບາງຄົນ ກໍຜິດຫວັງ ເພາະຄິດວ່າ ກອງປະຊຸມ ສຸດຍອດອາເຊັມ ເທື່ອນີ້ ບໍ່ມີການ ຖ່າຍທອດສົດ ໃຫ້ປະຊາຊົນ ໄດ້ເຫັນ ໃນທົ່ວປະເທດ. ເລົາເວົ້າອີກວ່າ:

"ຂ້ອຍເບີ່ງກໍມີແຕ່ວ່າ ຕອນຜູ້ແທນ ເພີ່ນມາຊື່ໆ ມາຮອດສນາມບີນ ເທົ່ານັ້ນ ແລ້ວກໍແລ້ວ ເຂົາບໍ່ຖ່າຍທອດ ຈາກຫໍປະຊຸມ ກໍສົ່ງຜົລເສັຽຄື ພວກທີ່ວ່າຢາກ ຕິດຕາມ ການປະຊຸມ ກໍບໍ່ມີໂອກາດ ໄດ້ເບີ່ງ ຄືວ່າແຫລະ ການປະຊຸມຣະດັບ ສຸດຍອດ ນີ້ ໃຜໆກໍຢາກເຫັນ ມັນມີແນວໃດແທ້ ສີສັນແນວໃດນະ".

ຄົນລາວຜູ້ນັ້່ນ ເວົ້າວ່າ ຖ້າຣັຖບານ ມີໂອກາດ ຈັດກອງປະຊຸມ ຣະດັບໂລກອີກ ໃນອະນາຄົດ ເລົາຢາກໃຫ້ ມີການຖ່າຍທອດສົດ ເພື່ອໃຫ້ ປະຊາຊົນ ໃນທົ່ວປະເທດ ໄດ້ຮູ້ໄດ້ເຫັນ ເຫດການ ອັນທັນສມັຍ ທີ່ໄດ້ເກີດຂື້ນ ໃນລາວ.