ກິຈການປູກກາເຟ ໃນລາວຈະຂຍາຍໂຕ

ບໍຣິສັດ ໂອແລມ ອິນເທີເນເຊິນນອລ໌ ລິມິດເທັດທ໌ ຂອງສິງກະໂປ ພວມວາງແຜນ ຫລາຍໂຄງການ ເພື່ອຂຍາຍ ພື້ນທີ່ ປູກາເຟ ຈາກ 2,200 ເຮັກຕາຣ໌ ໃນປັດຈຸບັນ ມາເປັນ 5,000 ເຮັກຕາຣ.

ບໍຣິສັດ ດັ່ງກ່າວ ສາມາດ ຜລິດກາເຟ ອາຣາບີກາ ໃນລາວ ເພື່ອຂາຍ ໃນຣາຄາ 80 ເຊັນ ຕໍ່ 1 ພາວ, ຊຶ່ງປະມານ 1 ສ່ວນ 3 ໜ້ອຍກ່ວາ ຣາຄາກາເຟ ທີ່ຜລິດ ໃນປະເທດ ບເຣຊິລ. ການສຶກສາ ໄດ້ສະແດງ ໃຫ້ເຫັນວ່າ ມີຄວາມເປັນໄປໄດ້ ທີ່ຈະປູກກາເຟ ອາຣາບີກາ ໃນລາວ ທີ່ມີຄຸນພາບ ເທົ່າກັບ ອາຣາບີກາ ຂອງ ບເຣຊິລ ຕົ້ນສະບັບ.

ບໍຣິສັດ ໂອແລມ ມີວັດຖຸດິບ ແລະ ເຄື່ອງປຸງແຕ່ງ ໃນຫລາຍປະເທດ ທີ່ສໍາຄັນ ເພື່ອສນອງ ສິນຄ້າ ໃຫ້ລູກຄ້າ ປະມານ 12 ພັນກ່ວາຣາຍ ໃນທົ່ວໂລກ. ບໍຣິສັດ ດັ່ງກ່າວ ມີຜລິຕພັນ ເຖິງ 10 ກ່ວາ ລ້ານຕັນ ແລະ ມີຣາຍຮັບ ຈາກການຂາຍ ໃນປີ 2012 ເຖິງ 17 ພັນລ້ານດອນລາ

ເຖິງຢ່າງໃດ ກໍຕາມ, ເມື່ອບໍ່ນານມານີ້ ມີຣາຍງານ ກ່ຽວກັບ ການຂັດແຍ່ງ ເຣື້ອງການບຸກລຸກເອົາ ພື້ນທີ່ດິນ ຂອງປະຊາຊົນ ທ້ອງຖິ່ນ ໄປໃຫ້ ບໍຣິສັດ ໂອແລມ ສັມປະທານ ປູກກາເຟ, ຊຶ່ງເຮັດໃຫ້ ປະຊາຊົນ ທ້ອງຖິ່ນ ບໍ່ພໍໃຈ ແລະ ໄດ້ຮຽກຮ້ອງ ໄປຍັງອົງການຈັດຕັ້ງ ຂັ້ນທ້ອງຖິ່ນ ຈົນເຖິງ ສະພາແຫ່ງຊາຕ ໃຫ້ຄວາມເປັນທັມ ແກ່ພວກຂະເຈົ້າ.