ເຈົ້າໜ້າທີ່ໄທຍ ຍຶດຂອງຜິດກົດໝາຍ ທີ່ກ່ຽວຂ້ອງກັບຄົນລາວ ຫຼາຍຣາຍການ

ເຈົ້າໜ້າທີ່ໄທຍ ເມືອງປາກຊົມ ສາມາດ ຈັບພວກລັກຕັດໄມ້ 4 ຄົນ ພ້ອມກັບ ຍຶດໄມ້ດູ່ ທີ່ຕຣຽມສົ່ງໄປ ສປປ ລາວ ໄດ້ ຢູ່ບໍຣິເວນ ບ້ານຄົກໃຜ່ ເມືອງປາກຊົມ ແຂວງເລີຍ ໃນຕອນເຊົ້າ ຂອງວັນທີ 2 ພຶສຈິກາ ທີ່ຜ່ານມາ ຊຶ່ງມີມູນຄ່າ ເກືອບ 3 ລ້ານບາທ. ການຈັບ ແລະຍຶດໄມ້ໄດ້ ເທື່ອນີ້ ມີຂຶ້ນ ພາຍຫຼັງທີ່ ເຈົ້າໜ້າທີ່ ທະຫານພຣານ ບ້ານຄົກໃຜ່ ເມືອງປາກຊົມ ໄດ້ຮັບແຈ້ງ ຈາກພົລເມືອງດີ ວ່າ ມີກຸ່ມຂະບວນການ ຄ້າໄມ້ເຖື່ອນ ເຂົ້າມາລັກຕັດໄມ້ ໃນເຂດພູ ຢູ່ບ້ານຄົກໃຜ່ ຕັ້ງແຕ່ຕອນກາງຄືນ ຂອງວັນທີ 29 ຕຸລາ, ດັ່ງນັ້ນ ເຈົ້າໜ້າທີ່ ຈຶ່ງໄດ້ລົງໄປກວດກາ ແລະພົບວ່າ ມີໄມ້ລາຄາແພງ ເຊັ່ນໄມ້ດູ ແລະ ໄມ້ກະຍູງ ຈຳນວນຫຼາຍ ຖືກຕັດ ພ້ອມກັບພົບ ຊາຍ 4 ຄົນ ພວມເຝົ້າໄມ້ດັ່ງກ່າວໄວ້ຢູ່, ດັ່ງນັ້ນ ເຈົ້າໜ້າທີ່ ຈຶ່ງໄດ້ຈັບ ແລະຍຶດໄມ້ດັ່ງກ່າວ. ຕໍ່ມາ ເຈົ້າໜ້າທີ່ ພົບວ່າ 1 ໃນ 4 ຄົນ ທີ່ຖືກຈັບນັ້ນ ເປັນຄົນລາວ ທີ່ລັກຂ້າມມາ ເພື່ອຮັບຈ້າງຕັດໄມ້ ສ່ວນອີກ 3 ຄົນ ເປັນຄົນໄທຍ. ທັງໝົດ ຮັບສາຣະພາບວ່າ ໄດ້ຮັບຈ້າງຕັດໄມ້ ເພື່ອສົ່ງໄປ ສປປ ລາວ ແລະ ມີຜູ້ຮ່ວມຂະບວນການທັງໝົດ 9 ຄົນ, ແຕ່ອີກ 5 ຄົນນັ້ນ ຫລົບໜີ ໄປໄດ້ເສັຽກ່ອນ. ພ້ອມດຽວກັນນັ້ນ, ທະຫານພຣານ ຍັງໄດ້ຍຶດຢາບ້າ ໄດ້ອີກ ຈຳນວນ 11,773 ເມັດ ຢູ່ບໍຣິເວນແຄມນ້ຳຂອງ ເຂດບ້ານໂສມ ເມືອງປາກຊົມ ແຂວງເລີຍ ຫຼັງຈາກ ເຈົ້າໜ້າທີ່ ບ້ານດັ່ງກ່າວ ແຈ້ງວ່າ ມີຊາວປະມົງລາວ ຂ້າມມາຈາກ ເມືອງສັງທອງ ນະຄອນຫຼວງວຽງຈັນ ແລະນຳເອົາ ກະສອບມາເຊື່ອໄວ້ ບໍຣິເວນ ແຄມນ້ຳຂອງ, ຈາກນັ້ນ ກໍໄດ້ຟ້າວຂີ່ເຮືອ ກັບຄືນໄປ. ດັ່ງນັ້ນ ເຈົ້າໜ້າທີ່ ຈຶ່ງໄດ້ເຂົ້າກວດສອບເບິ່ງ ແລະສາມາດຍຶດຢາບ້າ ຈຳນວນດັ່ງກ່າວໄດ້.