Sebiylik xiyallirini izdep: imran sada'iy bilen söhbet (2)

Muxbirimiz jüme
2020.01.17
Damla-Imran-Sadai.jpeg Yash sha'ir imran sada'ining türkiyede neshr qilin'ghan shé'irlar toplimi.
Photo: RFA

Hörmetlik radi'o anglighuchilar, aldinqi qétimliq programmimizda türkiyede yashawatqan yash sha'ir imran sada'iy bilen ötküzülgen söhbet we uning qisqiche terjimihalini huzurunglargha sun'ghan iduq.

Sehipimizning bügünki qismi yene iman sada'iy heqqide dawam qilidu.

Özining bed'iy ijadiyet qarishi heqqide toxtalghan yash sha'ir “Insaniyet shé'iridin qanchiki uzaqlashsa, sapliqtin, semimiyliktin, ijadiyliqtin shunchilik uzaqlishidu,” deydu. Undaqta, yash sha'ir shé'iriyet we özining shé'irliri heqqide yene némilerni éytidu? bu heqtiki tepsilatlargha qiziqsanglar diqqitinglar söhbitimizning dawamida bolghay.

2003-Yili qeshqer shehirining yopurgha nahiyeside meripetperwer a'ilide dunyagha kelgen imran abdughéni sada'iy bashlan'ghuch we ottura mektep ma'aripini ürümchi shehiride alghandin kéyin qariliqini tamamlighan. U herxil sewebler bilen 2016-yili ana wetinidin ayrilishqa mejbur bolup, türkiyening istanbul shehirige kélip yerleshken.

U musapirliq hayatigha qedem qoyghandin kiyin edebiy ijadiyetni türk tilida élip bérishqa bashlighan. Imran sada'iyning türkche “Yurtum qaldi” namliq shé'iri türkiye döletlik musabiqisining oqughuchilar türide mukapatqa érishken. Sha'irning bezi shé'irliri “Yéngi sen'et we edebiyat zhurnili”, yash sha'irlar birliki- “Altun”, edebiyat zhurnili- “Yultuz” qatarliq bir qanche zhurnallarda élan qilin'ghan.

Sha'ir istanbulda yalghuz kishilik shé'iriyet kéchiliki ötküzüp qizghin alqishlargha érishken. 2019-Yili sha'irning “Tamche” namliq tunji türkche shé'irlar toplimi türkiyediki “Dahiy neshriyati” teripidin neshr qilinip, her qaysi kitabxana hem tor béketlerde sétilishqa qoyulghan. 

Sha'ir imran sada'iy 2019-yili 13-qétimliq edérne, girétsiye, bulghariye qatarliq döletlerde dawam qilghan xelq'ara türkche shé'iriyet pa'aliyitige tunji qétim Uyghurlargha wakaliten qatniship, qizghin alqishqa érishken. U hazir istanbulda yene oqushini dawam qilmaqta.


Natonush chare

Imran sada'i


Asta kétiwatsam kochida,

Zilwa boy bir ana,

Aldimda bop qaldi peyda.

Qarap qaptimen shunche uzun. . . .

Taki bolghuche ghayib sozup boyun.

Yénida közliri yashangghu bir bala,

Ah némanche omaq, némanche sebiy!

Ikki séyma qaturdi shu'an heykel kebi. . .


Soridim ming ret özümge qaytilap,

Néchük turar shebnem, ey omaq kirpikingde lighirlap.

Yüriki yumshaq ana baghridin aqatti muhebbet, 

Shu shox sebiy qelbige shildirlap. . .


Közliringge béqip üzüldi tarisi dilimning,

Sha'ir akang qaldighu qarap bunche. . .

Néme séhir oyulghan közüngge méni qilghudek ram?

Aliqiningda siqimdaghliq barmaqliri apangning. . .

Külkengni kördüm, qétip qéliptu léwingde, 

Lékin bunche meyüs némishqa ey ukam haling séning?


. . . . . . . . . . . . . .

Özüm xushalliqning yoqsulimen, kechürgin!

Ber déseng nimjan shé'irdin özge némem barkin?

Kel déseng ger oynayli wiliqlap dey 

Kélelmisem nawada. . .

Sha'ir akam qelem tutup yétip qéliptu dégin.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.