Сеғиниш отида ташқан шаир - абдушүкүр муһәммәт

Шаир абдушүкүр муһәммәтниң “анамниң әслимилири” намлиқ китабиниң муқависи.

Абдушүкүр муһәммәт 1967-йили кучар наһийиси кона шәһәрдә туғулған.

1988-Йили қәшқәр педагогика институтиниң әдәбият факултетини пүттүргән. Кейинчә йүннән өлкисиниң кунмиң шәһиридики сода-санаәт мәмурий башқуруш институтида мәмурий башқуруш кәспи бойичә билим ашурған. 

1988-Йилидин 2001-йили 6-айғичә үрүмчидики уйғур аптоном районлуқ сода-санаәт мәмурий башқуруш кадирлар мәктипидә лектор вә дотсент болуп ишлигән.

2003-Йили шиветсийәгә келип, еғир санаәт кәспидә 3 йил оқуған. Оқуши ахирлашқандин кейин шиветсийәдә олтурақлишип қалған. 

2004-Йилидин башлап “ғәрб шамили” намида журнал чиқирип, журналниң мақалә тәйярлаш, тәһрирлик қилиш, бәт ясаш вә лайиһиләш қатарлиқ хизмәтлирини атқурған. 

Вәтән ичидики мәзгилдә көплигән шеир вә мақалиләрни һәрхил нопузлуқ гезит-журналларда елан қилип көзгә көрүнгән абдушүкүр муһәммәт шиветсийәдә олтурақлишип қалғандин кейинму өз иҗадийитини тохтатмай тарихий, сиясий, диний вә әдәбий мақалиләрни йезип “мәрипәт” журнили, “уйғур академийәси тарихчи, тәтқиқатчи вә әдибләр мунбири” вә башқа нопузлуқ тор бәтләр арқилиқ оқурмәнләр билән йүз көрүштүрмәктә.


Тешип чиққан мән

Абдушүкүр муһәммәт


Мән таштим 

Ичимдә йәнә ташқудәк һечнемә қалмиди,

Гирвәклиримни ғәм ялап бузувәтти.

Чиңқи чүшниң қараңғулуқида чүшүм бузулди,

Тәрәп-тәрәптин еқип келиватқан мискин авазлар

Маңа урулатти.

Тенимгә урулған авазлардин дилим көйди.

Бу авазлар хели йиллар илгири, һәр пәйшәнбә күни

Бир йәргә йиғилип мунаҗат оқуйдиған аниларниң авази иди.

Бир чағларда:

Патимәмниң көңлики,

Йәтмиш йәрдин ямиқи, дәп һәсрәт чекишкән анилар

Йәтмиш йәрдин титилған йүрәк үчүн дуа қилишқа амалсиз иди.

Кочилар авазсиз

Бөшүкләр йиғисиз

Мәсчитләр худасиз

Очақлар отсиз иди.

Адәмләр йиңнә төшүкидин өткүзүләтти,

Тарих йиңнә билән кочилинатти.

Мән тешип чиққан вақтимда 

У йәрдә көләңгә йоқ иди

Пәқәт мән бар идим.

2018-5-Айниң 22-күни, стокһолм


Җигдә


Җигдә йоқ бу йәрдә,

Һәм җигдә дегән сөзму йоқ.

Җигдә чечикисиз баһар,

Җигдә һидсиз қизлар,

Намазшамгүлигә охшар.

Йопурмиқи күмүш,

Мевиси алтун җигдә

Ханбалиққа тунҗи кәлгәндә,

Ипар һидиға толғанти шәһәр.

Еһ ипархан!

Сени пурақлиқ қилған,

Саңа һәсрәт салған 

Җигдини чүшәндим әмди.

Җигдә-юртум,

Җигдә-вәтән,

Җигдә мениң һәсритим.

2018-8-Айниң 3-күни, стокһолм



Кечә


Кечиниң 

Чечимдәк қисқа,

Қәлбимдәк йоруқ болушини истәймән.

Аримиздики мусапини өмрүмгә бағлаймән.

Әслидә яш көзүмдин тамған тамчә иди,

Мән әмди униң ичидә датлашмақтимән.

Бирақ кечә

Хиялимдәк узун, 

Чүшүмдәк қорқунчлуқ,

Сеғинишимдәк чәксиз иди.

Қуяш мән кәлгән узун йолниң йәнә тәрипидә 

Кечиниң қойнида мәстхуш иди. 

Чечим ақарди

Лекин кечә ақармиди,

Чечимниң қалмиди йерими

Лекин кечә қоюқ шу пети.

2018-Йили 8-айниң 3-күни, стокһолм.