Séghinish otida tashqan sha'ir - abdushükür muhemmet

Muxbirimiz jüme
2019-03-29
Élxet
Pikir
Share
Print
Sha'ir abdushükür muhemmet.
Sha'ir abdushükür muhemmet.
RFA/Jume

Abdushükür muhemmet 1967-yili kuchar nahiyisi kona sheherde tughulghan.

1988-Yili qeshqer pédagogika institutining edebiyat fakultétini püttürgen. Kéyinche yünnen ölkisining kunming shehiridiki soda-sana'et memuriy bashqurush institutida memuriy bashqurush kespi boyiche bilim ashurghan. 

1988-Yilidin 2001-yili 6-ayghiche ürümchidiki Uyghur aptonom rayonluq soda-sana'et memuriy bashqurush kadirlar mektipide léktor we dotsént bolup ishligen.

2003-Yili shiwétsiyege kélip, éghir sana'et kespide 3 yil oqughan. Oqushi axirlashqandin kéyin shiwétsiyede olturaqliship qalghan. 

2004-Yilidin bashlap "Gherb shamili" namida zhurnal chiqirip, zhurnalning maqale teyyarlash, tehrirlik qilish, bet yasash we layihilesh qatarliq xizmetlirini atqurghan. 

Weten ichidiki mezgilde köpligen shé'ir we maqalilerni herxil nopuzluq gézit-zhurnallarda élan qilip közge körün'gen abdushükür muhemmet shiwétsiyede olturaqliship qalghandin kéyinmu öz ijadiyitini toxtatmay tarixiy, siyasiy, diniy we edebiy maqalilerni yézip "Meripet" zhurnili, "Uyghur akadémiyesi tarixchi, tetqiqatchi we edibler munbiri" we bashqa nopuzluq tor betler arqiliq oqurmenler bilen yüz körüshtürmekte.


Téship chiqqan men

Abdushükür muhemmet


Men tashtim 

Ichimde yene tashqudek héchnéme qalmidi,

Girweklirimni ghem yalap buzuwetti.

Chingqi chüshning qarangghuluqida chüshüm buzuldi,

Terep-tereptin éqip kéliwatqan miskin awazlar

Manga urulatti.

Ténimge urulghan awazlardin dilim köydi.

Bu awazlar xéli yillar ilgiri, her peyshenbe küni

Bir yerge yighilip munajat oquydighan anilarning awazi idi.

Bir chaghlarda:

Patimemning köngliki,

Yetmish yerdin yamiqi, dep hesret chékishken anilar

Yetmish yerdin titilghan yürek üchün du'a qilishqa amalsiz idi.

Kochilar awazsiz

Böshükler yighisiz

Meschitler xudasiz

Ochaqlar otsiz idi.

Ademler yingne töshükidin ötküzületti,

Tarix yingne bilen kochilinatti.

Men téship chiqqan waqtimda 

U yerde kölengge yoq idi

Peqet men bar idim.

2018-5-Ayning 22-küni, stokholm


Jigde


Jigde yoq bu yerde,

Hem jigde dégen sözmu yoq.

Jigde chéchikisiz bahar,

Jigde hidsiz qizlar,

Namazshamgülige oxshar.

Yopurmiqi kümüsh,

Méwisi altun jigde

Xanbaliqqa tunji kelgende,

Ipar hidigha tolghanti sheher.

Éh iparxan!

Séni puraqliq qilghan,

Sanga hesret salghan 

Jigdini chüshendim emdi.

Jigde-yurtum,

Jigde-weten,

Jigde méning hesritim.

2018-8-Ayning 3-küni, stokholm



Kéche


Kéchining 

Chéchimdek qisqa,

Qelbimdek yoruq bolushini isteymen.

Arimizdiki musapini ömrümge baghlaymen.

Eslide yash közümdin tamghan tamche idi,

Men emdi uning ichide datlashmaqtimen.

Biraq kéche

Xiyalimdek uzun, 

Chüshümdek qorqunchluq,

Séghinishimdek cheksiz idi.

Quyash men kelgen uzun yolning yene teripide 

Kéchining qoynida mestxush idi. 

Chéchim aqardi

Lékin kéche aqarmidi,

Chéchimning qalmidi yérimi

Lékin kéche qoyuq shu péti.

2018-Yili 8-ayning 3-küni, stokholm.

Pikirler (0)
Share
Toluq bet