Шаир абдурәһим парачниң “вәтәнсиз күй” лири (1)

Шаир абдурәһим имин (парач).

Абдурәһим имин (парач) 1975-йили қәшқәр пәйзиват наһийәсиниң қизилбойи йезисида туғулған.

1995-Йили алий мәктәп имтиһанидин лаяқәтлик өтүп, әйни вақиттики қәшқәр педагогика институти (һазирқи қәшқәр университети) ниң сиясий қанун факултетиға қобул қилинған. У 1997-йили 6-айниң 30 күни (йәни хитай даирилири хоңкоңни өткүзүвалмақчи болған күниниң һарписи) мәктәптин тутқун қилинип, 40 күн қамақта ятқандин кейин “коммунистик һакимийәткә қарши идийә вә һәрикәттә болушқа урунған” дегән җинайәт билән һечқандақ сот қилинмастин үч йиллиқ кесилгән. 

У 2000-йили июнда түрмидин чиқип 2013-йили ана юртидин айрилғучә болған җәрянда хитай сақчилириниң тутқун қилиш, тән җазаси вә тәһдитлиригә һәр үч айда бир қетим учрап турған.

Ахири 2013-йили авғустта хитай өлкилири арқилиқ қачақ йоллар билән бешини елип чәтәлгә чиқип кәткән. Абдурәһим парач тәхминән бир йилдин кейин түркийәгә йетип кәлгән. 

У түркийәгә йитип кәлгәндин кейин 2015-йилидин 2017-йилиғичә истанбулда “уйғур медия” қармиқидики “истиқлал” тор телевизийисидә ишлигән. 2017-Йилидин буян иҗтимаий таратқуларда уйғурларға мунасивәтлик учур, хәвәрчилик билән шуғуллинип кәлмәктә. 

Униң илгири “тәңритағ” “тарим”, “кроран” вә “қәшқәр әдәбияти” қатарлиқ журналларда 100 парчиға йеқин шеир вә язмилири елан қилинған. 2018-Йили түркийәдә “вәтәнсиз күй” намлиқ шеирлар топлимини нәшр қилдурған.


Келиду


Күлгинә йүрәк, җанан келиду,

Ләббәйдә һөрләр ян-ян келиду.

Ерийду қарлар һәр җилвисидин,

Булбулуң болған заман келиду.

Таҗида һилал юлтуз түнигән,

Көк зәр либаслиқ султан келиду.

Өткүр җан бәргән ишқида аһ дәп,

Турпан пурақлиқ айхан келиду.

Қандақ сүпәтләй аҗиз тилимда,

Җанни алғучи бир җан келиду.

Висалда йүрәк йерилмай турсун,

Той үстигә той дәвран келиду.

Шунчилик татлиқ висал ләззити,

Қәпәстә қанхор қаван келиду.

Сиқилған җанлар самада ләрзан,

Өлән товлишип чуқан келиду.

Интизарлиқниң сүбһидур исми,

Зулмәтни чаққан әзан келиду.

Тәйяр туруңлар, әй бағри қанлар,

Йүз йил сақлиған меһман келиду.

Интизар көзләр гәр сорап қалса,

“күткән у җанан қачан келиду?”.

Ейтип қоюңлар җавабим шуки,

Йолда у җанан чапсан келиду.