Уйғур бөлүми «әркин тиниқлар» намида сәһипә ачти

Мухбиримиз җүмә
2019-02-01
Елхәт
Пикир
Share
Принт
Шиветсийәдә хитайға қарши намайиш тәшкилләватқан мәрһум күрәш көсән (2005-йил 1-өктәбир)
Шиветсийәдә хитайға қарши намайиш тәшкилләватқан мәрһум күрәш көсән (2005-йил 1-өктәбир)
RFA/Qutlan

«Әркин тиниқлар» сәһипимизниң тунҗи санини сәһипимизниң ечилиш мәқсити һәққидә чүшәнчә бәргәч мәрһум сәнәткар күрәш көсәнни әсләш билән башлашни лайиқ таптуқ.

Һәммимизгә мәлум болғинидәк, йеқинқи бир нәччә йилдин бери лагерларға қамалған милйонлиған уйғурлар арисида уйғур зиялийлири, уйғур әдиблири, уйғур язғучилириму көп салмақни тәшкил қилди.

Биз игилигән хәвәрләргә қариғанда, нөвәттә уйғур елидә, җүмлидин хитай миқясида уйғур тилида чиқидиған барлиқ нәшр буюмлири бирақла тохтитилғандин сирт, илгири нәшр қилинған нурғунлиған надир әсәрләрниң йиғип кетилгәнлики мәлум. 

Ғәрб мәтбуатлирида «мәдәнийәт қирғинчилиқи» дәп қариливатқан мәзкур вәзийәтниң уйғур тили, мәдәнийити вә кимликиниң кәлгүсигә елип келидиған вәйран қилиш характерлик тәсирини мөлчәрләш қейин болмиса керәк.

Хитай уйғурларға қаратқан бу хил бастуруш сиясәтлириниң йәнә қачанғичә давам қилидиғанлиқи наениқ болуватқан вәзийәттә уйғур мәдәнийити, кимлики вә тарихини әҗдадлардин әвладларға тошуғучи болмиш уйғур тиллиқ әсәрләрниң көпләп йезилиши, нәшри қилиниши вә тарқилишини капаләткә игә қилиш үчүн қандақ зөрүр қәдәмләрни елиш мумкин дегән соалларму нөвәттә уйғур җәмийитидә муназирә қилиниватқан темиларниң бири.

Һәммиңларға мәлумки, әркин асия радиосиниң уйғурчә бөлүми тәсис қилинған 20 йилдин бери барлиқ тиришчанлиқларни көрситип «авазсизларниң авази» болуп келиватиду, буни һәр бириңларниң йеқиндин қоллап-қуввәтлишидин һәргиз айрип қарашқа болмайду-әлвәттә. 

Һәрқайсиңларниң мәдәт вә үмидлирини асас қилған һалда радио программилиримизниң рәңдарлиқини ашуруп, мәзмунини бейитип, вәтән ичи вә сиртидики язғучи, сәнәткар вә әдәбият-сәнәт һәвәскарлиримизға техиму чоң сорун һазирлап бериш мәқситидә мана бүгүндин тартип радийомизда «әркин тиниқлар» дегән темида йеңи бир сәһипә ачтуқ. 

Сәһипимиздә уйғурларниң сиясий тәқдиригә мунасивәтлик болған сиясий, иҗтимаий, диний вә әдәбий мәзмундики сөһбәт-мулаһизиләр, дуняниң һәрқайси җайлиридики язғучи-сәнәткарлиримиз тәрипидин елан қилинған әдәбият-сәнәт әсәрлири, роман-һекайиләр, шеир, нахша-музика, юмурлар вә гүзәл сәнәт әсәрлири кәң тордашларниң бәһр елишиға сунулиду.

Конилар: «күнниң башлиниши таңдин, ишниң башлиниши саламдин» дегәникән, шуңа биз бүгүн сәһипимизниң рәсмий сани башлиништин елгири бу сәһипимиз арқилиқ әзиз хәлқимизгә салам йоллашни мувапиқ таптуқ. Вәтән ичи вә сиртидики барлиқ қериндаш, дост-ярәнләргә биздин отлуқ салам болсун! шу вәҗидин бүгүнки программимизни мәрһум сәнәткар күрәш көсәнниң «салам дәңлар вәтәнгә» намлиқ нахшиси билән башлашни лайиқ таптуқ. 

Мәрһум сәнәткар күрәш көсән 1959-йили уйғурлар вәтининиң мәркизи үрүмчи шәһиридә зиялий аилисидә дуняға кәлгән һәмдә кейинки мәзгилләрдә сәнәт саһәсидә юқири шөһрәт қазанған. Сиясий сәвәбләр билән һаятиниң бир қисмини сәрсанлиқта өткүзүшкә мәҗбур болған от йүрәк сәнәткар күрәш көсән 2006-йили 48 йешида шиветсийәдә вапат болған иди.

Пикирләр (0)
Share
Толуқ бәт